ନୂଆଦିଲ୍ଲୀ,୧୬।୭: ଦେଶର ପ୍ରମୁଖ ଶିଳ୍ପ ସଂସ୍ଥାଗୁଡ଼ିକ ମଧ୍ୟରୁ ଅନ୍ୟତମ କଲ୍ୟାଣୀ ପରିବାର ସହିତ ଜଡିତ ପାରିବାରିକ ବିବାଦ ଏକ ଗୁରୁତ୍ୱପୂର୍ଣ୍ଣ ଆଇନଗତ ମୋଡ଼ରେ ପହଞ୍ଚିଛି। ପ୍ରାୟ ୧ ଲକ୍ଷ କୋଟି ମୂଲ୍ୟର ସମ୍ପତ୍ତି ସହିତ ଜଡିତ ଏହି ବିବାଦର ସମାଧାନ ପାଇଁ ସୁପ୍ରିମକୋର୍ଟ ଅବସରପ୍ରାପ୍ତ ବିଚାରପତି ଏଲ. ନାଗେଶ୍ୱର ରାଓଙ୍କୁ ମଧ୍ୟସ୍ଥି ଭାବରେ ନିଯୁକ୍ତ କରିଛନ୍ତି। କୋର୍ଟର ମତ ହେଉଛି ଯେ, ପାରସ୍ପରିକ ସମ୍ମତି ମାଧ୍ୟମରେ ପାରିବାରିକ ଏବଂ ବ୍ୟବସାୟିକ ବିବାଦର ସମାଧାନ ଦୀର୍ଘକାଳୀନ ମାମଲା ଅପେକ୍ଷା ପ୍ରାୟତଃ ଅଧିକ ପ୍ରଭାବଶାଳୀ। ଉଲ୍ଲେଖଯୋଗ୍ୟ, ମଧ୍ୟସ୍ଥତା ମାଧ୍ୟମରେ ମାମଲା ସମାଧାନ କରିବାର ପଦକ୍ଷେପ ସର୍ବୋଚ୍ଚ ନ୍ୟାୟାଳୟରୁ ହିଁ ଆରମ୍ଭ ହୋଇଥିଲା।
କଲ୍ୟାଣୀ ପରିବାର ବିବାଦ ହେଉଛି ସମ୍ପତ୍ତି ଏବଂ ଉତ୍ତରାଧିକାରକୁ ନେଇ ଏକ ଦ୍ୱନ୍ଦ୍ୱ। ଏଥିରେ ପ୍ରମୁଖ ବ୍ୟବସାୟ ସଂସ୍ଥା ‘ଭାରତ ଫୋର୍ଜ’ର ଅଧ୍ୟକ୍ଷ ବାବା କଲ୍ୟାଣୀ ଏବଂ ପରିବାରର ଅନ୍ୟ ସଦସ୍ୟ ସାମିଲ ଅଛନ୍ତି। ଏହି ବିବାଦ ପାରିବାରିକ ବ୍ୟବସାୟ ଏବଂ ୧ ଲକ୍ଷ କୋଟିରୁ ଅଧିକ ମୂଲ୍ୟର ସମ୍ପତ୍ତିର ବିଭାଜନ ଉପରେ କେନ୍ଦ୍ରିତ।
ବାବା କଲ୍ୟାଣୀଙ୍କ ଭଉଣୀ ସୁଗନ୍ଧା ହିରେମଥ, ପାରିବାରିକ ସମ୍ପତ୍ତିର ଏକ ତୃତୀୟାଂଶ ଅଂଶ ମାଗୁଛନ୍ତି। ଏହି ସମୟରେ ତାଙ୍କ ସାନ ଭାଇ ଗୌରୀଶଙ୍କର କଲ୍ୟାଣୀ ମଧ୍ୟ ସମ୍ପତ୍ତି ଏବଂ ସେମାନଙ୍କ ସ୍ବର୍ଗତ ମା’ଙ୍କ ଇଚ୍ଛା ସମ୍ପର୍କରେ ଏକ ଆଇନଗତ ଲଢ଼େଇରେ ସାମିଲ ଅଛନ୍ତି।
ଭାରତୀୟ ନ୍ୟାୟପାଳିକା ଦୀର୍ଘ ଦିନ ଧରି ପାରିବାରିକ ଏବଂ ବାଣିଜି୍ୟକ ବିବାଦରେ ମଧ୍ୟସ୍ଥତାକୁ ଉତ୍ସାହିତ କରିଆସିଛି। କାରଣ ଏହା ଗୋପନୀୟତା ସୁନିଶ୍ଚିତ କରେ ଏବଂ ସମ୍ପର୍କକୁ ସୁଧାରିବା ପାଇଁ ସୁଯୋଗ ପ୍ରଦାନ କରେ। ମାମଲାର ସମ୍ବେଦନଶୀଳତା ଏବଂ ଏଥିରେ ଜଡିତ ବିଶାଳ ବ୍ୟବସାୟିକ ସ୍ବାର୍ଥକୁ ଦୃଷ୍ଟିରେ ରଖି ସୁପ୍ରିମକୋର୍ଟ ମଧ୍ୟସ୍ଥତାକୁ ପ୍ରାଥମିକତା ଦେଇଥିଲେ। ପୂର୍ବ ପ୍ରୟାସ ସଫଳ ହୋଇ ନ ଥିଲେ ମଧ୍ୟ, କୋର୍ଟ ପୁଣି ଥରେ ଉଭୟ ପକ୍ଷଙ୍କୁ ଏହି ପ୍ରକ୍ରିୟାରେ ସାମିଲ ହେବାକୁ ଅନୁରୋଧ କରିଥିଲେ। ଫଳସୱରୂପ, ପୂର୍ବତନ ସୁପ୍ରିମକୋର୍ଟ ବିଚାରପତି ଏଲ. ନାଗେଶ୍ୱର ରାଓଙ୍କୁ ଜଣେ ନିରପେକ୍ଷ ମଧ୍ୟସ୍ଥତା ଭାବରେ କାର୍ଯ୍ୟ କରିବାର ଦାୟିତ୍ୱ ଦିଆଯାଇଥିଲା, ମାତ୍ର ୧ ଟଙ୍କାର ଫି’ ପାଇଁ ସେବା କରିବାକୁ ରାଜି ହୋଇଥିଲେ।
Dharitri – Odisha’s No.1 Odia Daily
