କେନ୍ଦ୍ରାପଡ଼ା ଅଫିସ, ୨୧ା୫: କେନ୍ଦ୍ରାପଡ଼ା ସାଇକେଲ କ୍ଲବର ସାପ୍ତାହିକ ସାଇକେଲ ପରିକ୍ରମା ଶୁକ୍ରବାର ଅନୁଷ୍ଠିତ ହୋଇଛି। ଏଥିରେ ଏସ୍ପି ମଡକର ସମ୍ବିତ ସମ୍ପଦ ସାମିଲ ହୋଇ ଟ୍ରାଫିକ ସଚେତନତା, ନିଶା ନିବାରଣ ସମ୍ପର୍କରେ ସଚେତନତା ସୃଷ୍ଟିି କରିଛନ୍ତି। ଏ ସମ୍ପର୍କରେ ଏସ୍ପି ସମ୍ପଦ କହିଛନ୍ତି, ସାଇକେଲ ଚାଳନା ଦ୍ୱାରା ଶରୀର ସୁସ୍ଥ ରୁହେ। ଏଥିସହ ଇଞ୍ଜିନ ଚାଳିତ ଯାନ ପରିବର୍ତ୍ତେ ସାଇକେଲରେ ଗମନାଗମନ ଦ୍ୱାରା ପରିବେଶର ସୁରକ୍ଷା ହୋଇଥାଏ। ସାମ୍ପ୍ରତିକ ସମୟରେ ବାୟୁ ଓ ଶବ୍ଦ ପ୍ରଦୂଷଣ ବଢ଼ିଯାଲିଛି। ସାଧାରଣରେ ସାଇକେଲକୁ ଛାଡି କମ ରାସ୍ତା ଅତିକ୍ରମ କରିବାକୁ ବାଇକ୍ ଅଥବା କାର ବ୍ୟବହାର କରୁଛୁ। ଏହାଦ୍ୱାରା ଟ୍ରାଫିକ ସମସ୍ୟା ଓ ସଡ଼କ ଦୁର୍ଘଟଣା ବଢ଼ିଯାଉଛି।
ଏବେ ସଡ଼କ ଦୁର୍ଘଟଣାକୁ ରୋକିବାକୁ ଟ୍ରାଫିକ ରୁଲ୍କୁ କଡାକଡି ଭାବେ ତନଖି କରାଯାଉଛି। ବାଇକ୍ ଚାଳନା ସମୟରେ ନିଶା ଗ୍ରସ୍ତ ନ ହେବା, ମୋବାଇଲ ବ୍ୟବହାର ନ କରିବା, ଟ୍ରାଫିକ ନିୟମକୁ ମାନିବାକୁ ଗୁରୁତ୍ୱ ଦେବାକୁ ପଡିବ ବୋଲି ଏସ୍ପି ସମ୍ପଦ ମତ ଦେଇଛନ୍ତି। ସକାଳ ୬ଟାରେ ଏହି ରାଲି ସହରର ପୁରୁଣା ବସ୍ଷ୍ଟାଣ୍ଡରୁ ବାହାରିଥିଲା। ଖଡିଅଙ୍କ, ସୁନାଇଲୋ, ଆଳିଜଙ୍ଗା, ଇଟିପୁର ଆଦି ସହର ଓ ଗ୍ରାମାଞ୍ଚଳରେ ରାଲି କରାଯାଇ ଏହି ବାର୍ତ୍ତା ପ୍ରଚାର କରାଯାଇଥିଲା। ଏଥିରେ ଏଏସ୍ପି ହରିଶ ଚନ୍ଦ୍ର ପାଣ୍ଡେ, ସାଇକେଲ କ୍ଲବ ସଦସ୍ୟ ଡା. ବୀରେନ୍ଦ୍ର କୁମାର ଦାସ, ଏସ୍ଡିପିଓ ରାଜୀବ ଲୋଚନ ପଣ୍ଡା, ଡିଏସ୍ପି କାର୍ତ୍ତିକ ଚନ୍ଦ୍ର ମଲ୍ଲିକ, ଶିବାଶିଷ ଜେନା, କେଶବ ଚନ୍ଦ୍ର ସାହୁ ପ୍ରମୁଖ ସାମିଲ ହୋଇଥିଲେ।
