ପାଟନା,୭।୧୦ : ବିହାରରେ ଜାତିଗତ ଜନଗଣନା ରିପୋର୍ଟ ପ୍ରକାଶ ପାଇବା ସହିତ ରାଜନୈତିକ ବିତର୍କ ତୀବ୍ର ହେବାରେ ଲାଗିଛି ଏବଂ ଏହାର ସଠିକତା ଉପରେ ଅନେକ ପ୍ରଶ୍ନ ଉଠିଛି। ପ୍ରାରମ୍ଭରେ ବିରୋଧୀ ଦଳ ସରକାରଙ୍କ ଦ୍ୱାରା ପ୍ରକାଶିତ ତଥ୍ୟକୁ ସମାଲୋଚନା କରିଥିଲେ ଏବଂ ସଠିକତା ନ ଥିବା ନେଇ ଅଭିଯୋଗ କରିଥିଲେ। କିନ୍ତୁ ବର୍ତ୍ତମାନ ଶାସକ ଦଳ ଭିତରେ ମଧ୍ୟ ଏହି ରିପୋର୍ଟକୁ ନେଇ ସନ୍ଦେହ ସୃଷ୍ଟି ହେବାରେ ଲାଗିଛି।
ପୂର୍ବରୁ ଭାରତୀୟ ଜନତା ପାର୍ଟି ଜନଗଣନା ଆକଳନ ଉପରେ ସନ୍ଦେହ ସୃଷ୍ଟି କରିଥିଲା। କିନ୍ତୁ, ବର୍ତ୍ତମାନ ଶାସକ ଜନତା ଦଳ ୟୁନାଇଟେଡ (ଜେଡିୟୁ) ର ଜଣେ ନେତା ମୁଖ୍ୟମନ୍ତ୍ରୀ ନୀତୀଶ କୁମାରଙ୍କୁ ଏକ ଚିଠି ଲେଖି ଏହି ରିପୋର୍ଟକୁ ଭୁଲ ବୋଲି କହିଛନ୍ତି। ରିପୋର୍ଟର ବୈଧତା ଉପରେ ଜେଡିୟୁ ରାଜ୍ୟ ମହାସଚିବ ପ୍ରଗତି ମେହେଟ୍ଟା ପ୍ରଶ୍ନ ଉଠାଇଛନ୍ତି। ଫଳରେ ରିପୋର୍ଟକୁ ନେଇ ଜେଡିୟୁରେ ଫାଟ ସୃଷ୍ଟି ହୋଇଛି। ଏହାକୁ ନେଇ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ଚିନ୍ତା ବଢ଼ିବାରେ ଲାଗିଛି।
ବାସ୍ତବରେ, ରିପୋର୍ଟ ସମ୍ବନ୍ଧୀୟ ଚିନ୍ତା ଦୁଇ ପ୍ରକାର ଅଛି। ଗୋଟିଏ ପଟେ ରିପୋର୍ଟର ସଠିକତା ଏବଂ ପଦ୍ଧତି ଉପରେ ସନ୍ଦେହ ଦେଖା ଦେଇଛି। ଅପରପକ୍ଷରେ, ଉଚ୍ଚ ଜାତିର ଜନସଂଖ୍ୟା ହ୍ରାସ ପାଇବା ନେଇ ସନ୍ଦେହ ରହିଛି। ସୂଚନାଯୋଗ୍ୟ, ପ୍ରଥମେ ଜାତିଗତ ଜନଗଣନା ରିପୋର୍ଟକୁ ଭାଜପା ସରକାର ଅସମ୍ପୂର୍ଣ୍ଣ ବୋଲି ଅଭିଯୋଗ କରିଥିଲେ ଏବଂ ଏହା ତରବରିଆ ଭାବେ ପ୍ରସ୍ତୁତ ହୋଇଥିବା କହିଥିଲେ।
ଏହି ରିପୋର୍ଟ ଉପରେ ହିନ୍ଦୁସ୍ଥାନ ଆୱାମ ମୋର୍ଚ୍ଚା (ହାମ) ର ଜାତୀୟ ଅଧ୍ୟକ୍ଷ ତଥା ଦଳିତ ନେତା ଜିତନ ରାମ ମାଂଝୀ ମଧ୍ୟ ସନ୍ଦେହ ପ୍ରକଟ କରିଛନ୍ତି। ରାଷ୍ଟ୍ରୀୟ ଲୋକ ସମତା ପାର୍ଟି (ଆରଏଲଏସପି) ଅଧ୍ୟକ୍ଷ ତଥା ଓବିସି ନେତା ଉପେନ୍ଦ୍ର କୁଶବାହା ଏହି ରିପୋର୍ଟକୁ ବାସ୍ତବତାଠାରୁ ପୃଥକ ଏବଂ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ବୋଲି କହିଛନ୍ତି।
ପ୍ରଗତି ମେହେଟ୍ଟା ଙ୍କର ପ୍ରଶ୍ନ ହେଉଛି ସର୍ଭେ ଦଳ ପ୍ରକୃତରେ ଲୋକମାନଙ୍କ ଘରକୁ ଯାଇଛନ୍ତି କି ? ସେ କୌଣସି ସର୍ବେକ୍ଷଣକାରୀଙ୍କୁ ଜାତି ଗଣନା କରୁ ଥିବାର ଦେଖି ନାହାନ୍ତି।
ଏଥି ସହ ବିହାର କଂଗ୍ରେସର ପୂର୍ବତନ ଅଧ୍ୟକ୍ଷ ଅନୀଲ ଶର୍ମା ଏହି ରିପୋର୍ଟ ଉପରେ ପ୍ରଶ୍ନ ଉଠାଇଛନ୍ତି। ୨୦୨୨ ରିପୋର୍ଟରେ ୨୨ ପ୍ରତିଶତ ବୋଲି କୁହାଯାଇଥିବା ଉଚ୍ଚ ଜାତିର ଜନସଂଖ୍ୟା କିପରି ଗୋଟିଏ ବର୍ଷରେ ହଠାତ ୧୧ ପ୍ରତିଶତକୁ ହ୍ରାସ ପାଇଛି ସେ ନେଇ ସେ ଆଶ୍ଚର୍ଯ୍ୟ ପ୍ରକଟ କରିଛନ୍ତି। ଏଭଳି ବଢୁଥିବା ପ୍ରଶ୍ନ ଏବଂ ଚିନ୍ତା ମଧ୍ୟରେ ବିହାରର ନୀତୀଶ ସରକାର ଯେଉଁମାନଙ୍କ ଘର ସର୍ଭେ ଦଳ ପରିଦର୍ଶନ କରିନାହାଁନ୍ତି ସେମାନଙ୍କୁ ସମ୍ପୃକ୍ତ କର୍ମଚାରୀଙ୍କ ବିରୋଧରେ ଅଭିଯୋଗ ପଞ୍ଜିକରଣ କରିବାକ ଅନୁରୋଧ କରିଛନ୍ତି।
ବଢୁଥିବା ବିବାଦର ଜବାବରେ ବିହାର ସରକାର ଦାୟିତ୍ୱରେ ଥିବା ଅଧିକାରୀ ଏବଂ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଘୋଷଣା କରିଛନ୍ତି । ବିହାରର ନିର୍ମାଣ ମନ୍ତ୍ରୀ ଅଶୋକ ଚୌଧୁରୀ କହିଛନ୍ତି ସର୍ବେକ୍ଷଣର ଏକ ଅଂଶ ଭାବରେ ଘର କିମ୍ବା ସ୍ଥାନୀୟ ଅଞ୍ଚଳରେ ପହଞ୍ଚିବାରେ ବିଫଳ ହୋଇଥିବା ଅଧିକାରୀଙ୍କୁ ଏହାର ପରିଣାମ ଭୋଗିବାକୁ ପଡିବ।
