ଚଣ୍ଡିଗଡ଼,୨।୧୦: ପଞ୍ଜାବର ଭୁଲଥା ବିଧାନସଭାର ବିଧାୟକ ସୁଖପାଲ ସିଂ ଖଇରା ଗିରଫ ହେବା ପରେ କଂଗ୍ରେସ ଏବଂ ଆମ ଆଦମୀ ପାର୍ଟି (ଏଏପି) ମଧ୍ୟରେ କଳହ ଲାଗି ରହିଛି। ଏହି ସମୟରେ ପଞ୍ଜାବର ରାଜ୍ୟପାଳ ବନୱାରିଲାଲ ପୁରୋହିତ ମଧ୍ୟ ଏହି ପ୍ରସଙ୍ଗରେ ଏଣ୍ଟ୍ରି କରିଛନ୍ତି। ପଞ୍ଜାବ ଡିଜିପି ଗୌରବ ଯାଦବଙ୍କୁ ସୁଖପାଲ ସିଂ ଖେରାଙ୍କ ଗିରଫଦାରୀ ସମ୍ପର୍କରେ ସୂଚନା ମାଗି ରାଜ୍ୟପାଳ ଏକ ଚିଠି ଲେଖିଛନ୍ତି। ଗତ ଗୁରୁବାର ଖଇରାଙ୍କୁ ତାଙ୍କ ଚଣ୍ଡିଗଡ଼ ବାସଭବନରୁ ପଞ୍ଜାବ ପୋଲିସ ଗିରଫ କରିଥିଲା।
ସୂଚନାଯୋଗ୍ୟ ଯେ ବିଧାୟକ ସୁଖପାଲ ସିଂ ଖଇରା ଗିରଫ ହେବା ପରେ ପଞ୍ଜାବ କଂଗ୍ରେସର ବରିଷ୍ଠ ନେତାଙ୍କ ଏକ ପ୍ରତିନିଧୀ ରାଜ୍ୟପାଳ ବନୱାରୀ ଲାଲ ପୁରୋହିତଙ୍କୁ ଭେଟିଥିଲେ। କଂଗ୍ରେସ ନେତାମାନେ ଖଇରାଙ୍କ ଗିରଫକୁ ରାଜନୈତିକ ପ୍ରତିଶୋଧ ବୋଲି କହି ରାଜ୍ୟପାଳଙ୍କୁ ଏହି ଘଟଣାରେ ହସ୍ତକ୍ଷେପ କରିବାକୁ ଅନୁରୋଧ କରିଥିଲେ। ଏଥିସହ କଂଗ୍ରେସ ନେତାଙ୍କ ତରଫରୁ ରାଜ୍ୟପାଳଙ୍କୁ କୁହାଯାଇଛି ଯେ ବିଧାୟକ ସୁଖପାଲଙ୍କୁ ତାଙ୍କ ବାସଭବନରୁ ଭୁଲ ଭାବେ ଗିରଫ କରାଯାଇଛି। ତେବେ ତାଙ୍କୁ ଗିରଫ କରାଯାଇଥିବା ମାମଲାରେ ସୁପ୍ରିମକୋର୍ଟ ପୂର୍ବରୁ ରିଲିଫ ଦେଇଛନ୍ତି।
