ଭୁବନେଶ୍ୱର, ୨ା୪(ବ୍ୟୁରୋ): ରାଜ୍ୟରେ ପରିବେଶ ଅନୁକୁଳ ଇ-ଯାନ ବ୍ୟବହାରକୁ ପ୍ରୋତ୍ସାହିତ କରାଯିବ। ଏଥିଲାଗି ଲୋକସେବା ଭବନରେ ମୁଖ୍ୟଶାସନ ସଚିବ ସୁରେଶ ଚନ୍ଦ୍ର ମହାପାତ୍ର ଶୁକ୍ରବାର ବିଦ୍ୟୁତ୍ ଯାନ ସବ୍ସିଡି ପୋର୍ଟାଲର ଶୁଭାରମ୍ଭ କରିଛନ୍ତି। ପୋର୍ଟାଲକୁ ବ୍ୟାଙ୍କ ଅନ୍ଲାଇନ୍ ପେମେଣ୍ଟ୍ ବ୍ୟବସ୍ଥା ସହ ସଂଯୋଗ କରି ୧୦୦ ପ୍ରତିଶତ ସ୍ବୟଂକ୍ରିୟ କରିବାକୁ ନିର୍ଦ୍ଦେଶ ଦିଆଯାଇଛି। ଭୁବନେଶ୍ୱର ଆର୍ଟିଓ-୨ରେ ପଞ୍ଜୀକୃତ ୨ଚକିଆ ବିଦ୍ୟୁତ୍ ଯାନ ମାଲିକ ତ୍ରିଲୋଚନ ବେହେରା ପ୍ରଥମ ବ୍ୟକ୍ତି ଭାବେ ଏହି ସବ୍ସିଡିର ଲାଭ ଉଠାଇବାକୁ ଯୋଗ୍ୟ ବିବେଚିତ ହୋଇଛନ୍ତି। ଏଥିଲାଗି ଆବଶ୍ୟକ ମଞ୍ଜୁରୀ ଦିଆଯାଇଛି।
ପୋର୍ଟାଲ ବିଷୟରେ ସୂଚନା ଦେଇ ପ୍ରମୁଖ ଶାସନ ସଚିବ ବିଷ୍ଣୁପଦ ସେଠୀ କହିଛନ୍ତି, ଓଡ଼ିଶାର ବିଦ୍ୟୁତ୍ ଯାନ ନିୟାମକ ଏକ ପ୍ରଗତିଶୀଳ ଏବଂ ଆଗୁଆ ନିୟମ। ଏହାର ସରଳ କାର୍ଯ୍ୟାନ୍ବୟନ ନିମନ୍ତେ ଏନ୍ଆଇସିଙ୍କ ବୈଷୟିକ ସହାୟତାରେ ପ୍ରସ୍ତୁତ ୱେବ୍ ପୋର୍ଟାଲ ଦେଶରେ ସର୍ବପ୍ରଥମ। ପରିବହନ ଆୟୁକ୍ତ ଅରୁଣ ବୋଥ୍ରା କହିଛନ୍ତି, ବିଦ୍ୟୁତ୍ ଯାନ ମାଲିକଙ୍କୁ ସିଧାସଳଖ ଏହି ପୋର୍ଟାଲ ମାଧ୍ୟମରେ ସବ୍ସିଡି ପ୍ରଦାନ କରାଯିବ। ଏଥିପାଇଁ ସେମାନଙ୍କୁ ଆର୍ଟିଓ ଅଫିସ୍କୁ ଦୌଡିବାକୁ ପଡିବ ନାହିଁ। ୨୦୨୧ ସେପ୍ଟେମ୍ବର ପରଠାରୁ କିଣାଯାଇଥିବା
ସମସ୍ତ ଇ-ଯାନ ମାଲିକଙ୍କୁ ଏଥିରେ ଅନ୍ତର୍ଭୁକ୍ତ କରାଯିବ। ୨ ଚକିଆ ଇ-ଯାନ ପାଇଁ ସର୍ବାଧିକ ୫ ହଜାର, ୩ ଚକିଆ ଇ-ଯାନ ସର୍ବାଧିକ ୧୦ ହଜାର ଏବଂ ୪ ଚକିଆ ଇ-ଯାନ ସର୍ବାଧିକ ୫୦ ହଜାର ପର୍ଯ୍ୟନ୍ତ ସବ୍ସିଡି ପ୍ରଦାନ ପରାଯିବ। ଏହି ବ୍ୟବସ୍ଥା ଆସନ୍ତା ୪ବର୍ଷ ପର୍ଯ୍ୟନ୍ତ ବଳବତ୍ତର ରହିବ। ତେବେ ୨ ଚକିଆ ଇ-ଯାନ ସବ୍ସିଡି ଲାଗି ‘ଫାଷ୍ଟର ଆଡପ୍ସନ୍ ଆଣ୍ଡ୍ ମାନୁଫାକ୍ଚରିଂ ଅଫ୍ ଇଲେକ୍ଟ୍ରିକ୍ ଭେଇକିଲ ସ୍କିମ୍’ର ନିର୍ଦ୍ଧାରିତ ମାନଦଣ୍ଡ ପୂରଣ କରିବାକୁ ପଡ଼ିବ।
ସୂଚନାଯୋଗ୍ୟ, ରାଜ୍ୟରେ ଇ-ଯାନ ପାଇଁ ଗାଡ଼ି ପଞ୍ଜୀକରଣ ଦେୟ ସମ୍ପୂର୍ଣ୍ଣ ଛାଡ଼ କରାଯାଇଛି। ବର୍ତ୍ତମାନ ଏହି ବର୍ଗର ଗାଡିର ମାଲିକମାନେ ଏହି ସୁବିଧା ପାଉଛନ୍ତି। ସବ୍ସିଡି ପାଇବା ପାଇଁ ସମ୍ପୃକ୍ତ ଗାଡ଼ି ମାଲିକ odishatransport.gov.in ପୋର୍ଟାଲକୁ ଯାଇ ଆବଶ୍ୟକୀୟ ତଥ୍ୟ ସଂଗ୍ରହ କରିପାରିବେ।
