ଉପହାର, ଚକୋଲେଟ୍, ଖିଆପିଆ ଓ ବୁଲାବୁଲିରେ ଅଧିକାଂଶ ଖ୍ରୀଷ୍ଟମାସ ପର୍ବ ପାଳନ କରୁଥିବାବେଳେ ଅନ୍ୟ କିଛି ସ୍ଥାନରେ ଏହାର ବ୍ୟତିକ୍ରମ ଦେଖାଯାଏ। ଖ୍ରୀଷ୍ଟମାସ ପାଳନ ହୁଏ ଟିକିଏ ନିଆରା ଢଙ୍ଗରେ…
ୟୁଲେ ଗୋଟ୍ : ୧୯୬୬ ମସିହାଠାରୁ ସୁଇଡେନ୍, ଗାଭ୍ଲେ ଗ୍ରାମରେ ଖ୍ରୀଷ୍ଟମାସ ନିଆରା ଢଙ୍ଗରେ ପାଳନ କରାଯାଉଛି। ନିକଟସ୍ଥ ଦୁର୍ଗ ପାଖରେ ୧୩ମିଟରର ଏକ ବଡ଼ ଛେଳି ଭଳି ପ୍ରତିକୃତି ତିଆରି କରି ତାହାକୁ ଜଳାଯାଏ। ପୂର୍ବେ ଏହି ପରମ୍ପରାକୁ କିଛି ଲୋକ ବନ୍ଦ କରିବାକୁ ଚେଷ୍ଟା କରିଥିଲେ। କିନ୍ତୁ ଏହାକୁ ଲୋକେ ବେଶ୍ ପସନ୍ଦ କରୁଥିବାରୁ ଏବେଯାଏ ଏହାକୁ ପାଳନ କରାଯାଉଛି।
କ୍ରାମ୍ପସ୍: ଅଷ୍ଟ୍ରିଆ ଖ୍ରୀଷ୍ଟମାସ କ୍ରାମ୍ପସ୍ ପର୍ବରେ କିଛି ଲୋକ ଅଧା ଛେଳି ଓ ଅଧା ଦାନବ ବେଶ ହୋଇ ଛୋଟ ପିଲାଙ୍କୁ ଡରେଇବା ସହ ଖରାପ ଲୋକଙ୍କୁ ଦଣ୍ଡ ଦେଇଥାନ୍ତି। ଏହି ପର୍ବ ଡିସେମ୍ବରର ପ୍ରଥମ ସପ୍ତାହରୁ ଆରମ୍ଭ ହୋଇଯାଇଥାଏ। ଏଥିରେ ଲୋକମାନେ ଭୂତ ପରି ବେଶ ହୋଇ ଖାସ୍କରି ଦୁଷ୍ଟ ପିଲାଙ୍କୁ ଖୋଜି ଡରାଇଥାନ୍ତି।
ସାଣ୍ଟାଙ୍କ ବେଶ ପାଳନ : ଆଇସ୍ଲାଣ୍ଡରେ ଖ୍ରୀଷ୍ଟମାସ ପାଇଁ ୧୩ ଦିନ ଧରି ୧୩ଜଣ ବ୍ୟକ୍ତି ସାଣ୍ଟା ବେଶ ହୋଇ ରାତିରେ ଘରଘର ବୁଲି ପିଲାମାନଙ୍କୁ ଗିଫ୍ଟସ୍, ଚକୋଲେଟ୍, ଖେଳନା ଆଦି ବାଣ୍ଟିଥାନ୍ତି । ଏମାନଙ୍କୁ ୟୁଲେ ଲାଡ କୁହାଯାଏ। ସେଠାକାର ପିଲାମାନେ ମଧ୍ୟ ଘରର ଝରକା ପାଖରେ ସାଣ୍ଟା ପାଇଁ କୌତୁକିଆ ଉପହାର ଓ ଅନ୍ୟମାନଙ୍କ ପାଇଁ ନିଜର ଏକ ହଳ ଜୋତା ଉପହାର ଭାବେ ରଖିଥାନ୍ତି ।
ପେପର୍ ଲାଣ୍ଟର୍ନ ପର୍ବ : ଫିଲିପାଇନ୍ସର ସାନ୍ ଫର୍ନାଣ୍ଡୋ ସହରରେ ଖ୍ରୀଷ୍ଟମାସ ଉପଲକ୍ଷେ ବଡ଼ଦିନର ପୂର୍ବ ସନ୍ଧ୍ୟାରୁ ନିଆରା ପେପର୍ ଲାଣ୍ଟର୍ନ ପର୍ବ ଆରମ୍ଭ ହୋଇଥାଏ । ଏହି ଆଲୋକମାଳାର ଉତ୍ସବରେ ବିଭିନ୍ନ ସ୍ଥାନର ପ୍ରତିଯୋଗୀ ବିରାଟକାୟ ପେପର୍ ଲାଣ୍ଟର୍ନ ତିଆରି କରିଥାନ୍ତି।
ଲାଣ୍ଟର୍ନଗୁଡ଼ିକ ବଡ଼, ଗୋଲାକାର ବ୍ୟାସାର୍ଦ୍ଧ ବିଶିଷ୍ଟ ହୋଇଥାଏ। ଏଥିରେ ଜାପାନୀ କଲର୍ ପେପର୍ ଏବଂ ଆଲୋକ ପାଇଁ କ୍ୟାଣ୍ଡେଲ୍ର ବ୍ୟବହାର କରାଯାଏ ।
ନ୍ୟାଶ୍ନାଲ ଲାଇଟେନିଙ୍ଗ୍: ଆମେରିକା, ଓ୍ବାଶିଂଟନ୍ର ହନୁକାଠାରେ ୧୯୭୯ଠାରୁ ଖ୍ରୀଷ୍ଟମାସ ଉପଲକ୍ଷେ ୯ମିଟର ଉଚ୍ଚତାର ୯ଟି ବଡ଼ ବଡ଼ ମେନୋରା ଲ୍ୟାମ୍ପ(ତ୍ରିଶୂଳ ପରି) ନଅ ଦିନ ଓ ରାତି ଜଳେ। ଏହା ଦେଖିବାକୁ ବହୁତ ସୁନ୍ଦର ଓ ଆକର୍ଷଣୀୟ।
ଏଠାରେ ଖାସ୍ ବଡ଼ଦିନ ପାଇଁ ଏପରି ଲ୍ୟାମ୍ପର ବ୍ୟବସ୍ଥା କରାଯାଇଥାଏ। ଏହି ଲ୍ୟାମ୍ପ ଜଳିବା ପରେ ଏହାର ଚାରିପାଖରେ ଗୀତ, ନାଚ ଓ ପିଲାମାନଙ୍କ କାର୍ଯ୍ୟକ୍ରମ ଆୟୋଜନ କରାଯାଏ।
