ଜଳେଶ୍ୱର, ୨ା୧୧(ରବିନାରାୟଣ ପାତ୍ର) ଏନ୍ଜିଟିର ରୋକ ଓ ଅନ୍ୟ ବିଭିନ୍ନ କାରଣରୁ ସୁବର୍ଣ୍ଣରେଖା ନଦୀର ଜଳେଶ୍ୱର ତହସିଲ ଅଧୀନରେ ଥିବା ମୋଟ ୨୩ଟି ବାଲି ସଇରାତରୁ ଚଳିତବର୍ଷଠାରୁ ୪ଟିକୁ ବନ୍ଦ କରାଯାଇଛି। ନୂଆ ଆଇନ ଅନୁଯାୟୀ ୧୯ଟି ସଇରାତରୁ ବାଲି ଉତ୍ତୋଳନ ଲାଗି ଏବେ ରାଜସ୍ବ ବିଭାଗ ପରିବର୍ତ୍ତେ ଖଣିବିଭାଗ ତପତ୍ରତା ପ୍ରକାଶ କରିଛି। କିନ୍ତୁ ଆସନ୍ତା ଜାନୁୟାରୀଠାରୁ ବାଲି ଉତ୍ତୋଳନ ଲାଗି ଖଣି ବିଭାଗ ନିର୍ଦ୍ଦେଶ ଦେଇ ନ ପାରିଲେ ପୁଣି ଆସନ୍ତାବର୍ଷ ବାଲି ଉତ୍ତୋଳନ ସମ୍ଭବ ହୋଇପାରିବ ନାହିଁ। ଫଳରେ ଚୋରାବାଲି ଚାଲାଣକାରୀମାନେ ହଜାର ଯାନ ସାହାଯ୍ୟରେ ବିଭିନ୍ନ ସ୍ଥାନରୁ ବେଆଇନ ଭାବେ ବାଲି ଉତ୍ତୋଳନ କରିବା ଲାଗି ତପତ୍ର ହୋଇଉଠିବେ।
ବାଲି ସଇରାତଗୁଡିକୁ ତହସିଲ ଓ ଉପଜିଲାପାଳଙ୍କ କାର୍ଯ୍ୟାଳୟରୁ ନିଲାମ ଦିଆଯାଇ ରାଜସ୍ବ ଆଦାୟ ହୋଇଆସୁଥିଲା। କିନ୍ତୁ ସୁବର୍ଣ୍ଣରେଖା ନଦୀର ଜଳେଶ୍ୱର ତହସିଲ ଅଧୀନରେ ୨୩ଟି ବାଲି ସଇରାତ ରହିଥିବାରୁ ସେଗୁଡିକୁ ନିଲାମ ଦେଇ ଜଳେଶ୍ୱର ତହସିଲ କୋଟି କୋଟି ଟଙ୍କା ଆଦାୟ କରୁଥିଲା ା ଗତ ୫ବର୍ଷ ତଳେ ଏନ୍ଜିଟିରେ ଏହା ବିରୋଧରେ ମାମଲା ରୁଜୁ ହେବାରୁ ପଶ୍ଚିମବଙ୍ଗ ଓ ଓଡିଶା ସରକାର, ବାଲେଶ୍ୱର ତଥା ମେଦିନୀପୁର ଜିଳାପାଳଙ୍କୁ ବିଭିନ୍ନ ସମୟରେ ଭର୍ତ୍ସନା କରି ଆସୁଥିଲେ। ଦୀର୍ଘଦିନ ପରେ ଓଡିଶା ଓ ପଶ୍ଚିମବଙ୍ଗରେ ଥିବା ସୁବର୍ଣ୍ଣରେଖା ନଦୀର ସୀମା ଚିହ୍ନଟ ମଧ୍ୟ କରାଯାଇଛି।
ଅନ୍ୟପକ୍ଷରେ ନଦୀର ଗତିପଥ ପରିବର୍ତ୍ତନ ଯୋଗୁ ଚଳିତବର୍ଷଠାରୁ ମହମ୍ମଦନଗରପାଟଣା (କ), (ଖ), (ଗ), (ଘ) ୪ଟି ସଇରାତକୁ ବନ୍ଦ କରି ଦିଆଯାଇଛି। କିନ୍ତୁ ସରକାରଙ୍କ ନୂତନ ନିର୍ଦ୍ଦେଶ ଅନୁଯାୟୀ ରାଜସ୍ବ ବିଭାଗ ପରିବର୍ତ୍ତେ ଖଣି ବିଭାଗ ବାଲି ସଇରାତ ନିଲାମ ଦେବାକୁ ଥିବାରୁ ୧୯ଟି ସଇରାତ୍ ଲାଗି ପ୍ରସ୍ତୁତି ଆରମ୍ଭ ହୋଇଛି।
ଚାଲନ୍ତି, ଶିଖରପୁର, ପଂଚୁଘଣ୍ଟାସ୍ଥିତ ରିଭରବ୍ଳକ (କ), (ଖ), ବାଲିକବାର୍ଡ, ପ୍ରହରାଜପୁର (କ), ଗୋବରଘଟା (ଦକ୍ଷିଣପ୍ରହରାଜପୁର), ମକରମପୁର, ଶେଖସରାଇ (କ),(ଖ), ମାକିଡିଆ (କ), (ଖ), (ଗ), ବିଳାସପୁର, ପ୍ରହରାଜପୁର(ଖ), ରାଜନଗର, ଗୋବର୍ଦ୍ଧନପୁର, ଚଣ୍ଡିବସ୍ତି, ବାଲିଆପାଳ ବାଲି ସଇରାତଗୁଡିକ ନିଲାମ ପାଇଁ ପ୍ରସ୍ତୁତ ହୋଇଛି। ଏଥିରୁ ଗୋବର୍ଦ୍ଧନପୁର ଓ ଶିଖରପୁର ୨ଟି ସଇରାତକୁ ନିଲାମ ଦିଆଯିବା ଲାଗି ପ୍ରସ୍ତୁତି କାର୍ଯ୍ୟ ଶେଷ ହୋଇଛି। ରାଜନଗର ବାଲି ସଇରାତ ଲାଗି ପ୍ରଶାସନର ଜନଶୁଣାଣି କାର୍ଯ୍ୟ ଶେଷ ହୋଇଛି। ଏଥିଲାଗି ଖଣିବିଭାଗ ତପତ୍ର ଥିବା ବେଳେ ବରଡିହାଠାରେ ଏକ ମୋରମ ଖାଦାନ ନିଲାମ ଦିଆଯିବା ଲାଗି ବ୍ୟବସ୍ଥା ହୋଇଛି ା ଏସବୁ ବାଲି ସଇରାତଗୁଡିକ ଅତିଶୀଘ୍ର ନିଲାମ ଦିଆଯିବା ଲାଗି ବ୍ୟବସ୍ଥା ହେଲେ କେବଳ ଚୋରି ବନ୍ଦ ହେବ ତାହା ନୁହେଁ, ବିଭିନ୍ନ ସରକାରୀ ପ୍ରକଳ୍ପ, ବେସରକାରୀ ପ୍ରକଳ୍ପ କାର୍ଯ୍ୟ ଲାଗି କମ୍ ମୂଲ୍ୟରେ ବାଲି ପର୍ଯ୍ୟାପ୍ତ ମୂଲ୍ୟରେ ବାଲି ମିଳିପାରିବା ସହିତ ସାଧାରଣ ଗରିବ ଲୋକେ ପାଇଥିବା ଆବାସ ଯୋଜନାରେ ଘର ଯଥାଶୀଘ୍ର କରିପାରିବାର ସମ୍ଭାବନା ରହିଛି।
