ପୁରୀ,୧୫ା୧୨(ଅଜିତ୍ କୁମାର ମହାନ୍ତି): ମହାପ୍ରଭୁଙ୍କ ଭୋଗ କହି ଶ୍ରୀମନ୍ଦିର ବାହାରେ ବିକ୍ରି ହେଉଛି ଅପମିଶ୍ରିତ ଖଜା, ଯାହାକୁ ନେଇ ସୁଆର-ମହାସୁଆର ନିଯୋଗ ସମ୍ପାଦକ ନାରାୟଣ ମହାସୁଆର ଅଭିଯୋଗ କରିଛନ୍ତି। କିଛି ମୁନାଫାଖୋର୍ ବ୍ୟବସାୟୀ ଆଣ୍ଠୁ ଓ ଗୋଡ଼ରେ ମଇଦା ଚକଟି ଖଜା ପ୍ରସ୍ତୁତ କରି ଫାଇଦା ଉଠାଉଛନ୍ତି। ଖଜାରେ ଅତ୍ୟଧିକ ମୁନାଫା ଆଶାରେ ଯୁବପିଢ଼ି ସାମିଲ ହେଉଥିବା ବେଳେ ଖଜା ଦୋକାନର ସଂଖ୍ୟା ବଢ଼ିବାରେ ଲାଗିଛି। ନିକଟ ଅତୀତରେ ଖଜା ବ୍ୟବସାୟକୁ ନେଇ ୨ଟି ମୁଣ୍ଡ ଗଡ଼ିଥିଲା। ଦିନକୁ ଦିନ ପୁରୀରେ ଖଜା ବ୍ୟବସାୟୀ କାୟାବିସ୍ତାର କରୁଥିବା ବେଳେ ମହାପ୍ରସାଦ ନାମରେ ଅପମିଶ୍ରିତ ଖଜା ବିକ୍ରିହେବା ଘଟଣାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଅପରପକ୍ଷରେ ଡିଜିଟାଲ ଓଜନ ମାପକ ଯନ୍ତ୍ରରେ ବି ଗ୍ରାହକଙ୍କୁ ଠକୁଥିବା ଅଭିଯୋଗ ହୋଇଛି। ଏନେଇ ସୁଆର ମହାସୁଆର ନିଯୋଗ ପକ୍ଷରୁ ପ୍ରଶାସନକୁ ଅବଗତ କରାଯାଇଛି।
ସୁଆର ମହାସୁଆର ନିଯୋଗର ସମ୍ପାଦକ ମହାସୁଆର କହିଛନ୍ତି, କିଛିଦିନ ହେବ ବହୁ ଖଜା ବ୍ୟବସାୟୀ ମହାପ୍ରସାଦ କହି ଭକ୍ତ ଓ ଯାତ୍ରୀଙ୍କୁ ବିକୁଛନ୍ତି। ବିଭିନ୍ନ ସ୍ଥାନରେ ଅପମିଶ୍ରିତ ତେଲ ବ୍ୟବହାର କରାଯାଇ ଓ ଗୋଡ଼, ଆଣ୍ଟୁରେ ମଇଦାକୁ ଦଳାଯାଇ ଖଜା ପ୍ରସ୍ତୁତ କରୁଛନ୍ତି ଓ ଉକ୍ତ ଖଜାକୁ ଭୋଗ ଖଜା କହି ବିକ୍ରି କରୁଛନ୍ତି। ଖଜାଗୁଡ଼ିକୁ ଭୋଗ କହି ବିକ୍ରି କରିବା ଦୁଃଖର ବିଷୟ। ଶ୍ରୀମନ୍ଦିର ଆନନ୍ଦ ବଜାରରେ ବିକ୍ରି ହେଉଥିବା ଖଜା ଭୋଗ ଅଟେ। ଏଥିପ୍ରତି ଶ୍ରୀମନ୍ଦିର ମୁଖ୍ୟ ପ୍ରଶାସକ, ଜିଲା ପ୍ରଶାସନ ଏବଂ ପୋଲିସ ପ୍ରଶାସନ ଧ୍ୟାନ ଦେଇ ଶ୍ରୀମନ୍ଦିର ନିକଟରେ ଭୋଗ କହି ବିକୁଥିବା ଅପମିଶ୍ରିତ ଖଜାଗୁଡ଼ିକୁ ଅନ୍ୟତ୍ର ସ୍ଥାନାନ୍ତର କରାଯାଉ। ଜିଲାପାଳ ସିର୍ଦ୍ଧାଥ ଶଙ୍କର ସ୍ବାଇଁ କହିଛନ୍ତି, ଶ୍ରୀମନ୍ଦିର ଭିତରେ ମିଳୁଥିବା ଖଜା ହେଉଛି ଭୋଗ ଖଜା। ଶ୍ରୀମନ୍ଦିରରେ ମହାପ୍ରଭୁଙ୍କ ଉଦ୍ଦେଶ୍ୟରେ ପ୍ରସ୍ତୁତ ହେଉଥିବା ଖଜା ସୁପକାରଙ୍କ ଦ୍ୱାରା ଶ୍ରୀମନ୍ଦିର ରୋଷଶାଳାରେ ପ୍ରସ୍ତୁତ ହୋଇଥାଏ ଓ ଏହା ଆନନ୍ଦବଜାରରେ ବିକ୍ରି ହୋଇଥାଏ।
ନେଇ ଏସ୍ପି ଭିନୀତ ଅଗ୍ରୱାଲ କହିଛନ୍ତି, ଭକ୍ତଙ୍କୁ ମାପ ଠକିବା ନେଇ ଯେଉଁ ଅଭିଯୋଗ ହେଉଛି, ଜିଲା ପ୍ରଶାସନ ସହ ମିଶି ମେଶିନଗୁଡ଼ିକ ଚେକ୍ କରାଯିବ। ମିଳିତ ଭାବେ ଚଢ଼ାଉ କରାଯିବ। ଯଦି ଅଭିଯୋଗ ସତ ହୋଇଥାଏ ତେବେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ସ୍ଥାନୀୟ ବାସିନ୍ଦା ପ୍ରସନ୍ନ ମହାପାତ୍ର କହିଛନ୍ତି, ଗତ ୫ବର୍ଷ ମଧ୍ୟରେ ଖଜା ଦୋକାନ ପୁରୀରେ ଛତୁ ଫୁଟିଲା ପରି ଫୁଟୁଛି। ଏପରିକି ଖଜା ବ୍ୟବସାୟକୁ ନେଇ ପୁରୀରେ ହତ୍ୟାକାଣ୍ଡ ଘଟିଲାଣି। ଖଜା ଏକ ଲାଭଦାୟକ ବ୍ୟବସାୟରେ ପରିଣତ ହୋଇଛି। ଅଳ୍ପ ଟଙ୍କାରେ କିଣି ତାକୁ ଯାତ୍ରୀଙ୍କୁ ଦୁଇରୁ ତିନି ଗୁଣା ମୂଲ୍ୟରେ ବିକ୍ରି କରୁଛନ୍ତି। ଏପରିକି ମେଶିନରେ ମଧ୍ୟ ଜାଲିଆତି କରି ଭକ୍ତଙ୍କୁ ମାପରେ ଠକୁଛନ୍ତି। ଏଠାରେ ନିମ୍ନମାନର ଖଜା ବିକ୍ରି କରାଯାଉଛି, ତେଣୁ ପ୍ରଶାସନ ଏଥିପ୍ରତି ଦୃଷ୍ଟିଦେବା ଆବଶ୍ୟକ।
