ନୂଆଦିଲ୍ଲୀ,୧।୫ : ସନରାଇଜର୍ସ ହାଇଦ୍ରାବାଦ (ଏସ୍ଆରଏଚ୍) ଶନିବାର ତା’ର ନେତୃତ୍ୱରେ ପରିବର୍ତ୍ତନ କରିଛି। ଡେଭିଡ୍ ଓ୍ବାର୍ନରଙ୍କୁ ଅଧିନାୟକ ପଦରୁ ହଟାଇ ଦିଆଯାଇଛି। ତାଙ୍କ ବଦଳରେ ନ୍ୟୁଜିଲାଣ୍ଡର କେନ ଓ୍ବିଲିୟମସନଙ୍କୁ ଦିଆଯାଇଛି ଏହି ଗୁରୁ ଦାୟିତ୍ୱ। ସେ ଚଳିତ ଆଇପିଏଲରେ ଦଳର ନେତୃତ୍ୱ ଭାର ସମ୍ଭାଳିବେ।
ଓ୍ବାର୍ନରଙ୍କ ନେତୃତ୍ୱରେ ଏସ୍ଆରଏଚ୍ ୬ଟି ମ୍ୟାଚ୍ ମଧ୍ୟରୁ ୫ଟି ପରାଜୟ ବରଣ କରିଛି। ଆଉ ଅଷ୍ଟ୍ରେଲିଆନ୍ ଓପନର ଭଲ ଫର୍ମରେ ମଧ୍ୟ ନାହାନ୍ତି।
ଅବଶିଷ୍ଟ ମ୍ୟାଚ୍ରେ ଓ୍ବିଲିୟମସନ ସନରାଇଜର୍ସ ହାଇଦ୍ରାବାଦ୍ ଦଳର ନେତୃତ୍ୱ ନେବେ। ରବିବାର ଖେଳାଯିବାକୁ ଥିବା ରାଜସ୍ଥାନ ରୟାଲ୍ସ ବିପକ୍ଷ ମ୍ୟାଚ୍ରେ ବିଦେଶୀ ଖେଳାଳିଙ୍କ କମ୍ବିନେଶନରେ ପରିବର୍ତ୍ତନ କରାଯିବ। ଏ ନେଇ ଟିମ୍ ମ୍ୟାନେଜମେଣ୍ଟ ନିଷ୍ପତ୍ତି ନେଇଛି ବୋଲି ଏସ୍ଆରଏଚ୍ ପକ୍ଷରୁ ଏକ ବିବୃତିରେ କୁହାଯାଇଛି। ଏହାର ଅର୍ଥ ଓ୍ବାର୍ନର ଚୂଡ଼ାନ୍ତ ଏକାଦଶରୁ ବାଦ୍ ପଡ଼ିପାରନ୍ତି।
