କାକଟପୁର ମଙ୍ଗଳା ମନ୍ଦିର ବିଧି: ପ୍ରଥମେ ମା’ ମଙ୍ଗଳାଙ୍କର ମହାସ୍ନାନ କରାଯାଇଥାଏ। – ମହାସ୍ନାନ ପରେ ମା’ଙ୍କର ବଡ଼ ସିଂହାର ବେଶ କରାଯାଇଥାଏ। – ଏହାପରେ ମା’ ମଙ୍ଗଳାଙ୍କ ସେବକ ଶ୍ରୀମନ୍ଦିରର ଲେଙ୍କା ସେବକ ନେଇଥିବା ଶ୍ରୀସୁଦର୍ଶନ ମହାରାଜାଙ୍କୁ ଗ୍ରହଣ କରିଥାନ୍ତି। ମା’ ମଙ୍ଗଳାଙ୍କର ସିଂହାସନ ବାମ ପାର୍ଶ୍ୱରେ ଶ୍ରୀସୁଦର୍ଶନଙ୍କୁ ବିଜେ କରାଇ ନବକଳେବରର ସମସ୍ତ କାମ ସୁସମ୍ପାଦନ ନିମନ୍ତେ ନିଜକୁ ଶରଣାଗତ କରାଇଥାନ୍ତି। -ଶ୍ରୀମନ୍ଦିରରୁ ଯାଇଥିବା ମହାପ୍ରଭୁଙ୍କ ଶ୍ରୀମହାପ୍ରସାଦ ହରିବୋଲ ହୁଳହୁଳି ମଧ୍ୟରେ ମା’ଙ୍କୁ ସମର୍ପିତ ହୋଇଥାଏ। ସମର୍ପଣ ହେବାର ବିଧି ହେଉଛି ମହାପ୍ରଭୁଙ୍କର ଆଜ୍ଞା ମା’ଙ୍କୁ ଦିଆଗଲା। – ଏହାପରେ ଆସେ ଶରଣାଗତ ବିଧି। ଏହି ବିଧିରେ ବନଯାଗ ଯାତ୍ରୀମାନେ ମା’ମଙ୍ଗଳାଙ୍କ ମହାସ୍ନାନ ପାଦୁକ ସେବନ କରିଥାନ୍ତି। – ଶରଣାଗତ ହେବା ପରେ ବିଧି ମୁତାବକ ଶ୍ରୀମନ୍ଦିରରୁ ଯାଇଥିବା ଶ୍ରୀପତିତପାବନ ପତାକା ମା’ଙ୍କ ମନ୍ଦିରର ଶିଖର ଦେଶରେ ବନ୍ଧା ଯାଇଥାଏ। ଏହି ସମୟରେ ପୂର୍ବରୁ ଲାଗିଥିବା ପତାକା ଓଲାଗି ହୁଏ ନାହିଁ। ଅର୍ଥାତ୍ ପୁରୁଣା ପତାକା ସହିତ ଶ୍ରୀପତିତପାବନ ପତାକା ଏକାଠି ବନ୍ଧା ହୋଇ ରହେ। ଏହିଠାରେ ଜଗତର ମଙ୍ଗଳମୟ ଓ ମଙ୍ଗଳମୟୀ ଚେତନା ଏକାକାର ହୋଇଥାନ୍ତି। ମହାପ୍ରଭୁଙ୍କ ପ୍ରତିନିଧି କାକଟପୁର ମନ୍ଦିରର ସିଂହାସନରେ ଥିବାବେଳେ ତାଙ୍କ ପ୍ରତୀକ ଶ୍ରୀପତିତପାବନ ପତାକା ମନ୍ଦିର ଚୂଡ଼ାରେ ରହିଥାଏ। – ଶେଷରେ ସମସ୍ତେ ସେଠାରେ ସମର୍ପିତ ଭାବନାରେ ସାଷ୍ଟାଙ୍ଗ ପ୍ରଣାମ କରିବା ପରେ ମା’ଙ୍କ ସେବକ ଶ୍ରୀସୁଦର୍ଶନ ମହାରାଜାଙ୍କୁ ଲେଙ୍କା ସେବକଙ୍କୁ ହସ୍ତାନ୍ତର କରିଥାନ୍ତି। ଲେଙ୍କା ସେବକ ଶ୍ରୀସୁଦର୍ଶନଙ୍କୁ ଗ୍ରହଣ କରି ଶୋଭାଯାତ୍ରା ଆଗରେ ରହି ମଙ୍ଗଳାଙ୍କ ମନ୍ଦିରଠାରୁ ଶବରପଲ୍ଲୀକୁ ( ଦେଉଳି ମଠ) ଆସନ୍ତି। ଏହା ସାଧାରଣ ଭାବରେ ମା’ ମଙ୍ଗଳାଙ୍କର ମାଜଣା ରୂପରେ ପ୍ରସିଦ୍ଧ ।
