ଭୁବନେଶ୍ୱର,୨୬ା୪(ବ୍ୟୁରୋ): ରାଜ୍ୟରେ ଅସହ୍ୟ ଗ୍ରୀଷ୍ମ ପ୍ରବାହ ଜାରି ରହିଛି। ଏଭଳି ସ୍ଥିତିରେ ଜଳର ଘୋର ଅଭାବ ମଧ୍ୟ ଦେଖାଦେଇଛି। ସାଧାରଣ ଲୋକ ପିଇବା ପାଣି ମୁନ୍ଦାଏ ପାଇପାରୁ ନାହାନ୍ତି। ରାଜ୍ୟ ସରକାରଙ୍କ ଅହେତୁକ କମ୍ପାନୀ ପ୍ରୀତି ଏହାର ପ୍ରମୁଖ କାରଣ। ନଦୀଗୁଡ଼ିକରୁ ବିଭିନ୍ନ କମ୍ପାନୀ କର୍ତ୍ତୃପକ୍ଷ ଅନୈତିକ ଉପାୟରେ ଜଳ ଶୋଷି ନେଉଛନ୍ତି। ତେଣୁ ଅଧିକାଂଶ ନଦୀ ଶୁଖିଲା ପଡ଼ିଛି ବୋଲି ଭାଜପା ନଦୀ ସୁରକ୍ଷା ସମିତି (ନମାମୀ ଗଙ୍ଗେ) ବୈଠକରେ ଯୋଗଦେଇ ରାଜ୍ୟ ସଭାପତି ସମୀର ମହାନ୍ତି କହିଛନ୍ତି। ଏହି ଅବସରରେ ବିଭିନ୍ନ ମତ ଉପରେ ସହମତି ନେଇ ନଦୀ ପାଣିର ସୁରକ୍ଷା ପାଇଁ ଏବଂ କମ୍ପାନୀର ଏତାଦୃଶ ବେଆଇନ କାର୍ଯ୍ୟ ବିରୋଧରେ ଆସନ୍ତା ୫ ତାରିଖରେ ନଦୀ ସୁରକ୍ଷା ସମିତିର ଏକ ଉଚ୍ଚସ୍ତରୀୟ ପ୍ରତିନିଧିମଣ୍ଡଳୀ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟି ଦାବି ଜଣାଇବେ। ଆସନ୍ତା ୯ରୁ ୧୩ ତାରିଖ ପର୍ଯ୍ୟନ୍ତ ରାଜ୍ୟର ପର୍ଯ୍ୟାୟକ୍ରମେ ୫୮ଟି ସବ୍ଡିଭିଜନରେ ଉକତ୍ଟ କୃତ୍ରିମ ଜଳାଭାବ ନେଇ ରାଜ୍ୟପାଳଙ୍କ ଉଦ୍ଦେଶ୍ୟରେ ଉପଜିଲାପାଳଙ୍କ କାର୍ଯ୍ୟାଳୟ ଆଗରେ ବିକ୍ଷୋଭ ପ୍ରଦର୍ଶନ ସହ ଦାବିପତ୍ର ଦିଆଯିବ ବୋଲି ବୈଠକରେ ମତ ପ୍ରକାଶ ପାଇଛି। ବିଶେଷକରି କେନ୍ଦୁଝର, ସୁନ୍ଦରଗଡ଼ ଆଦି ଜିଲାରେ ବଡ଼ ବଡ଼ ଲୁହାପଥର କମ୍ପାନୀମାନେ ଲୁହାପଥର ଗୁଣ୍ଡକୁ ବଡ଼ ବଡ଼ ପାଇପ ମାଧ୍ୟମରେ ନଦୀ ପାଣିକୁ ପ୍ରବାହିତ କରି ବନ୍ଦର ପର୍ଯ୍ୟନ୍ତ ନେଉଛନ୍ତି। ଏହି ଅବସରରେ ସ୍ବାଧୀନତାର ୭୫ତମ ଅମୃତ ମହୋତ୍ସବ ବର୍ଷରେ ଭାରତବର୍ଷର ପ୍ରତ୍ୟେକ ଜିଲାରେ ୭୫ଟି ଜଳାଶୟ ସୃଷ୍ଟି କରାଯିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆହ୍ବାନକୁ ସ୍ବାଗତଯୋଗ୍ୟ ବୋଲି କହିଛନ୍ତି।
