ବେମତେରା,୨୮।୭: ପେଟ୍ରୋଲ ଭରିବା ସମୟରେ କେତେକ ସାବଧାନି ଅବଲମ୍ବନ କରିବାକୁ ପଡ଼ିଥାଏ। ଟିକିଏ ବି ଅସର୍ତକତା ଦୁର୍ଘଟଣା ଘଟାଇପାରେ। କିଛି ଏଭଳି ଦୃଶ୍ୟ ଦେଖିବାକୁ ମିଳିଛି ଛତିଶଗଡ଼ ବେମତେରା ଜିଲାର ନଓ୍ବାଗଡ଼ର ଜୟସଓ୍ବାଲ ପେଟ୍ରୋଲ ପମ୍ପରେ। ଉକ୍ତ ପେଟ୍ରୋଲ ପମ୍ପରେ ଏକ ବଡ଼ ଦୁର୍ଘଟଣା ଘଟିବାରୁ ବର୍ତ୍ତିଯାଇଛି। ସୂଚନାଯୋଗ୍ୟ, ଜୟସଓ୍ବାଲ ପେଟ୍ରୋଲ ପମ୍ପକୁ ଜଣେ ବ୍ୟକ୍ତି ପେଟ୍ରୋଲ ଭରିବାକୁ ଆସିଥିଲେ। ପେଟ୍ରୋଲ ଭରୁଥିବା ସମୟରେ ହଠାତ୍ ଚାହୁଁ ଚାହୁଁ ନିଆଁ ଲାଗିଯାଇଥିଲା। ନିଆଁ ଲାଗିବା ଦେଖି ସେଠାରେ ଉପସ୍ଥିତ ଥିବା ସମସ୍ତ ବ୍ୟକ୍ତି ଅନ୍ୟତ୍ର ଦୌଡ଼ି ପଳାଇଥିଲେ।
ଏପରିକି ବାଇକ୍ ଉପରେ ବସିଥିବା ୨ ଜଣ ବ୍ୟକ୍ତି ଓ ପେଟ୍ରୋଲ ପମ୍ପ କର୍ମଚାରୀ ମଧ୍ୟ ସଙ୍ଗେ ସଙ୍ଗେ ସେଠାରୁ ଦୂରେଇ ଯାଇ ନିଜକୁ ସୁରକ୍ଷିତ ରଖିଥିଲେ। ଏହାପରେ ସଙ୍ଗେ ସଙ୍ଗେ ନିଆଁଲିଭା ଯନ୍ତ୍ର ସାହାଯ୍ୟରେ ଉକ୍ତ ନିଆଁକୁ ଆୟତ୍ତ କରାଯାଇଥିଲା। ଏହି ସମୟର ଦୃଶ୍ୟ ସିସିଟିଭିରେ ରେକର୍ଡ ହୋଇଥିବା ବେଳେ ଏବେ ଏହା ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। କୁହାଯାଉଛି, ପେଟ୍ରୋଲ ଭରିବା ସମୟରେ ଜଣେ ବ୍ୟକ୍ତିଙ୍କ ଫୋନ୍ ରିଙ୍ଗ୍ ହେବାରୁ ସେ ମୋବାଇଲ୍ କଥା ହେଉଥିବା ସମୟରେ ଏହି ଦୁର୍ଘଟଣା ଘଟିଥିଲା।
