ନୂଆଦିଲ୍ଲୀ, ୨୬।୩(ପି.ଟି.): ବିଧାୟକ କିମ୍ବା ଏମ୍ପି କୌଣସି ମାମଲାରେ ଦୋଷୀ ସାବ୍ୟସ୍ତ ହୋଇ ୨ ବର୍ଷ କିମ୍ବା ତଦୂର୍ଦ୍ଧ୍ୱ ଜେଲଦଣ୍ଡ ପାଇଥିଲେ ଲୋକ ପ୍ରତିନିଧି ଆଇନର ଧାରା ୮(୩) ଅନୁଯାୟୀ ସେମାନଙ୍କ ସଭ୍ୟ ପଦ ସ୍ବତଃ ରଦ୍ଦ ହୋଇଯାଉଛି। ଏଭଳି ସଦସ୍ୟତା ରଦ୍ଦକୁ କେରଳର ଜଣେ ସାମାଜିକ କର୍ମୀ ଶନିବାର ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଛନ୍ତି। ୨୦୧୯ର ଏକ ମାନହାନି ମାମଲାରେ ଗୁଜରାଟର ସୁରଟସ୍ଥିତ ଏକ ଅଦାଲତ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଦୋଷୀସାବ୍ୟସ୍ତ କରିବା ସହ ୨ ବର୍ଷ ଜେଲଦଣ୍ଡ ଶୁଣାଇବା ପରେ ଓ୍ବାୟନାଡ୍ ଲୋକ ସଭା ଆସନରୁ ତାଙ୍କ ସଦସ୍ୟତାକୁ ରଦ୍ଦ କରିଦିଆଯାଇଛି। ଏହା ଉପରେ ଆବେଦନକାରୀ ଆଭା ମୁରଲୀଧରନ୍ ପ୍ରଶ୍ନ ଉଠାଇଛନ୍ତି। ଲୋକ ପ୍ରତିନିଧି ଆଇନ, ୧୯୫୧ର ଧାରା ୮(୩)ରେ ସ୍ବତଃ ସଭ୍ୟପଦ ରଦ୍ଦ ମନମାନି ଓ ବେଆଇନ ହୋଇଥିବାରୁ ଏହାକୁ ସମ୍ବିଧାନ ଅଧିକାର ବାହାରେ ବୋଲି ଘୋଷଣା କରିବାକୁ ମୁରଲୀଧରନ ପିଟିଶନରେ ଦାବି କରିଛନ୍ତି। ନିର୍ବାଚନ ମଣ୍ଡଳୀର ଭୋଟରଙ୍କ ଦ୍ୱାରା ନିର୍ବାଚିତ ଜନପ୍ରତିନିଧିଙ୍କ ସଦସ୍ୟତା ରଦ୍ଦ କରାଯିବା ଦ୍ୱାରା ତାଙ୍କ ଉପରେ ଜନସାଧାରଣ ନ୍ୟସ୍ତ କରିଥିବା ଦାୟିତ୍ୱ ନିର୍ବାହ କରିବାରୁ ସେ ବଞ୍ଚତ୍ତ ହୋଇଥାନ୍ତି। ଏହା ଗଣତାନ୍ତ୍ରିକ ନୀତିର ପରିପନ୍ଥୀ ବୋଲି ମୁରଲୀଧରନ କହିଛନ୍ତି। ଅପରାଧକୁ ବିଚାରକୁ ନିଆ ନ ଯାଇ ସଦସ୍ୟତା ସ୍ବତଃ ରଦ୍ଦ କରିଦିଆଯିବା, ସ୍ବାଭାବିକ ନ୍ୟାୟ ବିରୁଦ୍ଧ। ଅନେକ ସମୟରେ ତଳ କୋର୍ଟଙ୍କ ରାୟ ଉଚ୍ଚତର କୋର୍ଟରେ ବଦଳିଯାଇଥାଏ। ଏଭଳି ସ୍ଥିତିରେ ଯେଉଁ ଜନପ୍ରତିନିଧି ଜନସାଧାରଣଙ୍କ ପାଇଁ କାର୍ଯ୍ୟ କରିବା ଲାଗି ଜନାଦେଶ ପାଇଥିଲେ, ତାଙ୍କର ମୂଲ୍ୟବାନ ସମୟକୁ ବ୍ୟର୍ଥ କରାଯାଇପାରିବ କି ବୋଲି ପିଟିଶନରେ ପ୍ରଶ୍ନ କରାଯାଇଛି। ଆଇନଜୀବୀ ଦୀପକ ପ୍ରକାଶଙ୍କ ଜରିଆରେ ମୁରଲୀଧରନ ଏହି ପିଟିଶନ ଦାଏର କରିଛନ୍ତି।
