ବରଗଡ଼,୨୧।୭(ପ୍ରେମାନନ୍ଦ ଖମାରୀ)- ବରଗଡ଼ ସହର ମଧ୍ୟ ଦେଇ ପ୍ରବାହିତ ଜୀରାନଦୀକୁ ପ୍ରଦୂଷଣମୁକ୍ତ କରିବା ଏବଂ ସହରର ବ୍ୟବହୃତ ଜଳ ପରିଚାଳନା ବ୍ୟବସ୍ଥାକୁ ସୁଦୃଢ଼ କରିବା ପାଇଁ ରାଜ୍ୟ ସରକାର ଏକ ବଡ଼ ପ୍ରକଳ୍ପକୁ ମଞ୍ଜୁରୀ ପ୍ରଦାନ କରିଛନ୍ତି। ବରଗଡ଼ ବିଧାୟକ ଅଶ୍ୱିନୀ କୁମାର ଷଡ଼ଙ୍ଗୀଙ୍କ ପ୍ରଚେଷ୍ଟା ଫଳରେ ସହରରେ ୧୫ ଏମଏଲଡି କ୍ଷମତା ବିଶିଷ୍ଟ ନର୍ଦ୍ଦମା ଜଳ ବିଶୋଧନାଗାର ଅର୍ଥାତ୍ ଏସଟିପି ନିର୍ମାଣ ପାଇଁ ରାଜ୍ୟ ସରକାରଙ୍କ ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ପ୍ରଶାସନିକ ମଞ୍ଜୁରି ମିଳିଛି। ଏହି ପ୍ରକଳ୍ପର ମୋଟ୍ ବ୍ୟୟ ଅଟକଳ ୧୭୮ କୋଟି ୫୦ ଲକ୍ଷ ୭୯ ହଜାର ୭୯ ଟଙ୍କା ରହିଛି।
ସହରର ମଇଳା ଓ ଆବର୍ଜନା ପାଣି ସିଧାସଳଖ ଜୀରାନଦୀରେ ପଡ଼ି ଜଳକୁ ପ୍ରଦୂଷିତ କରୁଥିବାରୁ ଏହି ପ୍ରକଳ୍ପ ମାଧ୍ୟମରେ ସେହି ସମସ୍ୟାର ସ୍ଥାୟୀ ସମାଧାନ କରାଯିବ। ପ୍ରକଳ୍ପ ଅନ୍ତର୍ଗତ ଜଳ ସଂଗ୍ରହ ପାଇଁ ପ୍ରମୁଖ ଡ୍ରେନର ସର୍ଭେ, ଡିଜାଇନ ଓ ନିର୍ମାଣ, ଇଣ୍ଟରସେପ୍ସନ୍ ଓ ଡାଇଭର୍ସନ୍ ବ୍ୟବସ୍ଥା, ୨୦ ଏମଏଲଡି କ୍ଷମତା ବିଶିଷ୍ଟ ମୁଖ୍ୟ ପମ୍ପିଂ ଷ୍ଟେସନ୍, ୧୫ ଏମଏଲଡି କ୍ଷମତା ବିଶିଷ୍ଟ ଏସଟିପି, ଟ୍ରିଟେଡ୍ ୱାଟର ରିଉଜ୍ ସିଷ୍ଟମ୍ ଏବଂ ୧୦ ବର୍ଷର ପରିଚାଳନା ଓ ରକ୍ଷଣାବେକ୍ଷଣ ବ୍ୟବସ୍ଥା କରାଯିବ।
ଏହି ପ୍ରକଳ୍ପ ପାଇଁ ଧାର୍ଯ୍ୟ ଅର୍ଥ ମଧ୍ୟରୁ ପ୍ରମୁଖ ଡ୍ରେନ ନିର୍ମାଣ ପାଇଁ ୭୪.୩୩ କୋଟି ଟଙ୍କା, ଇଣ୍ଟରସେପ୍ସନ୍, ଡାଇଭର୍ସନ୍, ପମ୍ପିଂ ବ୍ୟବସ୍ଥା ଏବଂ ରକ୍ଷଣାବେକ୍ଷଣ ପାଇଁ ୩୮.୧୭ କୋଟି ଟଙ୍କା ଏବଂ ଏସଟିପି ସହ ଟ୍ରିଟେଡ୍ ୱାଟର ରିଉଜ୍ ସିଷ୍ଟମ୍ ଓ ରକ୍ଷଣାବେକ୍ଷଣ ପାଇଁ ୬୫.୯୯ କୋଟି ଟଙ୍କା ବ୍ୟୟ ଅଟକଳ କରାଯାଇଛି। ଏହି ସମସ୍ତ ଖର୍ଚ୍ଚ ଏଫସି ଟାଏଡ୍ ଗ୍ରାଣ୍ଟ ଜରିଆରେ ବହନ କରାଯିବ। ଓଡ଼ିଶା ୱାଟର ସପ୍ଲାଇ ଆଣ୍ଡ ସିୱେରେଜ ବୋର୍ଡକୁ ଏହି ପ୍ରକଳ୍ପର କାର୍ଯ୍ୟାନ୍ୱୟନ ଦାୟିତ୍ୱ ଦିଆଯାଇଥିବାବେଳେ ସମସ୍ତ କାର୍ଯ୍ୟ ଓପିଡବ୍ଲୁଡି କୋଡ୍ ଅନୁଯାୟୀ ଏବଂ ନିର୍ଦ୍ଧାରିତ ସମୟସୀମା ମଧ୍ୟରେ ସମ୍ପନ୍ନ କରିବାକୁ ବିଭାଗ ପକ୍ଷରୁ କଡ଼ା ନିର୍ଦ୍ଦେଶ ଦିଆଯାଇଛି, ଯାହାଦ୍ୱାରା ପ୍ରକଳ୍ପ କାର୍ଯ୍ୟରେ ଅନାବଶ୍ୟକ ବିଳମ୍ବ ଓ ବ୍ୟୟ ବୃଦ୍ଧିକୁ ଏଡ଼ାଯାଇପାରିବ।
