ମୁମ୍ବାଇ,୫।୧୦: ଡ୍ରଗ୍ସ ପାର୍ଟି ମାମଲାରେ ୨୩ ବର୍ଷୀୟ ଆର୍ୟନ ଖାନ ଗିରଫ ହେବା ପରଠାରୁ ବଲିଉଡ୍ ସୁପରଷ୍ଟାର ଶାହରୁଖ ଖାନଙ୍କ ଘର ‘ମନତ’କୁ ଛୁଟିଛି ଫିଲ୍ମ ଇଣ୍ଟଷ୍ଟ୍ରି ସହ ଜଡ଼ିତ କଳାକାରଙ୍କ ସୁଅ। କିନ୍ତୁ ବଲିଉଡ୍ର ବନ୍ଧୁମାନଙ୍କୁ ଘରକୁ ଆସିବାକୁ ମନା କରି ଦେଇଛନ୍ତି ଶାହରୁଖ। ଘଟଣାଟି ଅତ୍ୟନ୍ତ ସମ୍ବେଦନଶୀଳ ଥିବାରୁ ବଲିଉଡ୍ର ସହ କଳାକାରଙ୍କୁ ମନତକୁ ନ ଆସିବା ପାଇଁ ଶାହରୁଖ ଓ ତାଙ୍କ ଟିମ୍ ଅନୁରୋଧ କରିଛନ୍ତି।
ଏଭଳି କଠିନ ସମୟରେ ତାଙ୍କ ସହ ଛିଡ଼ା ହେବା ପାଇଁ ଅନେକ ଷ୍ଟାର ଆଗଭରା ହେଉଛନ୍ତି। ଆର୍ୟନ ଗିରଫ ହେବା ପରେ ପ୍ରଥମେ ମନତରେ ପହଞ୍ଚିଥିଲେ ସଲମାନ ଖାନ। ତାଙ୍କ ପରେ ଅଲଭିରା ଖାନ, ସିମା ଖାନ, ମହଦୀପ କାପୁର, ନୀଲମ କୋଠାରୀଙ୍କ ଭଳି ବଲିଉଡ୍ର ଅନେକ ଷ୍ଟାର ଶାହରୁଖଙ୍କୁ ତାଙ୍କ ବାସଭବନରେ ଭେଟିଥିଲେ।
