ସାଖିର,୩।୧୨(ଏପି): ଫର୍ମୁଲା-୧ କିମ୍ବଦନ୍ତୀ ମାଇକେଲ ସୁମାକରଙ୍କ ପୁଅ ମିକ୍ ସୁମାକର ଆଗାମୀ ସେସନ୍ରେ ଫର୍ମୁଲା-୧ରେ ପଦାର୍ପଣ କରିବେ। ସେ ହାସ୍ ଟିମ ତରଫରୁ ପ୍ରତିନିଧିତ୍ୱ କରିବେ। ୨୦୧୨ ସେସନ ପରେ ୭ଥର ବିଶ୍ୱଚାମ୍ପିୟନଶିପ୍ ହାସଲ କରିଥିବା ସୁମାକର ଫର୍ମୁଲା-୧ରୁ ଅବସର ନେଇଥିଲେ। ତେବେ ତାଙ୍କ ପୁଅ ଏବେ ଏଥିରେ ପଦାର୍ପଣ କରିବାକୁ ଯାଉଛନ୍ତି। ୨୧ ମିକ୍ଙ୍କ ସହ ଏ ନେଇ ଚୁକ୍ତି ହୋଇଛି ଓ ସେ ଚୁକ୍ତି ପତ୍ରରେ ସ୍ବାକ୍ଷର କରିଛନ୍ତି ବୋଲି ହାସ୍ ତରଫରୁ କୁହାଯାଇଛି।
ଫର୍ମୁଲା-୨ରୁ ମିକ୍ ଫର୍ମୁଲା-୧ରେ ପ୍ରବେଶ କରିବାକୁ ଯାଉଛନ୍ତି। ଆଉ ଗୋଟିଏ ରାଉଣ୍ଡ ବାକି ଥିବା ବେଳେ ସେ ବହାରିନ୍ ଇଣ୍ଟରନ୍ୟାଶନାଲ ସିର୍କିଟ୍ ଫର୍ମୁଲା-୨ରେ ସେ ତାଲିକାର ଶୀର୍ଷରେ ରହିଥିଲେ। ସେ ମଧ୍ୟ ଫେରାରି ଡ୍ରାଇଭର ଡେଭଲପ୍ମେଣ୍ଟ ପ୍ରୋଗ୍ରାମର ଅଂଶବିଶେଷ ଥିଲେ। ରୁଷୀୟ ଡ୍ରାଇଭର ନିକିତା ମାଜପିନ୍ ମିକ୍ଙ୍କ ପାର୍ଟନର ରହିବେ। ଫେରାରି ଡ୍ରାଇଭର ଏକାଡେମୀରେ ସାମିଲ ରହିଥିବା ମିକ୍ ନିଜର ପ୍ରଥମ ଏଫ୍-୨ ରେସ୍ରେ ବିଜୟୀ ହୋଇଥିଲେ। ସେ ମଧ୍ୟ ଇଟାଲିଆନ ଗ୍ରାଁପ୍ରିରେ ଏଫ୍-୨ ରେସ୍ ଜିତିଥିଲେ। ମୋ ଉପରେ ଭରସା ରଖିଥିବାରୁ ହାସ୍କୁ କୃତଜ୍ଞତା ଜଣାଉଛି ବୋଲି ସେ କହିନ୍ତନ୍ତି। ମାତାପିତାଙ୍କ ଆଶୀର୍ବାଦରୁ ଆଗକୁ ବଢିବାକୁ ଚାହୁଛି। ତେବେ ସେ କେତେ ସଫଳ ରହୁଛନ୍ତି ତାହା ସମୟ କହିବ।
