କଲମ୍ବୋ,୨୨।୧୦ : ଶ୍ରୀଲଙ୍କାରେ ଚାଲିଥିବା ଅର୍ଥନୈତିକ ସଙ୍କଟର ଗୁରୁତର ସାମାଜିକ ପରିଣାମ ଦେଖିବାକୁ ମିଳୁଛି। ଗ୍ରାମାଞ୍ଚଳରେ ଲୋକେ ପାରିବାରିକ ଖର୍ଚ୍ଚ ପୂରଣ କରିବାରେ ଅସୁବିଧାର ସମ୍ମୁଖୀନ ହେବା ସହିତ ଗରିବ ଲୋକମାନେ ସେମାନଙ୍କର ନାବାଳିକା ଝିଅମାନଙ୍କର ବିବାହ କରୁଛନ୍ତି। ଶ୍ରୀଲଙ୍କା ରେଡ କ୍ରସ ସୋସାଇଟି ଏବଂ ଅନ୍ତର୍ଜାତୀୟ ଫେଡେରେଶନ ଅଫ ରେଡ କ୍ରସର ମିଳିତ ସର୍ବେକ୍ଷଣରୁ ଏହା ଜଣାପଡ଼ିଛି। ସମାଜବିଜ୍ଞାନୀମାନେ କହିଛନ୍ତି ଯେ ଯଦି ଏହି ଧାରାକୁ ନିୟନ୍ତ୍ରଣ କରା ନଯାଏ ତେବେ ଶ୍ରୀଲଙ୍କାକୁ ଏହାର ଦୀଘକାଳୀନ ଖରାପ ପରିଣାମକୁସାମ୍ନା କରିବାକୁ ପଡିବ।
ରେଡକ୍ରସର ଶ୍ରୀଲଙ୍କା ଏବଂ ଅନ୍ତର୍ଜାତୀୟ ଶାଖା ଗ୍ରାମୀଣ ଲୋକଙ୍କ ମାନସିକ ସ୍ଥିତିର ଚିତ୍ର ଉପସ୍ଥାପନ କରିଛନ୍ତି। ସର୍ବେକ୍ଷଣ ସମୟରେ, ଲୋକଙ୍କୁ ପଚରାଯାଇଥିଲା ଯେ ଯଦି ଆର୍ଥିକ ସ୍ଥିତିରେ ସୁଧାର ନହୁଏ ତେବେ ଆସନ୍ତା ତିନି ରୁ ଛଅ ମାସ ମଧ୍ୟରେ ସେମାନଙ୍କର ନାବାଳିକା ଝିଅମାନଙ୍କୁ ବିବାହ କରାଇବାକୁ ଚିନ୍ତା କରିବେ କି? ଏହି ପ୍ରଶ୍ନ ଉପରେ, ୫୧ ପ୍ରତିଶତ ପରିବାର କହିଛନ୍ତି ଯେ କେବଳ ଏହି ଉପାୟ ସେମାନଙ୍କ ପାଖରେ ରହିଛି। ଶ୍ରୀଲଙ୍କାରେଝିଅମାନଙ୍କ ପାଇଁ ବିବାହର ସର୍ବନିମ୍ନ ବୟସ ୧୮ ବର୍ଷ ବୋଲି ବିବେଚନା କରାଯାଏ ।
ଏହି ସର୍ଭେ ରିପୋର୍ଟ ଶ୍ରୀଲଙ୍କାର ଜଟିଳ ଜରୁରୀକାଳୀନ ଆବଶ୍ୟକତାର ମୂଲ୍ୟାଙ୍କନ ରିପୋର୍ଟ ଭାବରେ ପ୍ରକାଶିତ ହୋଇଛି। ଏହି ସର୍ଭେରେ ଜଡିତ ଅନୁସନ୍ଧାନ ଗୋଷ୍ଠୀର ସଦସ୍ୟ ସିହ୍ନା ୱିକ୍ରେମେସେକରା କହିଛନ୍ତି ଯେ ଏହି ସର୍ଭେ ୧୧ ଟି ଜିଲାର୨,୮୭୧ ପରିବାରର ମତ ନିଆଯାଇଛି।
ଶ୍ରୀଲଙ୍କାରେ ଜାରି ରହିଥିବା ଅର୍ଥନୈତିକ ସଙ୍କଟରୁ ମୁକ୍ତି ପାଇବା ପାଇଁ କୌଣସି ଆଶା ନାହିଁ। କିଛି ମାସ ପୂର୍ବରୁ ଦେଶର ମୁଦ୍ରାର ମୂଲ୍ୟ ହ୍ରାସ ପାଇଥିଲା। ଏଥିରେ କୌଣସି ଉନ୍ନତି ହୋଇନାହିଁ। ଏହି କାରଣରୁ ମୁଦ୍ରାସ୍ଫୀତି ହାର ୭୦ ପ୍ରତିଶତ ପର୍ଯ୍ୟନ୍ତ ରହିଛି। ଅର୍ଥନୀତିଜ୍ଞଙ୍କ ଅନୁଯାୟୀ ଶ୍ରୀଲଙ୍କା ନୋଟ ମୁଦ୍ରଣ କରି କାର୍ଯ୍ୟ କରୁଛି, ଯେଉଁ କାରଣରୁ ମୁଦ୍ରାର ମୂଲ୍ୟ ହ୍ରାସ ପାଇଛି।
