ଭୁବନେଶ୍ୱର, ୩୦।୧୨(ଲାଲା ସୁନୀଲ କୁମାର ରଥ): ଗତ ୬ତାରିଖରେ ଓଡ଼ିଶା, ଝାଡ଼ଖଣ୍ଡ ଏବଂ ପଶ୍ଚିମବଙ୍ଗର ୧୦ଜିଲାର ପ୍ରାୟ ୩୦ଟି ସ୍ଥାନରେ ଦେଶୀ ମଦ ବ୍ୟବସାୟ ପ୍ରତିଷ୍ଠାନ ଉପରେ ଆୟକର(ଇନ୍କମ୍ ଟ୍ୟାକ୍ସ) ଚଢ଼ାଉ ହୋଇଥିଲା। ଏଥିରେ ବଲାଙ୍ଗୀର ଜିଲାର ସୁଦପଡ଼ା, ଟିଟିଲାଗଡ଼ ଏବଂ ସମ୍ବଲପୁର ଜିଲା କ୍ଷେତରାଜପୁରର ବିଭିନ୍ନ ମଦଭାଟି ଓ ମଦ ବ୍ୟବସାୟୀଙ୍କ ବାସଭବନ ରହିଥିଲା। ଚଢ଼ାଉ ସମୟରେ ଆଖି ଝଲସିବା ଭଳି ଟଙ୍କା ଜବତ ହୋଇଥିଲା। କେବଳ ସୁଦପଡ଼ାସ୍ଥିତ ବ୍ୟବସାୟିକ ପ୍ରତିଷ୍ଠାନରୁ ଆଲ୍ମିରା ଭର୍ତ୍ତି ଟଙ୍କାକୁ ୧୭୬ଟି ବ୍ୟାଗ୍ରେ ଭର୍ତ୍ତି କରି ବଲାଙ୍ଗୀର ଷ୍ଟେଟ ବ୍ୟାଙ୍କ ମୁଖ୍ୟ ଶାଖାରେ ଗଣତି କରିବାକୁ ୬ଦିନ ଲାଗିଯାଇଥିଲା। ହେଲେ ନା ଆୟକର ବିଭାଗ ଅଧିକାରୀ କିମ୍ବା ଷ୍ଟେଟ ବ୍ୟାଙ୍କ କର୍ମଚାରୀ କେହି ହେଲେ କେତେ ଟଙ୍କା ଜବତ ହେଲା ସେନେଇ ମୁହଁ ଖୋଲିଲେ ନାହିଁ। ସେତେବେଳେ ବିଭିନ୍ନ ଗଣମାଧ୍ୟମରେ ଅସମର୍ଥିତ ସୂତ୍ର ଦର୍ଶାଇ ବିଭିନ୍ନ ତାରିଖରେ ଭିନ୍ନ ଭିନ୍ନ ରାଶି ଜବତ ହୋଇଥିବା ପ୍ରକାଶ ପାଇଥିଲା। କେହି କେହି ୩୦୫ କୋଟି ଟଙ୍କା ଜବତ ହୋଇଥିବା କହିଥିବାବେଳେ କେହି ୩୫୦ କୋଟି ଏବଂ ଆଉ କେହି ୪୦୦ କୋଟି ଟଙ୍କା ଜବତ ହୋଇଥିବା ମଧ୍ୟ ପ୍ରକାଶ କରିଥିଲେ। ହେଲେ ବିଭାଗ ପକ୍ଷରୁ କୌଣସି ନିର୍ଦ୍ଦିଷ୍ଟ ସୂଚନା ଦିଆ ନ ଯିବାରୁ ସାଧାରଣ ଲୋକଙ୍କ ମଧ୍ୟରେ ସନ୍ଦେହ ବଢ଼ିବାରେ ଲାଗିଥିଲା। ପରବର୍ତ୍ତୀ ସମୟରେ ଗତ ୨୧ତାରିଖରେ ଆୟକର ବିଭାଗ ପକ୍ଷରୁ ଏକ ପ୍ରେସ୍ ରିଲିଜ୍ ଜାରି କରାଯାଇ ମୋଟ ୩୫୧କୋଟି ନଗଦ ଟଙ୍କା ଏବଂ ୨.୮କୋଟି ଟଙ୍କାର ଅଳଙ୍କାର ଜବତ କରାଯାଇଥିବାବେଳେ କେବଳ ସୁଦପଡ଼ା, ଟିଟିଲାଗଡ଼ ଏବଂ କ୍ଷେତରାଜପୁରରରୁ ୩୨୯ କୋଟି ଟଙ୍କା ଜବତ ହୋଇଥିବା କୁହାଯାଇଥିଲା। ତେବେ ସୁଦପଡ଼ାରୁ ଜବତ ହୋଇଥିବା ୨୮୫କୋଟି ଟଙ୍କା ଷ୍ଟେଟ ବ୍ୟାଙ୍କରେ ଜମା କରାଯାଇଥିବା ଆୟକର ବିଭାଗର ଜଣେ ଅଧିକାରୀ କହିଥିବା ବେଳେ ବାକି ଟଙ୍କା କୁଆଡ଼େ ଗଲା ସେନେଇ କେହି ମୁହଁ ଖୋଲୁନାହାନ୍ତି। ଏପରି କି ଏହି ଚଢ଼ାଉର ପରବର୍ତ୍ତୀ ପଦକ୍ଷେପ କ’ଣ ନିଆଯାଉଛି, ତାହା ମଧ୍ୟ ସମସ୍ତଙ୍କୁ ଅଜଣା ପାଲଟିଛି। ଆଲୋଚନା ହେଉଛି କି ଚଢ଼ାଉ ହୋଇଥିବା ବ୍ୟବସାୟିକ ପ୍ରତିଷ୍ଠାନ ସହ ଝାଡ଼ଖଣ୍ଡର କଂଗ୍ରେସ ରାଜ୍ୟ ସଭା ସଦସ୍ୟ ଧୀରଜ ସାହୁଙ୍କ ଲିଙ୍କ୍ ଥିବା କୁହାଯାଇଥିଲା। ସେଥିରୁ ବୁଝିବା କଥା ଯେ, ଭାଜପା ଶାସିତ କେନ୍ଦ୍ର ସରକାରଙ୍କ ଅଧୀନ ଆୟକର ବିଭାଗ ଉପରେ ସମ୍ପୃକ୍ତ ବ୍ୟକ୍ତିଙ୍କୁ ବଞ୍ଚାଇବା ପାଇଁ କେହି ଚାପ ପକାଇ ପାରିବେ ନାହିଁ। ତଥାପି ଜବତ ଏବଂ ଜମା ଅର୍ଥର ତାଳମେଳ ନ ରହିବା ପଛରେ କେଉଁ କାରଣ ରହିଛି।
ପ୍ରକାଶ ଯେ, ଆୟକର ବିଭାଗ ପକ୍ଷରୁ ଚଢ଼ାଉରେ ଓଡ଼ିଶାରୁ ଏତେ ଟଙ୍କା ଜବତ କରାଯିବା ପ୍ରଥମ ଘଟଣା। ଏହାକୁ ନେଇ ସମଗ୍ର ଦେଶରେ ହଇଚଇ ସୃଷ୍ଟି ହୋଇଥିଲା। ବିଶେଷକରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସାମାଜିକ ଗଣମାଧ୍ୟମରେ ମଦଭାଟିରୁ କୋଟି କୋଟି ଟଙ୍କା ଜବତ ସମ୍ପର୍କରେ ଉଲ୍ଲେଖ କରିବା ପରେ ମଧ୍ୟ ସରକାରୀ ସ୍ତରରେ କେବେ ସ୍ପଷ୍ଟ ତଥ୍ୟ ଦିଆ ନ ଯିବା ହେତୁ ସନ୍ଦେହ ସୃଷ୍ଟି ହେଉଛି। ଏହା ବ୍ୟତୀତ ଏତେ ଟଙ୍କା ଜବତ ହେବା ପରେ ଏହାକୁ ନେଇ ବ୍ୟାଙ୍କରେ ୬ଦିନ କାଳ ଗଣା ହୋଇଥିଲା। ଗଣତିରେ ବ୍ୟାଙ୍କର ବହୁ କର୍ମଚାରୀ ସାମିଲ ହୋଇଥିଲେ। ହେଲେ ଉକ୍ତ ଗଣତି ବେଳର ଭିଡିଓଗ୍ରାଫି କରାଗଲା ନାହିଁ। ଫଳରେ ବାସ୍ତବରେ କେତେ ଟଙ୍କା ଜବତ ହେଲା ସେ ସମ୍ପର୍କରେ କୌଣସି ବିଧିବଦ୍ଧ ତଥ୍ୟ ରଖାଗଲା ନାହିଁ। ବଡ଼ ବଡ଼ ଚଢ଼ାଉ ସମୟରେ ଭିଡିଓଗ୍ରାଫି କରାଗଲେ, ଚଢ଼ାଉ ଏବଂ ଜବତ ପରିମାଣର ସ୍ବଚ୍ଛତା ରହିଥାଏ। କିନ୍ତୁ ଏଠାରେ ଏହାକୁ ଅନୁପାଳନ କରାଯାଇ ନାହିଁ। ଆଜିର ଭାରତ ବର୍ଷରେ ବିରାଟକାୟ ଅର୍ଥନୈତିକ, ସାମରିକ କିମ୍ବା ସାମାଜିକ କାର୍ଯ୍ୟରୁ ଦୃଷ୍ଟି ହଟାଇବା ପାଇଁ ସରକାର ବିଧିବଦ୍ଧ ବିଭିନ୍ନ ପ୍ରକାର ବିସ୍ଫୋରଣ ଘଟାଉଛନ୍ତି। ଏହା ଫଳରେ ଜନସାଧାରଣ ଗୋଟିଏ ବୋମାର ବିସ୍ଫୋରଣ ଶୁଣି ତାବ୍ଦା ହୋଇଥିବା ସମୟରେ ଅନ୍ୟ ଏକ ବିସ୍ଫୋରଣର ବନ୍ଦୋବସ୍ତ କରି ଦିଆଯାଉଛି। ତେଣୁ ଜନସାଧାରଣ ଏହି ମୁହୂର୍ତ୍ତର ବିସ୍ଫୋରଣ ଶୁଣିବା ବେଳକୁ ପୂର୍ବ ବିସ୍ଫୋରଣକୁ ପାସୋରି ଯାଉଛନ୍ତି। ଶାସକମାନେ ଏହାକୁ ଭଲ ଭାବରେ ବୁଝି ସାରିଥିବା ହେତୁ ଏବେ ଆୟକର ବିଭାଗର ଦେଶୀ ମଦ ସାମ୍ରାଜ୍ୟ ଉପରେ ଚଢ଼ାଉକୁ ଜନସାଧାରଣ ବାସ୍ତବରେ ଭୁଲିଗଲେଣି।
