ନୂଆଦିଲ୍ଲୀ,୨୫।୧୦ : ମରିସସ, କାନାଡା, ଆମେରିକା, ଅଷ୍ଟ୍ରେଲିଆ ଏବଂ ବ୍ରିଟେନ ସମେତ ବିଶ୍ୱର ବହୁ ଦେଶରେ ମୂଳ ଭାରତୀୟ ଲୋକମାନେ ନିଜର ପଦଚିହ୍ନ ଛାଡିଛନ୍ତି। କମଲା ହାରିସ ଆମେରିକାର ଉପରାଷ୍ଟ୍ରପତି ହୋଇଥିବାବେଳେ ମରିସସର ଶାସନ ମଧ୍ୟ ଅନେକ ଥର ମୂଳ ଭାରତୀୟଙ୍କ ହାତକୁ ଆସିଛିି। ଏହି ପର୍ଯ୍ୟାୟରେ, ବର୍ତ୍ତମାନ ମୂଳ ଭାରତୀୟ ଋଷି ସୁନକ ବ୍ରିଟେନରେ ପ୍ରଧାନମନ୍ତ୍ରୀ ହୋଇଛନ୍ତି। ଏବେ ଏହା ଚର୍ଚ୍ଚାର ବିଷୟ ପାଲଟିଛି।
ବ୍ରିଟେନରେ ପ୍ରଥମ ଥର ପାଇଁ କ୍ଷମତା ଭାର ମୂଳ ଦକ୍ଷିଣ ଏସୀୟ ଗ୍ରହଣ କରିଛନ୍ତି। ଋଷି ସୁନକଙ୍କ ପୂର୍ବଜମାନେ ପଞ୍ଜାବର ଗୁଞ୍ଜରାୱାଲାର ବାସିନ୍ଦା ଥିଲେ। ସେମାନେ ସେଠାରେ ଜନ୍ମଗ୍ରହଣ କରିଥିଲେ। ଏହା ଅବିଭକ୍ତ ଭାରତରେ ଥିଲା। ତେବେ ବର୍ତ୍ତମାନ ଏହା ପାକିସ୍ତାନରେ ରହିଛି। ଏହି କାରଣରୁ ଭାରତ ସହିତ ଋଷି ସୁନକଙ୍କୁ ନେଇ ପାକିସ୍ତାନରେ ମଧ୍ୟ ଆଲୋଚନା ହେଉଛି।
୧୯୩୫ ମସିହାରେ ଭାରତ ପାକିସ୍ତାନ ବିଭାଜନ ପୂର୍ବରୁ ଋଷିଙ୍କ ଜେଜେବାପା ରାମଦାସ ସୁନକ ଗୁଞ୍ଜରାୱାଲା ଛାଡି ନାଇରୋବିରେ କିରାଣୀ ଭାବରେ କାମ କରିବାକୁ ଯାଇଥିଲେ। ତାଙ୍କ ସ୍ତ୍ରୀ ସୁହାଗ ରାନୀ ସୁନକ ୧୯୩୭ ମସିହାରେ କେନିଆ ଯିବା ପୂର୍ବରୁ ତାଙ୍କ ଶାଶୁଙ୍କ ସହିତ ଗୁଞ୍ଜରାୱାଲା ଠାରୁ ଦିଲ୍ଲୀ ଯାଇଥିଲେ।
ରାମଦାସ ଏବଂ ସୁହାଗ ରାନୀଙ୍କର ୬ ଜଣ ସନ୍ତାନ ଥିଲେ। ସେମାନଙ୍କ ମଧ୍ୟରେ ତିନି ପୁଅ ଏବଂ ତିନି ଝିଅ ଥିଲେ। ଋଷିଙ୍କ ପିତା ଯଶବୀର ସୁନକ ୧୯୪୯ ମସିହାରେ ନାଇରୋବିରେ ଜନ୍ମଗ୍ରହଣ କରିଥିଲେ। ଯଶବୀର ୧୯୬୬ ମସିହାରେ ଲିଭରପୁଲରେ ପହଞ୍ଚିଥିଲେ। ସେ ଲିଭରପୁଲ ବିଶ୍ୱବିଦ୍ୟାଳୟରେ ମେଡିସିନ ଅଧ୍ୟୟନ କରିବାକୁ ଯାଇଥିଲେ। ଯଶବୀର ୧୯୭୭ରେ ଲିସେଷ୍ଟରରେ ଉଷାଙ୍କୁ ବିବାହ କରିଥିଲେ। ସେମାନଙ୍କ ବିବାହର ୩ ବର୍ଷ ପରେ ଋଷି ୧୯୮୦ ରେ ସାଉଥମ୍ପଟନରେ ଜନ୍ମଗ୍ରହଣ କରିଥିଲେ।
