ନୂଆଦିଲ୍ଲୀ, ୨୦।୪ : ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ଉପରେ ନିର୍ମିତ ଫିଲ୍ମ ଉପରେ ଦେଖାଦେଇଛି ସଙ୍କଟ। ଫିଲ୍ମ ଉପରେ ବ୍ୟାନ ଲଗାଇବା ପାଇଁ ସୁଶାନ୍ତଙ୍କ ବାପା ଦିଲ୍ଲୀ ହାଇ କୋର୍ଟରେ ଯାଚିକା ଦାଖଲ କରିଥିଲେ। ଏହାର ଶୁଣାଣି କରି ମଙ୍ଗଳବାର ଫିଲ୍ମ ନିର୍ମାତାଙ୍କୁ ନୋଟିସ ଜାରି କରିଛନ୍ତି ଜଷ୍ଟିସ ମନୋଜ କୁମାର ଓହରି।
ସୁଶାନ୍ତଙ୍କ ମୃତ୍ୟୁ ଉପରେ ‘ନ୍ୟାୟ : ଦ ଜଷ୍ଟିସ’, ‘ସୁଇସାଇଡ୍ ଅର ମର୍ଡର : ଏ ଷ୍ଟାର ଓ୍ବାଜ ଲଷ୍ଟ’ ଓ ‘ଶଶାଙ୍କ’ ଭଳି ଫିଲ୍ମ ପ୍ରସ୍ତୁତ ହୋଇଛି। ଏହି ଫିଲ୍ମଗୁଡ଼ିକ ଉପରେ ବ୍ୟାନ ଲଗାଇବା ସହ ସ୍ବର୍ଗତ ଅଭିନେତାଙ୍କ ଆଇନଗତ ଉତ୍ତରାଧିକାରୀଙ୍କ ବିନା ଅନୁମତିରେ ସୁଶାନ୍ତଙ୍କ ଉପରେ କୌଣସି ଫିଲ୍ମ, ପ୍ରକାଶନ ଇତ୍ୟାଦି ନିର୍ମାଣ କରାଯାଇ ପାରିବ ନାହିଁ ବୋଲି ବାପା କ୍ରିଷ୍ଣା କିଶୋର ସିଂ ଯାଚିକାରେ ଦର୍ଶାଇଛନ୍ତି। କୋର୍ଟରେ ସୁଶାନ୍ତଙ୍କ ବାପାଙ୍କ ପକ୍ଷ ରଖିଛନ୍ତି ବରିଷ୍ଠ ଓକିଲ ବିକାଶ ସିଂ।
