ବ୍ରହ୍ମପୁର ଅଫିସ,୩ା୬: ବ୍ରହ୍ମପୁର ମହାନଗର ନିଗମ (ବିଇଏମସି) ପକ୍ଷରୁ ସହରବାସୀଙ୍କ ଆମୋଦ ପ୍ରମୋଦ ଓ ବ୍ୟାୟାମ ନିମନ୍ତେ ମିନି ପାର୍କ ନିର୍ମାଣ କରାଯାଇଛି। ନିଗମ ପକ୍ଷରୁ ୨୦୨୨-୨୩ ଆର୍ଥିକ ବର୍ଷରେ ୪କୋଟି ୯ ଲକ୍ଷ ୮ ହଜାର ଟଙ୍କା ବ୍ୟୟରେ ୪୬ଟି ମିନି ପାର୍କ ନିର୍ମାଣ କରାଯାଇଛି। ଏହି ପାର୍କ ଗୁଡିକରେ ଚଲାପଥ, ଜିମ ଓ ବସିବା ନିମନ୍ତେ ଚଉକି ନିର୍ମାଣ କରାଯାଇଛି। ପାର୍କ ପରିସରରେ ପେଭର ବ୍ଲକ ରାସ୍ତା, ଆଲୋକୀକରଣ ବ୍ୟବସ୍ଥା ସହ ସ୍ବଚ୍ଛତା ନିମନ୍ତେ ଡଷ୍ଟବିନ ରଖାଯାଇଛି। ସକାଳେ ଓ ସନ୍ଧ୍ୟାରେ ପାର୍କକୁ ବରିଷ୍ଠ ନାଗରିକଙ୍କଠାରୁ ଆରମ୍ଭ କରି ପିଲାମାନେ ମଧ୍ୟ ଆସିଥାନ୍ତି। ଯୁବପୀଢ଼ୀ ଓ ବରିଷ୍ଠ ନାଗରିକମାନେ ପାର୍କରେ ଥିବା ବ୍ୟାୟମ ଉପକରଣରେ ବ୍ୟବହାର କରିଥାନ୍ତି। ତେବେ ଏଭଳି ପାର୍କ ରହିଛି ଯାହାକି ବର୍ତ୍ତମାନ ଅବହେଳିତ ହୋଇରହିଛି। ନିଗମର ଅସାବଧାନତା କାରଣରୁ ପାର୍କ ପରିସରରୁ ବ୍ୟାୟମ ଉପକରଣ ଚୋରି ହେଉଥିବା ଅଭିଯୋଗ ହୋଇଛି। ଏଥିସହ ସିମେଣ୍ଟ ଚଉକିଗୁଡିକ ଭାଙ୍ଗି ରୁଜି ଯାଇଥିବା ଦେଖିବାକୁ ମିଳିଛି। ବିଇଏମସିର ୨୩ ନଂ. ୱାର୍ଡ ଅନ୍ତର୍ଗତ ଗୋଲାପଲୀ ବନ୍ଧ ପାର୍କରେ ଏଭଳି ସମସ୍ୟା ଦେଖିବାକୁ ମିଳିଛି।
ଗୋଲାପଲୀ ବନ୍ଧ ପାର୍କ ୩ ବର୍ଷ ତଳେ ନିର୍ମାଣ କରାଯାଇଥିଲା। ପାର୍କ ପରିସରରେ ସମସ୍ତ ପ୍ରକାର ବ୍ୟାୟମ ଉପକରଣଠାରୁ ଆରମ୍ଭ କରି ସାୈନ୍ଦର୍ଯ୍ୟକରଣ ମଧ୍ୟ କରାଯାଇଛି। କିନ୍ତୁ ବିଇଏମସିର ଅସାବଧାନତାରୁ ବର୍ତ୍ତମାନ ପାର୍କ ପରିସରରୁ ବହୁ ବ୍ୟାୟମ ଉପକରଣ ଚୋରି ହୋଇଥିବା ଅଭିଯୋଗ ହୋଇଛି। ଏଠାରେ ଥିବା ୧୦ରୁ ଉର୍ଦ୍ଧ୍ୱ ଉପକରଣ କଟାଯାଇ ଚୋରି ହୋଇଛି। ଚୋରି ନେଇ ଅଭିଯୋଗ ପରେ ମଧ୍ୟ ନିଗମ ପକ୍ଷରୁ କାୈଣସି କାର୍ଯ୍ୟାନୁ୍ଷ୍ଠାନ ଗ୍ରହଣ କରାଯାଉ ନ ଥିବା ଅଭିଯୋଗ ହୋଇଛି। ପାର୍କ ମଧ୍ୟରେ ପେଭର ବ୍ଲକ ମଧ୍ୟ ଦବି ଯାଇଛି। ଯାହାଦ୍ୱାରା ବରିଷ୍ଠ ନାଗରିକମାନେ ଚାଲିବା ସମୟରେ ଅସୁବିଧା ଭୋଗୁଉଛନ୍ତି। ପାର୍କରେ ପରିଷ୍କାର ପରିଚ୍ଛନତା ପ୍ରତି ଦୃଷ୍ଟି ଦିଆଯାଉ ନାହିଁ। ଲାଇଟ ଜଳୁନାହିଁ। ଫଳରେ ସନ୍ଧ୍ୟା ସମୟରେ ପାର୍କ ମଧ୍ୟରେ ଅନ୍ଧାରର ସୁଯୋଗ ନେଇ ଅସାମାଜିକ ଯୁବକମାନେ ଆଡ୍ଡା ଜମାଉଛନ୍ତି। ପାର୍କର ରକ୍ଷଣାବେକ୍ଷଣ ନିମନ୍ତେ ଜଣେ କର୍ମଚାରୀ ନିୟୋଜିତ ରହିଥିବା ବେଳେ ସେ ଠିକ ସମୟରେ ଆସୁ ନ ଥିବା କାରଣରୁ ପାର୍କଟି ଅନେକ ସମୟରେ ବନ୍ଦ ରହୁଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଏ ନେଇ ବିଇଏମସି ନିର୍ବାହୀ ଯନ୍ତ୍ରୀ ଇଂ ଲଳିତ ମୋହନ ଦାଶଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି, ପ୍ରତି ୱାର୍ଡରେ ପାର୍କର ରକ୍ଷଣାବେକ୍ଷଣ ନିମନ୍ତେ ଏସଏଚଜିଙ୍କୁ ଦାୟିତ୍ୱ ପ୍ରଦାନ କରାଯିବ। ଏସଏଚଜିମାନେ ପାର୍କର ରକ୍ଷଣାବେକ୍ଷଣ ଦାୟିତ୍ୱ ତୁଲାଇବେ ବୋଲି ସେ କହିଛନ୍ତି।
