ଭୁବନେଶ୍ୱର,୧୨।୮(ସତ୍ୟଜିତ୍ ରାଉତ): ଭୁବନେଶ୍ୱର ଲକ୍ଷ୍ମୀସାଗର ଥାନା ଅନ୍ତର୍ଗତ କଟକ ରୋଡ୍ସ୍ଥିତ ଦୀପାଳି ହୋଟେଲ ଆଣ୍ଡ୍ ବାର୍ରେ ଯୁକ୍ତ୨ ଛାତ୍ରୀ ଭଦ୍ରକର ଶୁଭଲକ୍ଷ୍ମୀ ସାହୁ (୧୮)ଙ୍କ ଆତ୍ମହତ୍ୟା ଘଟଣାକୁ ଶୁକ୍ରବାର ସପ୍ତାହେ ପୂରିଛି। ହେଲେ ଶୁଭଲକ୍ଷ୍ମୀ କେଉଁ କାରଣରୁ ଏଭଳି ଚରମ ନିଷ୍ପତ୍ତି ନେବାକୁ ବାଧ୍ୟ ହେଲେ ତାହା ଏବେ ରହସ୍ୟ ଘେରରେ ରହିଛି। ସେପଟେ ଶୁଭଲକ୍ଷ୍ମୀ ଏମ୍ଏମ୍ଏମ୍ଏସ୍ ପାଇଁ ଆତ୍ମହତ୍ୟା କରିଥିବା ଚର୍ଚ୍ଚା ହେଉଛି। ପୋଲିସ ବିଭିନ୍ନ ଦିଗକୁ ନେଇ ତଦନ୍ତ କରି ଆତ୍ମହତ୍ୟାର ପ୍ରକୃତ କାରଣ ଖୋଜିବାକୁ ପ୍ରୟାସ ଜାରି ରଖିଛି। ଏଭଳିସ୍ଥିତିରେ ଭୁବନେଶ୍ୱର ଡିସିପି ପ୍ରତୀକ ସିଂ କହିଛନ୍ତି, ବ୍ୟବଚ୍ଛେଦ ରିପୋର୍ଟ ଓ ପ୍ରାଥମିକ ତଦନ୍ତରୁ ଶୁଭଲକ୍ଷ୍ମୀ ଆତ୍ମହତ୍ୟା କରିଥିବା ସ୍ପଷ୍ଟ ହୋଇଛି। ତେବେ ସେ କେଉଁ ପରିସ୍ଥିତିରେ ଏଭଳି ନିଷ୍ପତ୍ତି ନେଲେ ଏବଂ ଏଥିପାଇଁ ଦାୟୀ କିଏ ଏନେଇ ତଦନ୍ତ ଚାଲୁରହିଛି। କୌଣସି ଭାଇରାଲ୍ ଭିଡିଓ ଏପର୍ଯ୍ୟନ୍ତ ଆମେ ପାଇନାହୁଁ। ଯଦି ସେଭଳି କିଛି ଭିଡିଓ ମିଳେ, ତେବେ ଆତ୍ମହତ୍ୟା ସହ ଏହାର କିଛି ଲିଙ୍କ୍ ଅଛି କି ନାହିଁ ସେ ନେଇ ତଦନ୍ତ କରାଯିବ ବୋଲି ଡିସିପି ସିଂ କହିଛନ୍ତି। ଅପରପକ୍ଷରେ ପୋଲିସ ଶୁଭଲକ୍ଷ୍ମୀଙ୍କ ପୁରୁଷ ବନ୍ଧୁ ଅନିଲ ଓ ପୂର୍ବତନ ପୁରୁଷବନ୍ଧୁ ସଞ୍ଜୟଙ୍କୁ ଜେରା କରି ବହୁ ତଥ୍ୟ ପାଇଛି। ମିଳିଥିବା ସୂଚନା ଅନୁଯାୟୀ, ଶୁଭଲକ୍ଷ୍ମୀ କିଛି ମାସ ପୂର୍ବରୁ ସଞ୍ଜୟଙ୍କ ସହ ସମ୍ପର୍କ ତୁଟାଇ ଅନିଲଙ୍କ ସହ ଯୋଡ଼ି ହେବା ପରେ ଘଟଣା ଭିନ୍ନ ମୋଡ଼ ନେଇଥିଲା। ସଞ୍ଜୟ ଓ ଶୁଭଲକ୍ଷ୍ମୀଙ୍କ ସମ୍ପର୍କରେ ଅଧିକ ତିକ୍ତତା ସୃଷ୍ଟି ହୋଇଥିଲା। ଏହି ଝଗଡ଼ା ପାଇଁ ଶୁଭଲକ୍ଷ୍ମୀ ଏଭଳି ଚରମ ନିଷ୍ପତ୍ତି ନେଲେ ବୋଲି ସୂଚନା ମିଳିଛି। ଏପଟେ ପୋଲିସ ପୁରୁଷବନ୍ଧୁ ଅନିଲଙ୍କ ମୋବାଇଲ ଜବତ କରି ତାହାକୁ ଅଧିକ ଯାଞ୍ଚ ଚଳାଇଛି। ଶୁଭଲକ୍ଷ୍ମୀଙ୍କ ଆତ୍ମହତ୍ୟା ପଛରେ ଅନିଲଙ୍କ ପାଖରେ ଅନେକ ତଥ୍ୟ ଥିବାରୁ ପୋଲିସ ଏଥିରୁ ଗୁମର ଖୋଲିବା ପାଇଁ ପ୍ରୟାସ ଜାରି ରଖିଛି।
ସୂଚନାଯୋଗ୍ୟ, ଶୁଭଲକ୍ଷ୍ମୀ ଶୁକ୍ରବାର ବିଳମ୍ବିତ ରାତିରେ ଉକ୍ତ ହୋଟେଲକୁ ଆସି ଦ୍ୱିତୀୟ ମହଲାରେ ଥିବା ୨୦୫ ନମ୍ବର ରୁମ୍ରେ ରହିଥିଲେ। ହେଲେ ଶନିବାର କବାଟ ନ ଖୋଲିବାରୁ ହୋଟେଲ କର୍ମଚାରୀଙ୍କ ସନ୍ଦେହ ହୋଇଥିଲା। ହୋଟେଲ ପକ୍ଷରୁ ଉକ୍ତ କବାଟ ଭଙ୍ଗାଯିବା ପରେ ଶୁଭଲକ୍ଷ୍ମୀ ଓଢଣି ଦ୍ୱାରା ଫ୍ୟାନ୍ରେ ଝୁଲୁଥିବା ଦେଖିବାକୁ ମିଳିଥିଲା ବୋଲି ପୋଲିସକୁ କୁହାଯାଇଥିଲା।
