ଭୁବନେଶ୍ୱର,୨୬।୩(ବ୍ୟୁରୋ): ଧର୍ମାନ୍ତରିତ ବ୍ୟକ୍ତିମାନଙ୍କୁ ଅନୁସୂଚିତ ଜନଜାତିରୁ ବାଦ୍ ଦେବା ଦାବିକୁ ଜୋର୍ଦାର କରିଛି ଜନଜାତି ସୁରକ୍ଷା ମଞ୍ଚ। ଏହାକୁ ନେଇ ଶନିବାର ମଞ୍ଚ ପକ୍ଷରୁ ରାଜଧାନୀ ଭୁବନେଶ୍ୱରରେ ବଡ଼ଧରଣର ଜନଜାତି ସମାବେଶର ଆୟୋଜନ କରାଯାଇଥିଲା। ଏଥିରେ ରାଜ୍ୟର ୨୬ ଜିଲାରୁ ୬୨ ସମ୍ପ୍ରଦାୟର ୧୦ହଜାରରୁ ଊର୍ଦ୍ଧ୍ୱ ଜନଜାତି ଭଉଣୀଭାଇ ଯୋଗଦେଇଥିଲେ। ଶହୀଦନଗର ଦୁର୍ଗାମଣ୍ଡପ, ନୟାପଲ୍ଲୀ ଓ ରାମମନ୍ଦିର ଛକ ନିକଟରୁ ୩ଟି ଶୋଭାଯାତ୍ରା ବାହାରି ସ୍ଥାନୀୟ ଜନତା ମୈଦାନରେ ପହଞ୍ଚତ୍ଥିଲା। କେନ୍ଦ୍ରମନ୍ତ୍ରୀ ବିଶ୍ୱେଶ୍ୱର ଟୁଡୁ ରୁପାଲି ଛକରେ ଏହି ଶୋଭାଯାତ୍ରାରେ ସାମିଲ ହୋଇ ଜନଜାତି ଭଉଣୀଭାଇଙ୍କ ସହ କିଛି ସମୟ ଆଲୋଚନା କରି କିଛି ବାଟ ପଦଯାତ୍ରାରେ ଯାଇଥିଲେ। ଏହି ସମାବେଶରେ ଜନଜାତି ସମ୍ପ୍ରଦାୟର ଲୋକେ ପାରମ୍ପରିକ ବେଶଭୂଷାରେ ଯୋଗ ଦେଇଥିଲେ। ଅନ୍ୟପଟେ ପାରମ୍ପରିକ ନୃତ୍ୟଗୀତ ସହ ବିଭିନ୍ନ ଦାବି ନେଇ ନାରାବାଜି କରିଥିଲେ। ନିଜର ଧର୍ମ ସଂସ୍କୃତିକୁ ରକ୍ଷା କରିବା ପାଇଁ ତଥା ଯେଉଁମାନେ ଧର୍ମାନ୍ତରିତ ହୋଇଯାଇଛନ୍ତି ସେମାନଙ୍କୁ ଜନଜାତି ସୂଚୀରୁ ଅଲଗା କରିବା ନେଇ ଆନ୍ଦୋଳନକୁ ଜାତୀୟସ୍ତର କରାଯିବ ବୋଲି ମଞ୍ଚର ସର୍ବବ୍ୟବସ୍ଥା ପ୍ରମୁଖ ପ୍ରକାଶ ବେତାଲା ଉଦ୍ବୋଧନ ଦେଇ କହିଛନ୍ତି। ମଞ୍ଚର ରାଷ୍ଟ୍ରୀୟ ସଂଯୋଜକ ଗଣେଶ ରାମଭଗତ, ସହ ସଂଯୋଜକ ଡ. ରାଜକିଶୋର ହାଁସଦା, ପବିତ୍ର କୁମାର କହଁର ପ୍ରମୁଖଙ୍କ ନେତୃତ୍ୱରେ ଏହି ସମାବେଶର ଆୟୋଜନ କରାଯାଇଥିଲା। ରାଜନୈତିକ ଦଳମାନେ ଅନୁସୂଚିତ ଜନଜାତିଙ୍କ ପାଇଁ ସଂରକ୍ଷିତ ଆସନରେ ଧର୍ମାନ୍ତରିତ ବ୍ୟକ୍ତିଙ୍କୁ ଟିକେଟ୍ ନ ଦେବା ପାଇଁ ମଞ୍ଚ ପକ୍ଷରୁ ଦାବି ହୋଇଛି। ସେହିପରି ସରକାରୀ ଚାକିରି ହାତେଇବାରେ ଏପରି ବ୍ୟକ୍ତିଙ୍କୁ ସଂରକ୍ଷଣ ସୁବିଧା ପ୍ରଦାନ ନ କରିବା ଦିଗରେ ଉଭୟ କେନ୍ଦ୍ର ଓ ରାଜ୍ୟ ସରକାର ଧ୍ୟାନ ଦେବା ପାଇଁ କୁହାଯାଇଛି। ଆଗାମୀ ଦିନରେ ମୁଖ୍ୟମନ୍ତ୍ରୀ ଓ ରାଜ୍ୟପାଳଙ୍କୁ ଭେଟି ମଞ୍ଚ ପକ୍ଷରୁ ଦାବିପତ୍ର ପ୍ରଦାନ କରାଯିବ ବୋଲି ସୂଚନା ମିଳିଛି।
