ପୁରୀ, ୧୮ା୬(ଅଜିତ୍ ମହାନ୍ତି) ପୁରୀ ପାଇକ ସାହିରେ ନକଲି ମହାପ୍ରସାଦ ପ୍ରସ୍ତୁତ କରାଯାଉଥିବା ଅଭିଯୋଗ ନେଇ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ସମେତ ସୁଆର ମହାସୁଆର ନିଯୋଗର କର୍ମକର୍ତ୍ତା ମୁହଁ ଖୋଲିଛନ୍ତି। ଏ ନେଇ ଅଭିଯୋଗକୁ ସୁଆର ମହାସୁଆର ନିଯୋଗର ସମ୍ପାଦକ ନାରାୟଣ ମହାସୁଆର ଖଣ୍ଡନ କରଛନ୍ତି। ନାରାୟଣ କହିଛନ୍ତି ଯେ, ଅନେକ ସ୍ଥାନରେ କୁଡୁଆରେ ରନ୍ଧାଯାଉଛି। ପ୍ରସାଦ ଭାବେ ଲୋକଙ୍କୁ ପ୍ରଦାନ କରାଯାଉଛି। ବର୍ଷସାରା ଏପରି ବିଭିନ୍ନ ସ୍ଥାନରେ ହେଉଛି। ତେବେ ଯେଉଁଠାରେ ଏପରି କୁଡୁଆରେ ରନ୍ଧାଯାଇ ବିକ୍ରି କରାଯାଉଛି, ତାହାକୁ ମହାପ୍ରସାଦ ନୁହେଁ ପ୍ରସାଦ କହି ବିକ୍ରି କରାଯାଉଛି। ଗଣାଲାଗି ଦିନ ଭକ୍ତ ହୁଅନ୍ତୁ ବା ପୁରୀବାସୀ ସେମାନେ ସେମାନଙ୍କ କାର୍ଯ୍ୟ ପାଇଁ ବିଭିନ୍ନ ଠାକୁରଙ୍କ ନିକଟରେ ରାନ୍ଧି ଭୋଗ କରି ପ୍ରସାଦ ଭାବେ ପାଇଥାନ୍ତି। ଶୁକ୍ରବାର ଯେଉଁ ଘଟଣା ଘଟିଛି, ସମ୍ପୃକ୍ତ ବ୍ୟକ୍ତି ବରାଦ ଦେଇଥିଲେ। ସେ ମଧ୍ୟ ଅନ୍ୟ ଠାକୁରଙ୍କ ନିକଟରେ ରାନ୍ଧି ତାଙ୍କୁ ପ୍ରସାଦ ଦେବା ପାଇଁ କହିଥିଲେ। ତେଣୁ ଯିଏ ବି ରାନ୍ଧିଥିଲେ ତାଙ୍କର କୌଣସି ଭୁଲ୍ ନାହିଁ। ନୃସିଂହ ମନ୍ଦିର ଠାରୁ ଆରମ୍ଭ କରି ବାରବାଟୀ ଜାଗାରେ ମାଟିହାଣ୍ଡିରେ ପ୍ରସାଦ ରନ୍ଧାଯାଇ ଲୋକଙ୍କୁ ପ୍ରଦାନ କରାଯାଇଛି। ତେବେ ଶ୍ରୀମନ୍ଦିରରେ ରନ୍ଧାଯାଇ ମହାପ୍ରଭୁଙ୍କ ନିକଟରେ ଭୋଗ କରାଯାଇ ଉକ୍ତ ଭୋଗକୁ ମା’ ବିମଳାଙ୍କୁ ଅର୍ପଣ କରାଯିବା ପରେ ତାହାକୁ ମହାପ୍ରସାଦ କୁହାଯାଇଥାଏ। ମାତ୍ର ଶ୍ରୀମନ୍ଦିର ବାହାରେ ଯେ କୌଣସି ଠାକୁରଙ୍କ ନିକଟରେ କୁଡୁଆରେ ଭୋଗ ପ୍ରସ୍ତୁତ କରାଗଲେ ତାହାକୁ ମହାପ୍ରସାଦ କୁହାଯାଏ ନାହିଁ। ବରଂ ତାହାକୁ ପ୍ରସାଦ କୁହାଯାଇଥାଏ। ଶୁକ୍ରବାର ଯେଉଁ ରୋଷେଇ କରାଯାଉଥିଲା, ତାହା ଅବଢ଼ା ନୁହେଁ ବରଂ ଶଙ୍ଖୁଡ଼ି ଭୋଗ ଥିଲା। ଏ ନେଇ ସମ୍ପୃକ୍ତ ବ୍ୟକ୍ତିଙ୍କୁ ପଚରାଉଚରା କରାଯିବାରୁ ସେ ପ୍ରସାଦ ବୋଲି କହିଥିଲେ। ଯଦି ସେ ମହାପ୍ରସାଦ କହି ବିତରଣ କରୁଥିବେ ତାହାଲେ ସମ୍ପୂର୍ଣ୍ଣ ଭୁଲ। କିନ୍ତୁ ପ୍ରସାଦ କହି ବିତରଣ କରୁଥିଲେ ଭୁଲ୍ ନୁହେଁ ବୋଲି ନାରାୟଣ କହିଛନ୍ତି।
ସେହିପରି ସୁଆର ମହାସୁଆର ନିଯୋଗ ସଭାପତି ପଦ୍ମନାଭ ମହାସୁଆର କହିଛନ୍ତି, ଟେଣ୍ଟ ମଧ୍ୟରେ ଯେଉଁଭଳି ପ୍ରସାଦ ପ୍ରସ୍ତୁତ କରି ବିକ୍ରି କରାଯାଉଥିଲା ତାହା ଅତି ନିନ୍ଦନୀୟ ଘଟଣା। ଶ୍ରୀଜଗନ୍ନାଥ ସଂସ୍କୃତିର ଅପପ୍ରଚାର କରିବାକୁ କିଛି କୁଚକ୍ରୀ ଗୋଷ୍ଠୀ କାର୍ଯ୍ୟ କରୁଛନ୍ତି। ଏ ନେଇ ସେ ନିଯୋଗ ପକ୍ଷରୁ ସିଂହଦ୍ୱାର ଥାନାରେ ଏତଲା ଦେବା ସହ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କୁ ଅବଗତ କରିଛନ୍ତି। ଶ୍ରୀମନ୍ଦିର ବ୍ୟତୀତ ଅନ୍ୟ କୌଣସି ସ୍ଥାନରେ ହାଣ୍ଡି ଓ କୁଡୁଆର ବ୍ୟବହାର ଉପରେ ରୋକ ଲଗାଯାଉ ବୋଲି ସେ କହିଛନ୍ତି। ଉକ୍ତ ଘଟଣା ଜଗନ୍ନାଥପ୍ରେମୀଙ୍କ ମନରେ ଆଘାତ ଦେଇଛି। ଯଦି ଶ୍ରୀମନ୍ଦିରର କୌଣସି ସୁଆର କିମ୍ବା କର୍ମଚାରୀ ଏଥିରେ ସାମିଲ ରହିଥାନ୍ତି ତେବେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉ ବୋଲି ସଭାପତି କହିଛନ୍ତି। ଶ୍ରୀମନ୍ଦିର ମୁଖ୍ୟ ପ୍ରଶାସକ ରଞ୍ଜନ କୁମାର ଦାସ କହିଛନ୍ତି, ସିଂହଦ୍ୱାର ଥାନାରେ ସୁଆର ମହାସୁଆର ନିଯୋଗ ପକ୍ଷରୁ ଦିଆଯାଇଥିବା ଏତଲା ଆଧାରରେ ତଦନ୍ତ ଚାଲିଛି। ତଦନ୍ତ ପରେ ପଦକ୍ଷେପ ନିଆଯିବ।
