କୋଲନରା,୧୭ା୧୨(ଡି.ଏନ୍.ଏ.): ରାୟଗଡ଼ା ଜିଲା କୋଲନରା ବ୍ଲକ ଅନ୍ତର୍ଗତ ବଡ଼ଖିଲାପଦର ଆଶ୍ରମ ବିଦ୍ୟାଳୟରେ ପରୀକ୍ଷା ଚାଲିଥିବାବେଳେ ଜଣେ ଛାତ୍ରୀ ଅସୁସ୍ଥ ହୋଇ ପରେ ତାଙ୍କର ମୃତ୍ୟୁ ଘଟିଛି। ସେ ହେଲେ ସବିଦ୍ୟାଳୟର ସପ୍ତମ ଶ୍ରେଣୀ ଛାତ୍ରୀ ପିଙ୍କି ହିକ୍କା(୧୩)।
ସୂଚନା ଅନୁଯାୟୀ, ପିଙ୍କିଙ୍କ ଘର ନିକଟସ୍ଥ କୁସୁମପୁର ପଞ୍ଚାୟତର କଣାବାଇ ଗ୍ରାମରେ। ସେ ବଡ଼ଖିଲାପଦର ସ୍କୁଲରେ ପଢ଼ୁଥିଲେ। ୭ମ ଶ୍ରେଣୀର ପରୀକ୍ଷା ଚାଲିଥିବାବେଳେ ପିଙ୍କି ଅନ୍ୟ ପିଲାଙ୍କ ଭଳି ପ୍ରଥମ ସିଟିଂ ପରୀକ୍ଷା ଦେଇଥିଲେ। ଦ୍ୱିତୀୟ ସିଟିଂ ପରୀକ୍ଷା ଦେବା ସମୟରେ ସେ ଅସୁସ୍ଥତା ଅନୁଭବ କରିଥିଲେ। ସଙ୍ଗେ ସଙ୍ଗେ ପ୍ରଧାନ ଶିକ୍ଷକ ନବୀନ ପାତ୍ର ଏବଂ ସ୍କୁଲର ଅନ୍ୟ ଶିକ୍ଷକମାନେ ତାଙ୍କୁ କୋଲନରା ସ୍ବାସ୍ଥ୍ୟକେନ୍ଦ୍ରକୁ ନେଇଥିଲେ। ପିଙ୍କିଙ୍କ ରକ୍ତଚାପ କମ୍ ରହିବା ସହ ନିଶ୍ୱାସ ପ୍ରଶ୍ୱାସରେ ସମସ୍ୟା ହେଉଥିଲା। ପଲ୍ସ ରେଟ୍ ମଧ୍ୟ କମିଯାଇଥିଲା। ଏହା ଅନୁଯାୟୀ ଡାକ୍ତର ସମୀର କୁମାର ରଥ ତାଙ୍କର ଚିକିତ୍ସା ଚଳାଇଥିବାବେଳେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା। ତେବେ ମୃତ୍ୟୁର କାରଣ ସ୍ପଷ୍ଟ ହୋଇନାହିଁ। ଏ ନେଇ ପିଙ୍କିଙ୍କ ବାପା ମଣି ହିକ୍କା ସ୍ଥାନୀୟ ଥାନାରେ ଏତଲା ଦେଇଛନ୍ତି। ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ରାୟଗଡ଼ା ପଠାଇଛି। ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ସ୍ପଷ୍ଟ ହେବ ବୋଲି କୁହାଯାଇଛି।
