ନୂଆଦିଲ୍ଲୀ, ୧୬।୧୦(ପି.ଟି.)-ଭାରତୀୟ ମହିଳା ହକି ଦଳର ଡିଫେନ୍ସ ବିଭାଗରେ ଯୁବ ଓ ଅଭିଜ୍ଞ ଖେଳାଳିଙ୍କ ସମ୍ମିଶ୍ରଣ ରହିଛି। ଆଗାମୀ ଟୋକିଓ ଅଲିମ୍ପିକ୍ସରେ ଏହା ଦଳପାଇଁ ବିଶେଷ ଉପାଦେୟ ହେବ ବୋଲି ଗୁରୁବାର ଭାରତୀୟ ଦଳର ଓଡ଼ିଆ ଡିଫେଣ୍ଡର ଦୀପ୍ ଗ୍ରେସ୍ ଏକ୍କା ପ୍ରକାଶ କରିଛନ୍ତି। ୨୦୧୮ ଏସିଆନ ଗେମ୍ସରେ ରୌପ୍ୟ ଏବଂ କ୍ରମାଗତ ଅଲିମ୍ପିକ୍ସ ଯୋଗ୍ୟତା ଅର୍ଜନ ସମେତ ଗତ ବଡ଼ ଟୁର୍ନାମେଣ୍ଟଗୁଡ଼ିକରେ ଆମେମାନେ ଭଲ ଫଳାଫଳକୁ ଉପଭୋଗ କରିଛୁ। ଅଭିଜ୍ଞ ଖେଳାଳିମାନେ ଯୁବ ଖେଳାଳିଙ୍କୁ ଆବଶ୍ୟକ ପରାମର୍ଶ ଦେଇ ଡିଫେନ୍ସ ବିଭାଗକୁ ଅଧିକ ଦୃଢ଼ କରୁଛନ୍ତି ବୋଲି ସେ କହିଛନ୍ତି।
ଦୃଢ଼ ଡିଫେନ୍ସ ବିଭାଗ ସର୍ବଦା ଦଳଗୁଡ଼ିକୁ ସାହାଯ୍ୟ କରିଥାଏ। ଆମ ରକ୍ଷଣଭାଗ ଯଦି ଦୃଢ଼ ହୋଇଯିବ ତେବେ ଅଲିମ୍ପିକ୍ସ ପରି ବଡ଼ ଟୁର୍ନାମେଣ୍ଟ ଗୁଡ଼ିକରେ ଭାରତୀୟ ଦଳକୁ ନିଶ୍ଚିତ ଫାଇଦା ମିଳିବ। କୋଭିଡ୍-୧୯ ଯୋଗୁ ସମ୍ପ୍ରତି ସମଗ୍ର ବିଶ୍ୱପାଇଁ କଷ୍ଟ ସମୟ ଚାଲିଛି। ମାରାତ୍ମକ ଭାଇରସ ସଂକ୍ରମଣ ଯୋଗୁ ବିଶ୍ୱରେ ଏବେ କ୍ରୀଡ଼ା ଏକପ୍ରକାର ବନ୍ଦ ହୋଇ ଯାଇଛି। ଏପରି ସମୟରେ ଯୁବ ଖେଳାଳିଙ୍କୁ ମୋଟିଭେଟ କରିବା ତାଙ୍କ ଦାୟିତ୍ୱ ବୋଲି ଦୀପ୍ଗ୍ରେସ୍ କହିଛନ୍ତି। ” ଦଳର ଜଣେ ସିନିୟର ଖେଳାଳିଭାବେ ମୋର ଦାୟିତ୍ୱ ହେଲା ଯୁବ ଖେଳାଳିମାନେ ଏହାଦ୍ୱାରା ବେଶି ପ୍ରଭାବିତ ନ ହେବା ଏବଂ ଏହି ସମୟରେ ସକାରାତ୍ମକ ଚିନ୍ତା କରିବା। ସାମ୍ପ୍ରତିକ ସମୟରେ ଅନେକ ନକାରାତ୍ମକ ଚିନ୍ତା ଆସିବା ସ୍ବାଭାବିକ। ମାତ୍ର ଯୁବ ଖେଳାଳିଙ୍କ ଉପରେ ଯେପରି ଏହାର ବିଶେଷ ପ୍ରଭାବ ନ ପଡ଼ିବ ସେଥିପାଇଁ ଆମେ କାର୍ଯ୍ୟ କରୁଛୁ। ଖେଳ ପାଇଁ ପଡ଼ିଆକୁ ଓହ୍ଲାଇବା ସମ୍ଭବ ହେଉ ନ ଥିବାରୁ ସମସ୍ତେ ଫିଟ୍ନେସ ଉପରେ ଧ୍ୟାନ ଦେଉଛୁ। “ ବୋଲି ଏହି ୨୬ ବର୍ଷୀୟା ଓଡ଼ିଶା ଡିଫେଣ୍ଡର ପ୍ରକାଶ କରିଛନ୍ତି। ହକି ଇଣ୍ଡିଆ ଓ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ(ସାଇ) ପକ୍ଷରୁ ଅନୁମତି ମିଳିଲେ ଭାରତୀୟ ଦଳ ଅଲିମ୍ପିକ୍ସ ପାଇଁ ଅଭ୍ୟାସ ଆରମ୍ଭ କରିବ ବୋଲି ସେ ସୂଚନା ଦେଇଛନ୍ତି।
