ଲାଇଟ୍ହାଉସ୍ ବା ବତିଘର, ରାତିରେ ଜଳଜାହାଜ ଓ ନୌକା ଚାଳକଙ୍କ ପାଇଁ ସାଜିଥାଏ ପଥପ୍ରଦର୍ଶକ। ତେବେ ନିଛାଟିଆ,
ନିର୍ଜନ ସ୍ଥାନରେ ଠିଆ ହୋଇ ରହିଥିବା ଅନେକ ବତିଘର ସହ ଜଡିତ ରହିଛି କିଛି ଭୟଙ୍କର ଏବଂ ରହସ୍ୟମୟ କାହାଣୀ । ଯାହା ସମ୍ପର୍କରେ ଜାଣିଲେ ଶୀହରି ଉଠିବ ଦେହ..
ଶୁଣିବାକୁ ମିଳେ ରହସ୍ୟମୟ ପିଆନୋ ସ୍ବର : ଆମେରିକା, ନ୍ୟୁ ଇଂଲଣ୍ଡସ୍ଥ ମେଇନ୍ ରାଜ୍ୟରେ ଥିବା ସେଗୁଇନ୍ ଦ୍ୱୀପରେ ଅଛି ସେଗୁଇନ୍ ଲାଇଟ୍ ହାଉସ୍। ୧୭୯୫ ମସିହାରେ ଏହାର ନିର୍ମାଣ କରାଯାଇଥିଲା। ପରେ ୧୮୫୭ରେ ଏହି ବତିଘରର ପୁନଃନିର୍ମାଣ ହୋଇଥିଲା। ଅନେକେ ଏହି ବତିଘରକୁ ହଣ୍ଟେଡ୍ ଲାଇଟ୍ ହାଉସ୍ ବା ଭୂତିଆ ବତିଘର ବୋଲି କୁହନ୍ତି। କୁହାଯାଏ ଏହି ବତିଘରେ ଜଣେ ଜଗୁଆଳି ଓ ତା ସ୍ତ୍ରୀ ରହୁଥିଲେ। ଜନବସତିଠାରୁ ବହୁତ ଦୂରରେ ଥିବାରୁ ଏକୁଟିଆପଣ ଦୂର କରିବା ଲାଗି ଜଗୁଆଳି ଜଣକ ସ୍ତ୍ରୀଙ୍କ ପାଇଁ ଏକ ପିଆନୋ ଆଣିଦେଇଥିଲେ। ହେଲେ ତାଙ୍କ ସ୍ତ୍ରୀ କେବଳ ଗୋଟିଏ ପ୍ରକାର ଧ୍ୱନି ବଜାଇବା ଜାଣିଥିଲେ ଏବଂ ତାକୁ ବାରମ୍ବାର ବଜାଉଥିଲେ। ଶେଷରେ ଜଗୁଆଳି ଜଣକ ବିରକ୍ତ ହୋଇ ରାଗରେ କୁରାଢ଼ି ଆଣି ପିଆନୋ ଭାଙ୍ଗିଦେବା ସହ ସ୍ତ୍ରୀକୁ ସେହି କୁରାଢ଼ିରେ ହାଣି ହତ୍ୟା କଲେ। ଆଉ ନିଜେ ଆତ୍ମହତ୍ୟା କରିଦେଲେ। କୁହାଯାଏ ଏବେବି ବତିଘରକୁ ବୁଲିବାକୁ ଆସୁଥିବା ଲୋକେ ପିଆନୋର ସ୍ବର ଶୁଣିବାକୁ ପାଆନ୍ତି। ଏଥିସହିତ ଜଣେ ବୟସ୍କ ମହିଳାଙ୍କ ହସିବା ଶବ୍ଦ ଓ କେହି ସେଠାରେ ବୁଲୁଥିବାର ଅନୁଭବ ମଧ୍ୟ କରନ୍ତି।
ଉଡ଼ିବୁଲେ ଶରୀର ବିହୀନ ମୁଣ୍ଡ : ମାସାଚୁସେଟ୍ସର ପ୍ଲେମାଉଥ୍ ବେ ଲାଇଟ୍ହାଉସ୍ ସହ ଅନେକ ରହସ୍ୟମୟ କାହାଣୀ ଜଡିତ ରହିଛି। ୧୭୬୮ରେ ଏହି ଲାଇଟ୍ ହାଉସ୍ ନିର୍ମାଣ ହୋଇଥିଲା। ଏଠାରେ ହିନ୍ନା ଥମାସ ନାମକ ଜଣେ ମହିଳା ବତିଘର ଜଗୁଆଳି ଭାବେ କାମ କରୁଥିଲେ। ଆମେରିକାର ସ୍ଥାନୀୟ ଲୋକମାନଙ୍କଠାରୁ ଶୁଣିବାକୁ ମିଳେ ଯେ, ଏବେର ବତିଘର ପ୍ରଥମ ବତିଘରଠାରୁ ବହୁତ ଭିନ୍ନ। କାରଣ ଏକ ଅଗ୍ନିକାଣ୍ଡରେ ପ୍ରଥମ ବତିଘର ସମ୍ପୂର୍ଣ୍ଣ ନଷ୍ଟ ହୋଇଯାଇଥିଲା ଏବଂ ଏଥିରେ ହିନ୍ନାଙ୍କର ମଧ୍ୟ ଅକାଳ ମୃତ୍ୟୁ ହୋଇଥିଲା। ୧୮୦୧ ମସିହାରେ ଏଠାରେ ନୂଆ ଏକ ବତିଘର ନିର୍ମାଣ କରାଯାଇଥିଲା। ଏହାର ନିର୍ମାଣ ସମୟରେ ହିନ୍ନାଙ୍କର ଅତୃପ୍ତ ଆତ୍ମାକୁ ଅନେକେ ଦେଖିଥିବା କୁହନ୍ତି। ଅଷ୍ଟାଦଶ ଶତାବ୍ଦୀ ସମୟରେ ଜଣେ ଫଟୋଗ୍ରାଫର ଏବଂ ତାଙ୍କ ପତ୍ନୀ ଏହି ବତିଘର ନିକଟ ଘରେ ରହିବାକୁ ଆସିଥିବା ବେଳେ ଥରେ ଅର୍ଦ୍ଧରାତିରେ ତାଙ୍କ ନିଦ ଭାଙ୍ଗି ଯାଇଥିଲା; ସେହି ସମୟରେ ସେ ଲମ୍ବା କେଶ ଥିବା ମହିଳାଙ୍କ ଶରୀର ବିହୀନ ମୁଣ୍ଡର ଆତ୍ମା ତାଙ୍କ ଖଟ ପାଖରେ ଉଡିବୁଲୁଥିବା ଦେଖିଛନ୍ତି ବୋଲି ଦାବି କରନ୍ତି ।
ଦେଖିବାକୁ ମିଳେ ରହସ୍ୟମୟ ଛାଇ : ୧୮୯୬ ମସିହାରେ ମିଚିଗାନ୍ ନିକଟସ୍ଥ ବିଗ୍ ବେ ସହରରେ ନିର୍ମାଣ କରାଯାଇଥିଲା ବିଗ୍ ବେ ପଏଣ୍ଟ ଲାଇଟ୍ହାଉସ୍। କୁହାଯାଏ ଏଚ୍. ଓ୍ବିଲିୟମ୍ ପ୍ରିୟର୍ ନାମକ ଜଣେ ବ୍ୟକ୍ତି ପ୍ରଥମେ ଏହି ବତିଘରର ଜଗୁଆଳି ଥିଲେ। ସେ ନିଜ ନାବାଳକ ପୁଅ ଜର୍ଜକୁ ବି ଆସିଷ୍ଟାଣ୍ଟଭାବେ ଏଠାରେ ନିଯୁକ୍ତ କରିଥିଲେ। କିନ୍ତୁ କିଛି ଦିନ ପରେ ଜର୍ଜ ପାହାଚରୁ ପଡି ଗୁରୁତର ଆହତ ହେଲେ। ପରେ ଏହି ଆଘାତ କାରଣରୁ ସେ ପ୍ରାଣ ତ୍ୟାଗ କଲେ। ପୁଅକୁ ହରାଇ ଓ୍ବିଲିୟମ୍ ମାନସିକ ଭାରସାମ୍ୟ ହରାଇ ଜଙ୍ଗଲକୁ ଚାଲିଗଲେ। ଘଟଣାର ୧୮ମାସ ପରେ ଜଣେ ଶିକାରୀ ଜଙ୍ଗଲର ଏକ ଗଛରେ କଙ୍କାଳ ଝୁଲୁଥିବାର ଦେଖିଲେ ଏବଂ ଏହା ଓ୍ବିଲିୟମ୍ ପ୍ରିୟର୍ଙ୍କ କଙ୍କାଳ ବୋଲି ଚିହ୍ନଟ କରାଯାଇଥିଲା। ତାଙ୍କ ମୃତ୍ୟୁ ପରେ ଯିଏ ବି ଲାଇଟ୍ ହାଉସ୍ରେ ରହିଲେ ଓ୍ବିଲିୟମ୍ଙ୍କ ଆତ୍ମା ତଥା ରହସ୍ୟମୟ ଛାଇ ଦେଖିଥିବାର ଦାବି କରନ୍ତି। ପରେ ଏହାକୁ ହଣ୍ଟେଡ୍ ବୋଲି ଘୋଷଣା କରିଦିଆଗଲା।
ଏବେ ବି ରହିଛି ପୁରୁଣା ଜଗୁଆଳିର ଆତ୍ମା : ଆମେରିକା, ମିସିଗାନ୍ସ୍ଥ ଲେକ୍ ମିସିଗାନ୍ ହ୍ରଦର ଉତ୍ତରପଶ୍ଚିମ ଦିଗରେ ଅଛି ସେଉଲ୍ ଚୋଇକ୍ସ ପଏଣ୍ଟ ଲାଇଟ୍ ହାଉସ୍। ୧୮୯୨ରେ ଏହି ବତିଘର ନିର୍ମିତ ହୋଇଥିଲା। ଏହି ବତିଘର ସହିତ ଅନେକ ଭୂତ କାହାଣୀ ଜଡିତ ରହିଛି। ତେବେ ଏଠାକାର ଗୋଟିଏ ଭୂତ କଥା ବେଶି ଜଣାଶୁଣା, ସେ ହେଉଛି କ୍ୟାପ୍ଟେନ୍ ଜନ୍ ଜୋସେଫ୍ ଓ୍ବିଲି ଟାଉନ୍ସେଣ୍ଡଙ୍କ କଥା। ସେ ଏହି ବତିଘରେ ଦୀର୍ଘଦିନ ଧରି ଜଗୁଆଳିଭାବେ ରହିଆସୁଥିଲେ। ଟାଉନ୍ସେଣ୍ଡ ଜଣେ ଚେନ୍ ସ୍ମୋକର୍ ଥିଲେ। ତେବେ ତାଙ୍କ ମୃତ୍ୟୁ ପରେ ଲୋକେ କୁହନ୍ତି ଯେ,ଏହି ବତିଘରେ କେହି ନ ଥାଇ ବି ଖାଇବା ଟେବୁଲ ଉପରେ କଣ୍ଟା ଚାମଚ ଥୁଆ ହୋଇଥାଏ, ଆଖପାଖରେ କେହି ସିଗାରେଟ୍ ପିଉ ନ ଥିଲେ ବି ବହୁତ ସିଗାରେଟ୍ ଗନ୍ଧ ହୋଇଥାଏ। ଏହି ସବୁ ଆଶ୍ଚର୍ଯ୍ୟମୟ କାରଣ ଯୋଗୁ କ୍ୟାପଟେନ୍ଙ୍କ ଆତ୍ମା ଏବେ ବି ଘୂରି ବୁଲୁଛି ବୋଲି ଲୋକେ ବିଶ୍ୱାସ କରନ୍ତି।
ଦେଖିବାକୁ ମିଳେ ସିପାହିଙ୍କ ଆତ୍ମା : ଆମେରିକା ମେରୀଲାଣ୍ଡର ପୋଟୋମାକ୍ ନଦୀ ତଟରେ ଅଛି ପିନି ପଏଣ୍ଟ ଲାଇଟ୍ ହାଉସ୍। ସିଭିଲ୍ ଓ୍ବାର ପରେ ଏହି ବତିଘରର କୁଖ୍ୟାତି ବଢ଼ିଯାଇଥିଲା। କାରଣ ସେତେବେଳେ ବତିଘରର ଦକ୍ଷିଣରେ କାରାଗାର କ୍ୟାମ୍ପମାନ ଲଗାଯାଇଥିଲା। ଯୁଦ୍ଧ ଶେଷରେ ଆତ୍ମସମର୍ପଣ କରିଥିବା ପ୍ରାୟ ୫୨,୦୦୦ ଯୁଦ୍ଧ ବନ୍ଦୀ ସିପାହିଙ୍କୁ ସେଠାରେ ରଖାଯାଇଥିଲା। ଆଉ ପ୍ରାୟ ୪୦୦୦ ବନ୍ଦୀଙ୍କର ମୃତ୍ୟୁ ସେଠାରେ ହୋଇଥିଲା। ମୃତକଙ୍କୁ ବତିଘର ନିକଟରେ ହିଁ କବର ଦିଆଯାଇଥିଲା। ପରେ ସେହି ସ୍ଥାନରୁ କବରଗୁଡିକୁ ହଟାଇ ଦିଆଯାଇଥିଲେ ବି ଲୋକେ ଅନେକ ସମୟରେ ମୃତ ସିପାହିଙ୍କ ଛାଇ ଦେଖିବାକୁ ପାଆନ୍ତି ବୋଲି ଦାବି କରନ୍ତି।
ଶିଶୁ ଓ ଯୁବକର ଆତ୍ମା : ୧୮୫୬ ମସିହାରେ ବ୍ୟାଟେରୀ ପଏଣ୍ଟ ଲାଇଟ୍ ହାଉସ୍ ନିର୍ମିତ ହୋଇଥିଲା, ଯାହା କାର୍ଲିଫନିଆର କ୍ରିସେଣ୍ଟ ସହରରେ ଅବସ୍ଥିତ। ଏଠାରେ ଗୋଟିଏ ଶିଶୁ ଏବଂ ଦୁଇଟି ଯୁବକର ଆତ୍ମା ରହିଛି ବୋଲି ଲୋକମାନଙ୍କଠାରୁ ଶୁଣିବାକୁ ମିଳେ। ହଠାତ୍ କେହି କାନ୍ଧକୁ ଛୁଇଁବା, ଆପେ ଆପେ ଚେୟାର ହଲିବା ପରି ଅନେକ ଘଟଣା ଘଟୁଥିବା କଥା ପର୍ଯ୍ୟଟକଙ୍କ
