ନୂଆଦିଲ୍ଲୀ,୨।୧(ପି.ଟି.): ଅତ୍ୟାବଶ୍ୟକ ସରକାରୀ ସେବାରେ ଆଧାର ନମ୍ବର ବ୍ୟବହାର ଜରୁରୀ ନୁହେଁ ବୋଲି ସୁପ୍ରିମକୋର୍ଟ ଗତବର୍ଷ ମାର୍ଚ୍ଚରେ ରାୟ ଦେଇଥିଲେ। ଏହା ସତ୍ତ୍ୱେ କେନ୍ଦ୍ର ସରକାର ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଅଧିନିୟମ (ଏମ୍ଜିଏନ୍ଆର୍ଇଜିଏ)ରେ ମଜୁରି ପୈଠ ପାଇଁ ଆଧାରଭିତ୍ତିକ ବ୍ୟବସ୍ଥାକୁ ବାଧ୍ୟତାମୂଳକ କରିଛନ୍ତି। ସରକାରଙ୍କ ଏଭଳି ନିଷ୍ପତ୍ତିକୁ ବିରୋଧୀ ଦଳ କଂଗ୍ରେସ ନିନ୍ଦା କରିବା ସହ ପ୍ରଯୁକ୍ତି ବିଶେଷକରି ଆଧାରକୁ ଅସ୍ତ୍ର କରାଯିବା ବନ୍ଦ ହେଉ ବୋଲି କହିଛି। ଏହାଦ୍ୱାରା ବହୁ ଗରିବ ଭାରତୀୟ ସାମାଜିକ କଲ୍ୟାଣ ସୁବିଧାରୁ ବଞ୍ଚତ୍ତ ହେବେ ବୋଲି ବିରୋଧୀ ଦଳ କହିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏମ୍ଜିଏନ୍ଆର୍ଇଜିଏକୁ ଅବହେଳା କରିଆସୁଥିବାବେଳେ ଏଥିରୁ ହିତାଧିକାରୀମାନଙ୍କୁ ବାଦ୍ ଦେବା ପାଇଁ ପ୍ରଯୁକ୍ତିକୁ ଅସ୍ତ୍ର ଭାବେ ବ୍ୟବହାର କରିବାରେ ଏକାଧିକ ଡିଜାଇନ୍ର ପ୍ରୟୋଗ କରିଛନ୍ତି।
କଂଗ୍ରେସର ଯୋଗାଯୋଗ ଦାୟିତ୍ୱରେ ଥିବା ସାଧାରଣ ସମ୍ପାଦକ ଜୟରାମ ରମେଶ କହିଛନ୍ତି, ଆଧାର ଭିତ୍ତିକ ପେମେଣ୍ଟ ବ୍ୟବସ୍ଥା (ଏବିପିଏସ୍) ଜରିଆରେ ଏମ୍ଜିଏନ୍ଆର୍ଇଜିଏ ମଜୁରି ପ୍ରଦାନକୁ ବାଧ୍ୟତାମୂଳକ କରିବା ଲାଗି ଥିବା ସମୟସୀମାକୁ ଗ୍ରାମାଞ୍ଚଳ ବିକାଶ ମନ୍ତ୍ରଣାଳୟ ପଞ୍ଚମ ଥରରେ ୨୦୨୩ ଡିସେମ୍ବର ୩୧ ପର୍ଯ୍ୟନ୍ତ ବଢ଼ାଇଥିଲେ। ଦେଶରେ ମୋଟ ୨୫.୬୯ କୋଟି ଏମ୍ଜିଏନ୍ଆର୍ଇଜିଏ ଶ୍ରମିକ ଥିବାବେଳେ ସେମାନଙ୍କ ମଧ୍ୟରୁ ୧୪.୩୩ କୋଟିଙ୍କୁ ସକ୍ରିୟ ବିବେଚନା କରାଯାଉଛି। ଡିସେମ୍ବର ୨୭ ସୁଦ୍ଧା ମୋଟ ପଞ୍ଜୀକୃତ ଶ୍ରମିକଙ୍କ ମଧ୍ୟରୁ ୩୪.୮ ପ୍ରତିଶତ (୮.୯ କୋଟି) ଏବଂ ସକ୍ରିୟ ଶ୍ରମିକଙ୍କ ମଧ୍ୟରୁ ୧୨.୭ ପ୍ରତିଶତ (୧.୮ କୋଟି ) ଏବିପିଏସ୍ରେ ମଜୁରି ପାଇବାକୁ ଯୋଗ୍ୟ ବିବେଚିତ ହୋଇ ନ ଥିବା ଜୟରାମ କହିଛନ୍ତି।
ଏମ୍ଜିଏନ୍ଆର୍ଇଜିଏ ମଜୁରି ପୈଠ ପାଇଁ ଏବିପିଏସ୍ ବ୍ୟବହାରରେ ବହୁ ଚ୍ୟାଲେଞ୍ଜ ରହିଥିବା ଶ୍ରମିକଙ୍କଠାରୁ ଆରମ୍ଭ କରି ଆଇନଜୀବୀ ଓ ଗବେଷକ ଅଭିଯୋଗ କରିବା ସତ୍ତ୍ୱେ କେନ୍ଦ୍ର ସରକାର ପ୍ରଯୁକ୍ତିକୁ ନେଇ ଧ୍ୱଂସାତ୍ମକ ପ୍ରୟୋଗ ଜାରି ରଖିଛନ୍ତି। ଦେଶର କୋଟି କୋଟି ଗରିବଙ୍କୁ ମୌଳିକ ଆୟରୁ ବଞ୍ଚତ୍ତ କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କର ଏହା ନିଷ୍ଠୁର ନବବର୍ଷ ଉପହାର ବୋଲି ଜୟରାମ ଅଭିଯୋଗ କରିଛନ୍ତି।
ଗତ ଅଗଷ୍ଟ ୩୦ରେ ଗ୍ରାମାଞ୍ଚଳ ବିକାଶ ମନ୍ତ୍ରଣାଳୟ ଏକ ବିବୃତିରେ କହିଥିଲା, ଏବିପିଏସ୍ ପାଇଁ ଅଯୋଗ୍ୟ ବିବେଚିତ ହେଉଥିବା ଶ୍ରମିକଙ୍କ ଜବ୍ କାର୍ଡକୁ କାଟିଦିଆଯିବ ନାହିଁ। ମଜୁରି ପୈଠ କରିବାରେ ଏବିପିଏସ୍ ସବୁଠୁ ଭଲ ଉପାୟ ବୋଲି ବିଭିନ୍ନ ଷ୍ଟେକ୍ହୋଲ୍ଡର ପରାମର୍ଶ ଦେଇଥିବା ମନ୍ତ୍ରଣାଳୟ କହିଥିଲା। ଏହାଦ୍ୱାରା ଶ୍ରମିକମାନେ ଠିକ୍ ସମୟରେ ସେମାନଙ୍କ ମଜୁରି ପାଇବେ ବୋଲି କୁହାଯାଇଥିଲା। କିନ୍ତୁ ୨୦୨୨ ଏପ୍ରିଲରୁ ଇତିମଧ୍ୟରେ ସିଷ୍ଟମରୁ ୭.୬ କୋଟି ପଞ୍ଜୀକୃତ ଶ୍ରମିକଙ୍କ ନାଁ କାଟିଦିଆଗଲାଣି। ଚଳିତ ଆର୍ଥତ୍କ ବର୍ଷର ପ୍ରଥମ ୯ ମାସରେ ୧.୯ କୋଟି ପଞ୍ଜୀକୃତ ଶ୍ରମିକ ବାଦ୍ ପଡ଼ିଛନ୍ତି। ମୋଦି ସରକାର ତରବରିଆ ଭାବେ ଆଧାର ପ୍ରମାଣୀକରଣ ଏବଂ ଏବିପିଏସ୍ ଲାଗୁ କରିବା ଫଳରେ ଭୁଲ୍କ୍ରମେ ଏତେସଂଖ୍ୟାରେ ଶ୍ରମିକଙ୍କ ନାଁ କିଣାଯାଇଥିବା ତଳସ୍ତରରୁ ହୋଇଥିବା ଯାଞ୍ଚରୁ ଜଣାପଡ଼ିଛି ବୋଲି କଂଗ୍ରେସ ନେତା କହିଛନ୍ତି। ଏବିପିଏସ୍ ଏବଂ ଅନ୍ୟାନ୍ୟ ପ୍ରଯୁକ୍ତିଗତ ହସ୍ତକ୍ଷେପ କାର୍ଯ୍ୟକାରୀ କରିବା ଉପରେ ବହୁସଂଖ୍ୟାରେ ପ୍ରତିନିଧି ଚିନ୍ତାବ୍ୟକ୍ତ କରିଥିଲେ ମଧ୍ୟ ମୋଦି ସରକାର ସେଥିପ୍ରତି କର୍ଣ୍ଣପାତ କରୁନାହାନ୍ତି।
ଏବିପିଏସ୍ରେ ମଜୁରି ପୈଠ ସାମର୍ଥ୍ୟ ବଢ଼ିବ ବୋଲି ମନ୍ତ୍ରଣାଳୟ ଦାବି କରୁଥିବାବେଳେ ତାହା ନିରାଧାର ବୋଲି ଜଣାପଡ଼ିଛି। ଲିବ୍ଟେକ୍ ଇଣ୍ଡିଆ ତଥ୍ୟରେ ଏହାକୁ ସମ୍ପୂର୍ଣ୍ଣ ଖାରଜ କରିଦିଆଯାଇଛି। ଆକାଉଣ୍ଟ ପ୍ରକ୍ରିୟା ଏବଂ ଆଧାର ଭିତ୍ତିକ ପୈଠ ବ୍ୟବସ୍ଥାରେ ସମୟ ବ୍ୟୟରେ ବିଶେଷ କିଛି ପ୍ରାର୍ଥକ୍ୟ ନ ଥିବା ୩.୨ କୋଟି ମଜୁରି କାରବାରକୁ ଅନୁଧ୍ୟାନ କରାଯିବା ପରେ ଜଣାପଡ଼ିଥିବା ଜୟରାମ କହିଛନ୍ତି।
