ଫୁଲବାଣୀ ଅଫିସ/ବଲସକୁମ୍ପା(ଡି.ଏନ୍.ଏ.),୫ା୧୦: ଫୁଲବାଣୀରେ ମଙ୍ଗଳବାର ବାଇକ୍ ଦୁର୍ଘଟଣାରେ ଜଣେ ମେଧାବୀ ଛାତ୍ରଙ୍କର ଜୀବନ ଯାଇଛି । ସେ ହେଲେ ଡି.ଆଦର୍ଶ କୁମାର। ଏହି ଦୁର୍ଘଟଣାରେ ଅନ୍ୟ ଦୁଇ ଛାତ୍ରଙ୍କ ମଧ୍ୟରୁ ଜଣଙ୍କୁ ଗୁରୁତର ଅବସ୍ଥାରେ ଭୁବନେଶ୍ୱର ସ୍ଥାନାନ୍ତର କରାଯାଇଛି।
ସରକାରୀ ଆଇଆଇଟିଆଇରେ ସହ ତାଲିମ ଅଧିକାରୀ ଥିବା ଡି.ଗୋପାଳକୃଷ୍ଣ ରାଓଙ୍କ ପୁଅ ଆଦର୍ଶ ନବୋଦୟରେ ଏକାଦଶ ଶ୍ରେଣୀରେ ପଢ଼ୁଥିଲେ। ସବୁ ଦିନ ପରି ମଙ୍ଗଳବାର ସକାଳେ ସେ ଟ୍ୟୁଶନ ପାଇଁ ଘରୁ ବାହାରିଥିଲେ। କୌଣସି କାରଣରୁ ଟ୍ୟୁଶ୍ନ ଛୁଟି ହୋଇଥିଲା । ଦୁଇ ଜଣ ସାଙ୍ଗ ଅନ୍ୟ ଜଣେ ସାଙ୍ଗ ଠାରୁ ବାଇକ୍ ଆଣି ଆଦର୍ଶଙ୍କୁ ପଛରେ ବସାଇ ବୁଲିବାକୁ ଯାଇଥିଲେ । ଗୁଦାରୀ ପାଖରେ ଏକ ବୁଲାଣୀରେ ବାଇକ୍ ଭାରସାମ୍ୟ ହରାଇବାରୁ ନାଳ ପାର୍ଶ୍ୱକୁ ଖସି ପଡିଥିଲା। ସେଠାରେ ୩ ସାଙ୍ଗ ପଡି ଯାଇଥିଲେ । ସ୍ଥାନୀୟ ଲୋକେ ଏ ନେଇ ପୋଲିସକୁ ଖବର ଦେଇଥିଲେ। ସମସ୍ତଙ୍କୁ ଉଦ୍ଧାର କରି ଆମ୍ବୁଲାନ୍ସରେ ଜିଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲେ ମଧ୍ୟ ସେଠାରେ ଆଦର୍ଶଙ୍କୁ ଡାକ୍ତର ମୃତ ଘୋଷଣା କରିଥିଲେ। ଗୁରୁତର ଅବସ୍ଥାରେ ଅନ୍ୟ ଜଣଙ୍କୁ ଭୁବନେଶ୍ୱର ସ୍ଥାନାନ୍ତର କରାଯାଇଛି । ଏ ନେଇ ନଂ. ୧୧୭/୨୧ରେ ମାମଲା ରୁଜୁ କରି ଖଜୁରୀପଡ଼ା ପୋଲିସ ତଦନ୍ତ ଚଳାଇଛି।
