ବାଲେଶ୍ୱର ଅଫିସ,୩।୨: ବାଲେଶ୍ୱର ଜିଲାର ବିଭିନ୍ନ କନିଷ୍ଠ ମହାବିଦ୍ୟାଳୟର ଛାତ୍ରୀଛାତ୍ର ମହାମାରୀ କରୋନା ଯୋଗୁ ଯୁକ୍ତ ୨ ଫାଇନାଲ୍ ପରୀକ୍ଷା ବାତିଲ୍ କରିବା ପାଇଁ ଦାବି କରିଛନ୍ତି। ଗୁରୁବାର ଅଲ୍ ଓଡ଼ିଶା ଷ୍ଟୁଡ଼େଣ୍ଟ ୟୁନିଅନ୍ ଜିଲା ଶାଖା ନେତୃତ୍ୱରେ ସହରର ଓଟିରୋଡ୍ର ଷ୍ଟେଶନ ଛକ ନିକଟରେ ଛାତ୍ରୀଛାତ୍ର ଧାରଣା ଦେଇଥିଲେ। ୨ ଘଣ୍ଟା ପରେ ସେମାନେ ସେଠାରୁ ଆସି ଜିଲାପାଳ ଅଫିସ୍ ଘେରାଉ କରି ବିଭିନ୍ନ ନାରାବାଜି ଦେଇ ପରୀକ୍ଷା ବାତିଲ୍ କରିବା ପାଇଁ ଦାବି କରିଥିଲେ। ପରେ ଏକ ପ୍ରତିନିଧି ଦଳ ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀଙ୍କୁ ସାକ୍ଷାତ କରି ଶିକ୍ଷାମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ଦାବିପତ୍ର ପ୍ରଦାନ କରିଥିଲେ।
ଛାତ୍ରୀଛାତ୍ରଙ୍କ ଦାବି ଅନୁସାରେ ଅଫଲାଇନ୍ରେ ନିର୍ଦ୍ଧାରିତ ସିଲାବସ୍ ଶେଷ ହୋଇନି, ଅନଲାଇନ୍ ସିଲାବସ୍ ଶେଷ ହୋଇଥିବା ବେଳେ କ୍ଲାସ୍ର ଭିଡିଓ ଓ ଅଡିଓର କ୍ୱାଲିଟି ନାହିଁ, ବିଳମ୍ବରେ କଲେଜ ଖୋଲିଥିଲେ ମଧ୍ୟ ଓମିକ୍ରନ୍ ଭୟରେ ପୁଣି କଲେଜ ବନ୍ଦ ହେବା ଭଳି ସମସ୍ୟା ସୃଷ୍ଟି ହୋଇଛି। ଏବେ କରୋନା ଓ ଓମିକ୍ରନ୍ର ପ୍ରାଦୁର୍ଭାବ ଜିଲାରେ ରହିଥିବା ବେଳେ ଅଫଲାଇନ୍ ପରୀକ୍ଷା କରାଗଲେ ସ୍ବାସ୍ଥ୍ୟଗତ ଦୃଷ୍ଟିକୋଣରୁ ଛାତ୍ରୀଛାତ୍ରଙ୍କ ଜୀବନ ପ୍ରତି ବିପଦ ରହିଛି। ଅଫଲାଇନ୍ ଓ ଅନଲାଇନ୍ ପରୀକ୍ଷା ବନ୍ଦ କରି କ୍ଲାସରେ ହୋଇଥିବା ତ୍ରୟୋମାସିକ ପରୀକ୍ଷାର ଫଳାଫଳ ଆଧାରରେ ଛାତ୍ରୀଛାତ୍ରଙ୍କୁ ଉତ୍ତୀର୍ଣ୍ଣ କରିବାକୁ ଛାତ୍ରୀଛାତ୍ର ପ୍ରସ୍ତାବ ରଖିଛନ୍ତି। ଏଥିରେ ଯେଉଁ ଛାତ୍ରୀଛାତ୍ର ଅସନ୍ତୁଷ୍ଟ ହେବେ ସେମାନଙ୍କ ପାଇଁ ପୁନଃ ପରୀକ୍ଷା ବ୍ୟବସ୍ଥା ରଖିବା ପାଇଁ ଦାବି ହୋଇଛି। ଚିନ୍ମୟ ପାଢ଼ୀ, ଡଲି ମହନ୍ତ, ମୋନାଲିସା ରଣା, ଦେବ ଆର୍ଯ୍ୟନ୍, ଅର୍ପିତ କୁମାର ପତି, ସୁମଙ୍ଗଲ ପଣ୍ଡା ପ୍ରମୁଖଙ୍କ ତତ୍ତ୍ୱାବଧାନରେ ଶତାଧିକ ଛାତ୍ରୀଛାତ୍ର ଆନ୍ଦୋଳନରେ ସାମିଲ ଥିଲେ।
