କରୋନା ମହାମାରୀ ତଥା ବିଭିନ୍ନ ପ୍ରକାର ସଂକ୍ରମଣରୁ ରକ୍ଷା ପାଇବା ପାଇଁ ଏବେ ମୁହଁରେ ମାସ୍କ ପିନ୍ଧିବା ଜରୁରୀ ହୋଇପଡ଼ିଛି। ତେବେ ଏହି ମାସ୍କର ବ୍ୟବହାରକୁ ଆଉ ଟିକେ ଟ୍ରେଣ୍ଡି କରିବା ପାଇଁ ଆଜିକାଲି ମାର୍କେଟରେ କେତେ ନୂଆ ନୂଆ ଡିଜାଇନ୍ର ମାସ୍କ ବିକ୍ରି ହେଲାଣି। ହେଲେ ଏହି ମାସ୍କଗୁଡ଼ିକୁ କିଣିବା ପୂର୍ବରୁ ତାହା କେତେ ସୁରକ୍ଷିତ ପ୍ରଥମେ ଜାଣିବା ନିହାତି ଆବଶ୍ୟକ। ସେମିତି କେତୋଟି ଅଜବ ଫେସ୍ ମାସ୍କ ସମ୍ପର୍କରେ….
ଟ୍ରାନ୍ସପାରେଣ୍ଟ ଫେସ୍ ମାସ୍କ: ଫ୍ୟାଶନ ପ୍ରିୟ ଯୁବପିଢ଼ିମାନଙ୍କର ବେଳେବେଳେ ମନରେ ଦୁଃଖ ଆସୁଥିବ ଯେ, ମୁହଁରେ ମାସ୍କ ପିନ୍ଧିବା ଦ୍ୱାରା ଭାଇରସ୍ ଆକ୍ରମଣରୁ ସିନା ବର୍ତ୍ତି ହୋଇଯିବ, ହେଲେ ତାଙ୍କର ସୁନ୍ଦର ମୁହଁକୁ କେହି ଦେଖିପାରୁ ନଥିବେ। ଖାସ୍ ସେମାନଙ୍କର ଏହି ସମସ୍ୟାକୁ ଦୂର କରିବା ପାଇଁ ଏବେ ମାର୍କେଟରେ ଟ୍ରାନ୍ସପାରେଣ୍ଟ ଫେସ୍ ମାସ୍କ ମିଳିଲାଣି, ଯାହାକୁ ପିନ୍ଧିଲେ ପ୍ରଦୂଷଣରୁ ମୁକ୍ତି ମିଳିବା ସହ ଆପଣଙ୍କର ସୁନ୍ଦର ଚେହେରାକୁ ମଧ୍ୟ ଅନ୍ୟମାନେ ଦେଖିପାରିବେ।
ସ୍ମାଇଲ୍ ଫେସ୍ ମାସ୍କ: ହସିବା ଓ ଅନ୍ୟମାନଙ୍କୁ ହସାଇବା ବି ହେଉଛି ଏକ କଳା। ଏବେ ଏହି କାମ ମୁହଁରେ ଲଗାଯାଉଥିବା ମାସ୍କ ବି କରିପାରିବ। କାରଣ ଏବେ ମାର୍କେଟକୁ ଆସିଗଲାଣି ସ୍ମାଇଲ୍ ଫେସ୍ ମାସ୍କ। ଏହି ମାସ୍କ ଉପରେ ରହିଛି ଆକର୍ଷଣୀୟ ହସର ଏକ ପ୍ରତିଛବି, ଯାହାକୁ ପିନ୍ଧିଲେ ଅନ୍ୟମାନଙ୍କ ଦୃଷ୍ଟି ଆକର୍ଷଣ ହେବା ସହ ହସର ପ୍ରତିଛବି ଦେଖି ସେମାନଙ୍କ ମୁହଁରେ ବି ହସର ଫୁଆରା ସୃଷ୍ଟି ହେବ।
ଫନି କ୍ୟାଟ୍ ମାସ୍କ: ଏହି ମାସ୍କ ଉପରେ ଗୋଟିଏ ସୁନ୍ଦର ବିଲେଇର ପ୍ରତିଛବି ଏମିତି ରହିଛି ଯେ, ଲାଗିବ ସତେ ଯେମିତି ଏକ ସତସତିକା ବିଲେଇ ମାସ୍କ ଭିତରୁ ଆମକୁ ଚାହିଁଛି। ଏହା ଦେଖିବାକୁ ଯେପରି ଆକର୍ଷଣୀୟ ଲାଗିଥାଏ, ଏହାର ଗଠନଶୈଳୀ ବି ସେପରି ଆଶ୍ଚର୍ଯ୍ୟକର ହୋଇଥାଏ।
ଆଙ୍ଗ୍ରି ମୋନଷ୍ଟର୍ ମାସ୍କ: ରାକ୍ଷସମାନଙ୍କର ଯେମିତି ବଡ଼ ବଡ଼ ଦାନ୍ତ ଥାଏ, ଅବିକଳ ସେହି ଡିଜାଇନ୍ରେ ଏହି ମାସ୍କଟିକୁ ତିଆରି କରାଯାଇଛି। ଏହାକୁ ମୁହଁରେ ପିନ୍ଧିଲେ ବି ଅନ୍ୟମାନଙ୍କର ଦୃଷ୍ଟି ଆକର୍ଷଣ ନିଶ୍ଚୟ ହେବ।
ଆଶ୍ଚର୍ଯ୍ୟ କରିଦେଲା ଭଳି ମାସ୍କ: ଏହି ମାସ୍କରେ ଗୋଟିଏ ଛୋଟ ଛୁଆ ଭୟରେ ଆଶ୍ଚର୍ଯ୍ୟ ହୋଇଯିବା ଭଳି ଏକ ପ୍ରତିଛବି ରହିଛି। ତେଣୁ ଏହାକୁ ପିନ୍ଧିଲେ ଦୂରରୁ ଯିଏ ଦେଖିବ ସିଏ ଦ୍ବନ୍ଦ୍ୱରେ ପଡ଼ିଯିବ ଯେ, ଏହା ମାସ୍କ ନା ସତରେ କିଏ ଜଣେ ଏମିତି ଆଶ୍ଚର୍ଯ୍ୟ ହୋଇ ଚାହଁିଛି।
ଫେସ୍ ମାସ୍କ ଡ୍ରେସ୍: ଏହି ଡ୍ରେସ୍ ଦେଖିବାକୁ ଯେମିତି ଫ୍ୟାଶନେବଲ୍ ସେମିତି ଉପକାରୀ ମଧ୍ୟ। କାରଣ ଏହି ଡ୍ରେସ୍ର ଡିଜାଇନ୍ ଏମିତି କରାଯାଇଛି ଯେ, ଯାହାକୁ ପିନ୍ଧିଲେ ପାଟି ଓ ନାକ ଘୋଡ଼େଇ ହୋଇ ରହିବା ସହ ଦେହର ଲଜ୍ଜା ନିବାରଣ ମଧ୍ୟ କରିହେବ। କହିବାକୁ ଗଲେ ଏହା ଉଭୟ ଡ୍ରେସ୍ ଓ ମାସ୍କ ଦୁଇଟି ଯାକ ଜିନିଷର କାମ ଆରାମରେ କରିଥାଏ।
