ନୂଆଦିଲ୍ଲୀ,୨୬।୯: ନିର୍ବାଚନ ଆୟୋଗଙ୍କୁ ନେଇ ଚାଲିଥିବା ରାଜନୈତିକ ବିତର୍କ ମଧ୍ୟରେ, କଂଗ୍ରେସ ନେତା ପୱନ ଖେରା ପଶ୍ଚିମବଙ୍ଗ ଭାଜପା ସଭାପତି ସମିକ ଭଟ୍ଟାଚାର୍ଯ୍ୟଙ୍କ ଏକ ମନ୍ତବ୍ୟକୁ ନେଇ କଟାକ୍ଷ କରିଛନ୍ତି। ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ପ୍ରଶଂସା କରି ଭଟ୍ଟାଚାର୍ଯ୍ୟ କହିଥିଲେ ଯେ ସେ ଅନ୍ତତଃ ‘ପଦ୍ମ ଭୂଷଣ’ ପୁରସ୍କାର ପାଇବାକୁ ଯୋଗ୍ୟ। ଏହାର ଜବାବରେ ଖେରା ବ୍ୟଙ୍ଗାତ୍ମକ ଭାବେ କହିଥିଲେ ଯେ ‘ପଦ୍ମ ଭୂଷଣ’ ଏକ ସାମାନ୍ୟ ସମ୍ମାନ; ଏହା ପରିବର୍ତ୍ତେ ତାଙ୍କୁ ସିଧାସଳଖ ପ୍ରଧାନମନ୍ତ୍ରୀ କରିଦେବା ଉଚିତ।
ଶୁକ୍ରବାର ଉତ୍ତର ୨୪ ପ୍ରଗଣାର ପାନିହାଟି ଠାରେ ସାମ୍ବାଦିକମାନଙ୍କ ସହ କଥାବାର୍ତ୍ତା ବେଳେ ସମିକ ଭଟ୍ଟାଚାର୍ଯ୍ୟ ଜ୍ଞାନେଶ କୁମାରଙ୍କ ପ୍ରଶଂସା କରିଥିଲେ। ସେ କହିଥିଲେ ଯେ ମୁଖ୍ୟ ନିର୍ବାଚନ କମିଶନରଙ୍କୁ ଅନ୍ତତଃ ‘ପଦ୍ମ ଭୂଷଣ’ ସମ୍ମାନରେ ସମ୍ମାନିତ କରାଯିବା ଉଚିତ। ଭଟ୍ଟାଚାର୍ଯ୍ୟ ଦାବି କରିଥିଲେ ଯେ ପଶ୍ଚିମବଙ୍ଗର ସାମ୍ପ୍ରତିକ ବିଧାନସଭା ନିର୍ବାଚନ ସମୟରେ ଲୋକମାନେ ଶେଷରେ ଭୟମୁକ୍ତ ହୋଇ ଭୋଟ ଦେବାର ସୁଯୋଗ ପାଇଥିଲେ ଏବଂ ନିର୍ବାଚନ ପ୍ରକ୍ରିୟା ସମୟରେ ହତ୍ୟାକାଣ୍ଡ ଭଳି କୌଣସି ଘଟଣା ଘଟିନଥିଲା। ସେ ଏହି ସଫଳତାର ଶ୍ରେୟ ଜ୍ଞାନେଶ କୁମାରଙ୍କ ନେତୃତ୍ୱରେ ନିର୍ବାଚନ ଆୟୋଗଙ୍କ କାର୍ଯ୍ୟଶୈଳୀକୁ ଦେଇଥିଲେ। ଭାଜପା ନେତା ଆହୁରି ମଧ୍ୟ ଦାବି କରିଥିଲେ ଯେ ଭୋଟର ତାଲିକା ସଂଶୋଧନ ସମୟରେ ନିର୍ବାଚନ ଆୟୋଗ ବେଆଇନ ବାଂଲାଦେଶୀ ଅନୁପ୍ରବେଶକାରୀଙ୍କ ନାମ ହଟାଇବା ପାଇଁ କାର୍ଯ୍ୟ କରିଥିଲେ।
SIR (ଏସଆଇଆର) କୁ ନେଇ ଚାଲିଥିବା ବିବାଦ ମଧ୍ୟରେ, ‘ଦ ଇଣ୍ଡିଆନ ଏକ୍ସପ୍ରେସ’ର ଏକ ଅନୁସନ୍ଧାନମୂଳକ ରିପୋର୍ଟ ଦାବି କରିଛି ଯେ ନିର୍ବାଚନ କମିଶନର ସୁଖବୀର ସିଂହ ସନ୍ଧୁ ଏବଂ ବିବେକ ଯୋଶୀ ଗତ ୧୦ ମାସ ମଧ୍ୟରେ ନିର୍ବାଚନ ଆୟୋଗର କିଛି ନିଷ୍ପତ୍ତି ଓ ପ୍ରକ୍ରିୟାକୁ ନେଇ ଅତିକମରେ ୧୪ ଥର ଲିଖିତ ଆପତ୍ତି ଜଣାଇଛନ୍ତି। ରିପୋର୍ଟ ଅନୁଯାୟୀ, ଏହି ଆପତ୍ତିଗୁଡ଼ିକ ନୂତନ ଭୋଟରଙ୍କ ପଞ୍ଜୀକରଣ, ଭୋଟର ତାଲିକାରୁ ନାମ ବାଦ ଦେବା ଏବଂ ନିର୍ବାଚନୀ ତଥ୍ୟ ସମ୍ବନ୍ଧୀୟ ବୈଷୟିକ ବ୍ୟବସ୍ଥା ଭଳି ବିଷୟ ଉପରେ ଆଧାରିତ ଥିଲା। ଉଭୟ ନିର୍ବାଚନ କମିଶନର ‘ଫର୍ମ-୬’ରେ କରାଯାଇଥିବା ଏକ ପରିବର୍ତ୍ତନ ଉପରେ ମଧ୍ୟ ଆପତ୍ତି ଉଠାଇଥିଲେ।
ଭୋଟର ତାଲିକାରେ ନିଜ ନାମ ଅନ୍ତର୍ଭୁକ୍ତ କରିବା ପାଇଁ ନୂତନ ଭୋଟରମାନେ ‘ଫର୍ମ-୬’ ବ୍ୟବହାର କରିଥାନ୍ତି। ‘ଦ ଇଣ୍ଡିଆନ ଏକ୍ସପ୍ରେସ’ ରିପୋର୍ଟ ଅନୁଯାୟୀ, ଜୁଲାଇ ୨୦୨୬ରେ ଏହି ଫର୍ମର ଅନଲାଇନ ସଂସ୍କରଣରେ SIR ସମ୍ବନ୍ଧୀୟ ଏକ ନୂତନ ଘୋଷଣାନାମା ଦେଖିବାକୁ ମିଳିଥିଲା। ଏଥିରେ ଆବେଦନକାରୀଙ୍କୁ ପଚରାଯାଇଥିଲା ଯେ ସେମାନଙ୍କର ନାମକିମ୍ବା ସେମାନଙ୍କ ମାତାପିତା କିମ୍ବା ଜେଜେବାପା-ଜେଜେମା/ନାନା-ନାନୀଙ୍କ ନାମପୂର୍ବବର୍ତ୍ତୀ SIR ଭୋଟର ତାଲିକାରେ ଥିଲା କି ନାହିଁ। ରିପୋର୍ଟରେ ଉଲ୍ଲେଖ କରାଯାଇଛି ଯେ ଯଦିଓ ଏହି ବିଭାଗଟିକୁ ବାଧ୍ୟତାମୂଳକ ଭାବେ ଚିହ୍ନିତ କରାଯାଇନଥିଲା, ତଥାପି ଏହି ପ୍ରଶ୍ନର ଉତ୍ତର ନ ଦେଲେ ଅନଲାଇନ ଆବେଦନ ପ୍ରକ୍ରିୟା ଆଗକୁ ବଢ଼ିପାରୁ ନଥିଲା। ନିର୍ବାଚନ କମିଶନର ବିବେକ ଯୋଶୀ ଏବଂ ସୁଖବୀର ସିଂହ ସାନ୍ଧୁ ଏହି ପରିବର୍ତ୍ତନ ଉପରେ ଆପତ୍ତି ଜଣାଇଥିଲେ ଏବଂ ଏହାକୁ ହଟାଇବାକୁ ଦାବି କରିଥିଲେ।
