ନୂଆଦିଲ୍ଲୀ,୧୦।୭: ଭାରତୀୟ କ୍ରିକେଟ ଇତିହାସରେ ଅନେକ ଖେଳାଳି ଅଛନ୍ତି ଯେଉଁମାନେ ସେମାନଙ୍କର ସ୍ବତନ୍ତ୍ରତାକୁ ନେଇ ଜଣାଶୁଣା। ସେମାନଙ୍କ ମଧ୍ୟରୁ ଅଳ୍ପ କେତେଜଣଙ୍କୁ କିମ୍ବଦନ୍ତୀ ବା ମହାନ ଖେଳାଳି ଆଖ୍ୟା ମିଳିଛି। ଏଥିମଧ୍ୟରୁ ପୂର୍ବତନ ଭାରତୀୟ ଓପନର ତଥା ଅଧୀନାୟକ ସୁନୀଲ ଗାଭାସ୍କର ଅନ୍ୟତମ। ସନି ଏବଂ ଲିଟିଲ୍ ମାଷ୍ଟର ନାମରେ ଜଣାଶୁଣା ଏହି ମହାନ ବ୍ୟାଟ୍ସମ୍ୟାନ ସାରା ବିଶ୍ୱରେ ନିଜର ପ୍ରତିଭାକୁ ପ୍ରମାଣିତ କରିଛନ୍ତି। ଆଜି ସେ ନିଜର ୭୨ତମ ଜନ୍ମଦିନ ପାଳନ କରୁଛନ୍ତି।
୧୯୪୯ ଜୁଲାଇ ୧୦ରେ ସୁନୀଲ ମୁମ୍ବାଇରେ ଜନ୍ମଗ୍ରହଣ କରିଥିଲେ। ଯେତେବେଳେ ଗାଭାସ୍କର ଜନ୍ମ ହୋଇଥିଲେ, ତାଙ୍କୁ ଡାକ୍ତରଖାନାରେ ଜଣେ ମତ୍ସ୍ୟଜୀବୀଙ୍କ ପିଲାଙ୍କ ସହ ଅଦଳବଦଳ କରାଯାଇଥିଲା। ହେଲେ ଗାଭାସ୍କରଙ୍କ ମାମୁଁ ଏହା ଜାଣିପାରିଥିଲେ। କାନରେ ଥିବା ଜନ୍ମ ଚିହ୍ନ ଦେଖି ପିଲା ବଦଳ ହୋଇଥିବା ନେଇ ସେ ଅନ୍ୟମାନଙ୍କୁ କହିଥିଲେ। ଶେଷରେ ତାଙ୍କୁ ଗାଭାସ୍କରଙ୍କୁ ଚିହ୍ନିବା ସହଜ ହୋଇଥିଲେ। ମାତ୍ର ଯଦି ଉକ୍ତ ଦିନ ସେ ବଦଳ ହୋଇଯାଇଥାନ୍ତେ ବୋଧହୁଏ ପଶ୍ଚିମ ଉପକୂଳରେ ମତ୍ସ୍ୟଚାଷୀ ଭାବେ ବଡ଼ ହୋଇଥାନ୍ତେ ବୋଲି ଗାଭାସ୍କର କହିଥିଲେ।
ଉଚ୍ଚତା ଛୋଟ ହୋଇଥିଲେ ହେଁ ଏହି ମହାନ ଖେଳାଳି ୧୯୭୧ ମାର୍ଚ୍ଚରେ ଓ୍ବେଷ୍ଟଇଣ୍ଡିଜ୍ ବିପକ୍ଷରେ ଦେଶ ପାଇଁ ଖେଳିବାର ସୁଯୋଗ ପାଇଥିଲେ। ନଖ ସଂକ୍ରମଣ ଯୋଗୁ ସେ ଉକ୍ତ ଟେଷ୍ଟରେ ଖେଳିବାର ସୁଯୋଗ ପାଇ ନ ଥିଲେ। ହେଲେ ଦ୍ୱିତୀୟ ଟେଷ୍ଟରେ ସେ ମଇଦାନକୁ ଓହ୍ଲାଇ ୬୫ ଓ ୬୭ ରନ୍ର ଦୁଇଟି ଇନିଂସ ଖେଳିଥିଲେ। ସୁନିଲଙ୍କ ରନ୍ ଯୋଗୁ ଭାରତ ସେମାନଙ୍କ ଟେଷ୍ଟ ଇତିହାସରେ ପ୍ରଥମ ଥର ପାଇଁ ଓ୍ବେଷ୍ଟଇଣ୍ଡିଜ ଦଳକୁ ପରାସ୍ତ କରିଥିଲା। ଏହିଭଳି ଭାବେ ସୁନିଲଙ୍କ ପାଇଁ ପ୍ରଥମ ମ୍ୟାଚ୍ ବେଶ ଖାସ୍ ପାଲଟିଥିଲା।
ବ୍ୟକ୍ତିଗତ ଜୀବନକୁ ଦେଖିଲେ କାନପୁରର ଚମଡ଼ା ବ୍ୟବସାୟୀଙ୍କ ଝିଅ ମାର୍ଶନିଲଙ୍କୁ ବିବାହ କରିଛନ୍ତି। ତାଙ୍କର ପୁଅ ମଧ୍ୟ ଭାରତ ପାଇଁ ଖେଳିଥିଲେ। ଗାଭାସ୍କରଙ୍କ ପୁଅ ରୋହନ ଗାଭାସ୍କର ଭାରତ ପାଇଁ ୧୧ ଓଡିଆଇ ଖେଳିଥିଲେ ମଧ୍ୟ ସେ ତାଙ୍କ ପିତାଙ୍କ ଭଳି ଚମକି ପାରି ନ ଥିଲେ। ଦଳରେ ଅଧିକ ସମୟ ରହି ନ ପାରିବା ଯୋଗୁ ସେ କ୍ରିକେଟ କମେଣ୍ଟ୍ରିରେ କ୍ୟାରିୟର କରିଥିଲେ।
