ଖୋର୍ଦ୍ଧା ଅଫିସ,୪ା୧: ସ୍ଥାନୀୟ ବକ୍ସି ଜଗବନ୍ଧୁ ଉଚ୍ଚ ବିଦ୍ୟାଳୟରେ ବୁଧବାର ଠାରୁ ୬ତାରିଖ ପର୍ଯ୍ୟନ୍ତ ତିନିଦିନ ବ୍ୟାପୀ ଶିକ୍ଷକ ଶିକ୍ଷା ନିର୍ଦ୍ଦେଶାଳୟ ଓ ରାଜ୍ୟ ଶିକ୍ଷା ଗବେଷଣା ପ୍ରଶିକ୍ଷଣ ପରିଷଦ ଓ ଜିଲା ଶିକ୍ଷା କାର୍ଯ୍ୟାଳୟ ଆନୁକୂଲ୍ୟରେ ୪୯ତମ ରାଜ୍ୟସ୍ତରୀୟ ବିଜ୍ଞାନ, ଗଣିତ ଓ ପରିବେଶ ପ୍ରଦର୍ଶନୀ ଅନୁଷ୍ଠିତ ହେବ। ଏଥିରେ ରାଜ୍ୟର ବିଭିନ୍ନ ଜିଲାରୁ ମନୋନୀତ ହୋଇଥିବା କୁନି କୁନି ପ୍ରକଳ୍ପକକାରୀ ଅଂଶଗ୍ରହଣ କରିବେ। ‘ପ୍ରଯୁକ୍ତି ବିଦ୍ୟା ଓ ଖେଳନା’ ବିଷୟ ଆଧାରିତ ଏହି ତ୍ରିଦିବସୀୟ ରାଜ୍ୟସ୍ତରୀୟ ବିଜ୍ଞାନ ପ୍ରଦର୍ଶନୀରେ ବିଜ୍ଞାନ ସେମିନାର, ବିଜ୍ଞାନ କୁଇଜ୍, ବିଜ୍ଞାନ କଥନ ଓ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ। ପ୍ରତି ଜିଲାରୁ ୭ଟି ବିଷୟରେ ୭ ଜଣ ଲେଖାଏ ଛାତ୍ରୀଛାତ୍ର ଯୋଗଦେବେ। ତାଙ୍କ ସହିତ ୭ ଜଣ ଗାଇଡ୍ ଶିକ୍ଷକ ଓ ଜଣେ ବିଜ୍ଞାନ ପରିଦର୍ଶକ ଏହିଭଳି ୩୦ଟି ଜିଲାରୁ ୨୧୦ ପ୍ରକଳ୍ପ ସ୍ଥାନ ପାଇବ। ମୋଟ୍ ୪୫୦ ଛାତ୍ରୀଛାତ୍ର, ଗାଇଡ୍ ଶିକ୍ଷକ, ବିଜ୍ଞାନ ପରିଦର୍ଶକ ଯୋଗଦେବେ। ଏନେଇ ଜିଲା ଶିକ୍ଷା ବିଭାଗ ପକ୍ଷରୁ ସମସ୍ତ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି। ବାଳକମାନେ ବିଜେବି ହାଇସ୍କୁଲ ଓ ବାଳିକାମାନେ ସରକାରୀ ବାଳିକା ହାଇସ୍କୁଲରେ ରହିବେ। ବୁଧବାର ପୂର୍ବାହ୍ନ ୧୧ଟାରେ କାର୍ଯ୍ୟକ୍ରମ ଉଦ୍ଘାଟନ ହେବ। ୫ତାରିଖରେ ଅଂଶଗ୍ରହଣ କରିଥିବା ଛାତ୍ରୀଛାତ୍ର ଜାତୀୟ ବିଜ୍ଞାନ ଶିକ୍ଷା ଓ ଅନୁସନ୍ଧାନ ସଂସ୍ଥାନ(ନାଇଜର) ଭୁବନେଶ୍ୱର କ୍ୟାମ୍ପସ କ୍ଷେତ୍ର ପରିଦର୍ଶନ କରିବେ। ଅପରାହ୍ନ ୨ଟା ୩୦ରୁ ୮ଟା ୩୦ ପର୍ଯ୍ୟନ୍ତ ପିଲାଙ୍କ ମଧ୍ୟରେ ପ୍ରକଳ୍ପ ପରିଦର୍ଶନ, ବିଜ୍ଞାନ କୁଇଜ୍, ବିଜ୍ଞାନ ଆଲୋଚନା ଚକ୍ର ଏବଂ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହେବ। ୬ତାରିଖ ଅପରାହ୍ନ ୨ଟାରେ ଉଦ୍ଯାପନୀ ସମାରୋହ ଅନୁଷ୍ଠିତ ହେବ।
ଏନେଇ ଶିକ୍ଷକ ଶିକ୍ଷା ନିର୍ଦ୍ଦେଶାଳୟ ଏବଂ ରାଜ୍ୟ ଶିକ୍ଷା ଗବେଷଣା ପ୍ରଶିକ୍ଷଣ ପରିଷଦ (ଏସ୍ସିଇଆରଟି)ର ନିର୍ଦ୍ଦେଶକ ମନୋଜ ପାଢ଼ୀ କହିଥିଲେ, ରାଜ୍ୟ ଓ ଜାତୀୟ ସ୍ତରରେ ବିଜ୍ଞାନ, ଗଣିତ, ପ୍ରଯୁକ୍ତିବିଦ୍ୟାକୁ ଲୋକାଭିମୁଖୀ କରିବା ସହିତ ଛାତ୍ରୀଛାତ୍ରଙ୍କ ମଧ୍ୟରେ ନୂତନ ଉଦ୍ଭାବନ ଓ ଅନୁସନ୍ଧିତ୍ସୁ ମନୋଭାବ ସୃଷ୍ଟି ପାଇଁ ଏହି ବିଜ୍ଞାନ ପ୍ରଦର୍ଶନୀ ଆୟୋଜନ କରାଯାଇଛି। ମଙ୍ଗଳବାର ଅତିରିକ୍ତ ଜିଲା ଶିକ୍ଷାଧିକାରୀ (ଏବିଇଓ) ସ୍ନିଗ୍ଧା ମିଶ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଅତିରିକ୍ତ ଜିଲା ଶିକ୍ଷାଧିକାରୀ ଡ. ଅମ୍ରିତା ପ୍ରୀତିନନ୍ଦା ଓ ଜିଲା ବିଜ୍ଞାନ ପରିଦର୍ଶକ ସରୋଜ କୁମାର ସିଂହ ଯୋଗଦେଇ ଶୃଙ୍ଖଳିତ ଓ ବ୍ୟବସ୍ଥିତ ଭାବେ ପ୍ରଦର୍ଶନୀ ଆୟୋଜନ ନେଇ ଗୁରୁତ୍ୱାରୋପ କରିଥିଲେ। ୧୦ ବ୍ଲକର ବ୍ଲକ ଶିକ୍ଷାଧିକାରୀ (ବିଇଓ) ଉପସ୍ଥିତ ଥିଲେ। ବୈଠକରେ ବିଜେବି ହାଇସ୍କୁଲର ପ୍ରଧାନଶିକ୍ଷକ ସେକ୍ ଗୋହର ଅଲ୍ଲି, ଶିକ୍ଷକ ରଞ୍ଜନ କୁମାର ଦାଶ, ସୁଧାକର ମହାପାତ୍ର, ଶିକ୍ଷକ ବିଭୁ ପ୍ରସାଦ ସେନାପତି, ସୁରେଶ ଚନ୍ଦ୍ର ବିଶ୍ୱାଳ, ପ୍ରସନ୍ନ ମହାପାତ୍ର, ଅଗାଧୁ ସେଠୀ, ମୃତ୍ୟୁଞ୍ଜୟ ମହାପାତ୍ର, ମାନସ ରଞ୍ଜନ ପଣ୍ଡା, ଅଞ୍ଜନ କୁମାର ରାୟ, ପ୍ରହଲ୍ଲାଦ ବାରିକ, ରତ୍ନାକର ରାଉତରାୟ, ତୋଫାନ ରାଉତରାୟ, ଅଭିରାମ ବେହେରା, ପ୍ରସନ୍ନ ମହାପାତ୍ର ପ୍ରମୁଖ ଉପସ୍ଥିତ ଥିଲେ।
