ଶ୍ରୀନଗର,୧୭।୨ : ଦକ୍ଷିଣ କଶ୍ମୀରର ଅନନ୍ତନାଗ ଜିଲାରେ ପ୍ରସିଦ୍ଧ ପାହାଡି ନଦୀର ନାଳ ବ୍ରେଙ୍ଗୀରେ ହଠାତ୍ ଭୂସ୍ଖଳନ ହେତୁ ଏକ ଗଭୀର ସିଙ୍କହୋଲ ସୃଷ୍ଟି ହୋଇଥିଲା। ଫଳରେ ନଦୀ ଜଳ ଏହି ଗଭୀର ସିଙ୍କହୋଲରେ ପଡ଼ିବା ଆରମ୍ଭ କଲା। ଏହି ଗଭୀର ସିଙ୍କହୋଲ୍ରେ ପଡ଼ି ପାହାଡ଼ି ନଦୀର ନାଳରେ ଥିବା ଜଳ ୫୦୦ମିଟର ଦୂରତା ପର୍ଯ୍ୟନ୍ତ ଉଭେଇ ଯାଇଥିଲା। ବହୁ ସଂଖ୍ୟକ ଟ୍ରାଉଟ ମାଛ ଶୁଖିଲାରେ ପଡ଼ି ଛଟପଟ ହେଉଥିବାରୁ ଦେଖିବାକୁ ମିଳିଥିଲା। ଏହି ଅନନ୍ୟ ପ୍ରାକୃତିକ ଘଟଣା ନେଇ ସ୍ଥାନୀୟ ଲୋକଙ୍କ ମଧ୍ୟରେ ଆତଙ୍କ ସୃଷ୍ଟି ହୋଇଛି ।
ନାଳ ଶୁଖିଯିବା ପରେ ସ୍ଥାନୀୟ ଲୋକ ପରିସ୍ଥିତିର ଅନୁଧ୍ୟାନ କରିବା ସହ ମାଛର ସୁରକ୍ଷା ପାଇଁ ଜିଲା ଅଧିକାରୀଙ୍କୁ କହିଥିଲେ। ସ୍ଥାନୀୟ ଲୋକମାନେ ଭୟ କରୁଛନ୍ତି ଯେ ଯଦି ଜମିର ସବସିଡେନ୍ସ ଦ୍ୱାରା ସୃଷ୍ଟି ହୋଇଥିବା ସିଙ୍କହୋଲର ଆକାର ବଡ଼ ହୋଇଯାଏ, ତେବେ ଡ୍ରେନରେ ଜଳ ପ୍ରବାହ ସମ୍ପୂର୍ଣ୍ଣ ବନ୍ଦ ହୋଇପାରେ। ଏହା କେବଳ ଟ୍ରାଉଟ ମାଛ ସାମ୍ନାରେ ଏକ ଅତ୍ୟାବଶ୍ୟକ ସଙ୍କଟ ସୃଷ୍ଟି କରିବ ନାହିଁ, ବରଂ ବହୁ ଅନ୍ୟାନ୍ୟ ସମସ୍ୟା ମଧ୍ୟ ଉପୁଜାଇବ। ସୂଚନାଯୋଗ୍ୟ ଯେ ବ୍ରେଙ୍ଗୀ ନାଳରେ କେବଳ ଟ୍ରାଉଟ ମାଛ ମିଳିଥାଏ। ଏଠାରେ ମାଛ ଧରିବା ଉପରେ ପ୍ରତିବନ୍ଧକ ଲଗାଯାଇଛି।
ପାଣି ଶୁଖିଯିବା ପରେ ସ୍ଥାନୀୟ ଲୋକମାନେ ଶୁଖିଲାରେ ପଡ଼ିଥିବା ଟ୍ରାଉଟ ମାଛ ସଂଗ୍ରହ କରିବା ଆରମ୍ଭ କରିଥିଲେ। ଅନନ୍ତନାଗ ଜିଲାର ମତ୍ସ୍ୟ ବିଭାଗ ବର୍ତ୍ତମାନ ଏହି ବିରଳ ଟ୍ରାଉଟ ମାଛଗୁଡ଼ିକର ସଂରକ୍ଷଣ କାର୍ଯ୍ୟରେ ନିୟୋଜିତ ରହିଛି। ମାଛଗୁଡ଼ିକୁ ଜଳ ଥିବା ସ୍ଥାନକୁ ଅଣାଯାଉଛି। ଏହା ସତ୍ତ୍ୱେ ବହୁ ସଂଖ୍ୟକ ଟ୍ରାଉଟ ମାଛ ମରି ଯାଇଥିବା ଆଶଙ୍କା କରାଯାଉଛି।
ବିଶେଷଜ୍ଞମାନେ କହିଛନ୍ତି ଯେ ଏହା ସମ୍ପୂର୍ଣ୍ଣ ପ୍ରାକୃତିକ ଘଟଣା। ଏହି କାରଣରୁ ଲୋକମାନେ ଭୟଭୀତ ହେବାର କୌଣସି ଆବଶ୍ୟକତା ନାହିଁ। ଭୂମି ତଳେ ଥିବା ଚୂନ ପଥରଗୁଡିକ ନଦୀ ଜଳରେ ମିଳେଇ ଗଲେ ଏଭଳିି ଗଭୀର ସିଙ୍କହୋଲ ସୃଷ୍ଟି ହୋଇଥାଏ। କିଛି ଲୋକ କହିଛନ୍ତି ଯେ ପ୍ରାୟ ୨୭ ବର୍ଷ ପୂର୍ବେ ଏହି ସ୍ଥାନରେ ମଧ୍ୟ ସମାନ ଘଟଣା ଘଟିଥିଲା।
