ଇନ୍ଦୋର,୩୦।୧୦: ମଧ୍ୟପ୍ରଦେଶ ଇନ୍ଦୋରରେ ଦୁଇଜଣ ନାବାଳିକା ଆତ୍ମହତ୍ୟା କରିଥିବା ବେଳେ ସେମାନଙ୍କ ଜଣେ ସାଙ୍ଗ ହସ୍ପିଟାଲରେ ଚିକିତ୍ସିତ ହେଉଛନ୍ତି। ତିନି ଜଣ ଦ୍ୱାଦଶ ଶ୍ରେଣୀ ଛାତ୍ରୀ । ଶୁକ୍ରବାର ସକାଳେ ତିନି ଛାତ୍ରୀ ଘର ଲୋକଙ୍କୁ ନ ଜଣାଇ ଆସ୍ଥାରୁ ଇନ୍ଦୋର ଚାଲିଆସିଥିଲେ। ଚିକିତ୍ସାଧୀନ ଥିବା ଛାତ୍ରୀଙ୍କ ବୟାନରୁ ଜଣାପଡିଛି, ସମ୍ପୃକ୍ତ ଛାତ୍ରୀମାନଙ୍କ ମଧ୍ୟରୁ ଜଣେ ତାଙ୍କ ବଏଫ୍ରେଣ୍ଡଙ୍କୁ ଭେଟିବା ପାଇଁ ଇନ୍ଦୋର ଆସିଥିଲେ। ଛାତ୍ରୀ ଜଣଙ୍କ ପୁରୁଷ ବନ୍ଧୁ ଇନ୍ଦୋରରେ ରହୁଥିବାବେଳେ କିଛିଦିନ ହେବ ସେ ତାଙ୍କ ଫୋନ୍ କଲ୍ର ଉତ୍ତର ଦେଉ ନ ଥିଲେ। ଏହାକୁ କେନ୍ଦ୍ର କରି ସେ ତାଙ୍କ ଅନ୍ୟ ଦୁଇ ସାଙ୍ଗଙ୍କୁ ନେଇ ଇନ୍ଦୋର ଚାଲିଯାଇଥିଲେ। ଏକ ପାର୍କରେ ବସି ଛାତ୍ରୀ ଜଣକ ତାଙ୍କ ବଏଫ୍ରେଣ୍ଡଙ୍କୁ କଲ୍ କରିଥିଲେ ହେଁ ସେ ତା’ର ଜବାବ୍ ଦେଇ ନ ଥିଲେ। ଏହାପରେ ଛାତ୍ରୀ ଜଣକ ବିଷ ପିଇଦେଇଥିଲେ। ତାଙ୍କୁ ଦେଖି ଆଉ ଜଣେ ତାଙ୍କ ଘନିଷ୍ଠ ବାନ୍ଧବୀ ଘରେ ଅସୁବିଧା କଥା କହି ବିଷ ପିଇଦେଇଥିଲେ। ଦୁହିଁଙ୍କୁ ବିଷ ପିଇବାର ଦେଖି ଅନ୍ୟ ଜଣକ ମଧ୍ୟ ବିଷ ପିଇଥିବା ପୋଲିସ କହିଛି। ଚିକିତ୍ସାଧୀନ ଅବସ୍ଥାରେ ଦୁଇଜଣଙ୍କ ମୃତ୍ୟୁ ଘଟିଛି।
