ଭୁବନେଶ୍ୱର,୫ା୧୨(ବ୍ୟୁରୋ): ରାଜ୍ୟ ସରକାର ଗୋଟିଏ ପରେ ଗୋଟିଏ ବିଦ୍ୟୁତ୍ ବଣ୍ଟନ କମ୍ପାନୀକୁ ଘରୋଇ ସଂସ୍ଥା ହାତକୁ ଟେକି ଦେଉଛନ୍ତି। ନିକଟରେ ଓଡ଼ିଶା ବିଦ୍ୟୁତ୍ ନିୟାମକ ଆୟୋଗ (ଓଇଆର୍ସି) ଘରୋଇ କମ୍ପାନୀ ଟାଟା ପାଓ୍ବାର କମ୍ପାନୀ ଲିମିଟେଡ(ଟିପିସିଏଲ୍)କୁ ସେଣ୍ଟ୍ରାଲ ଇଲେକ୍ଟ୍ରିସିଟି ସପ୍ଲାଏ ୟୁଟିଲିଟି(ସେସୁ)କୁ ହସ୍ତାନ୍ତର କରିଥିବା ବେଳେ ଏବେ ସାଉଥ୍କୋ ଏବଂ ଓ୍ବେସକୋକୁ ୨୫ ବର୍ଷ ପାଇଁ ଲାଇସେନ୍ସ ପ୍ରଦାନ କରିଛନ୍ତି। ଏଥିରେ ଟାଟା ପାଓ୍ବାରର ୫୧ ପ୍ରତିଶତ ଅଂଶଧନ ଥିବା ବେଳେ ଗ୍ରୀଡ୍କୋ ହାତରେ ୪୯ ପ୍ରତିଶତ ଅଂଶଧନ ରହିବ। ଏ ନେଇ ଓଇଆର୍ସି ପକ୍ଷରୁ ପ୍ରେସ୍ ବିଜ୍ଞପ୍ତି ଜାରି କରାଯାଇଛି। ବିଜ୍ଞପ୍ତିରେ କୁହାଯାଇଛି ଯେ, ବିଦ୍ୟୁତ୍ ଆଇନ ୨୦୦୩ର ସେକ୍ସନ-୨୦ ଅନୁଯାୟୀ କମିଶନ ସାଉଥ୍କୋ ପାଇଁ ରିକ୍ୱେଷ୍ଟ ଫର୍ ପ୍ରପୋଜାଲ (ଆର୍ଏଫ୍ପି) ଜାରି କରିଥିଲେ। ଟିପିସିଏଲ୍ ଏଥିପାଇଁ ଯୋଗ୍ୟ ବିବେଚିତ ହୋଇଛି। କମିଶନ ଡିସେମ୍ବର ୩ ତାରିଖରେ ସାଥ୍କୋ ଏବଂ ଓ୍ବେସକୋର ମାଲିକାନା ହସ୍ତାନ୍ତର ପାଇଁ ଲେଟର ଅଫ ଇଣ୍ଟେଣ୍ଟ (ଏଲ୍ଓଆଇ) ପ୍ରଦାନ କରିଛନ୍ତି।
ଚୁକ୍ତି ଅନୁଯାୟୀ ସାଉଥ୍କୋରେ ଥିବା ସମସ୍ତ କର୍ମଚାରୀଙ୍କୁ ଟିପିସିଏଲ୍କୁ ହସ୍ତାନ୍ତର କରାଯାଇଛି। କର୍ମଚାରୀମାନଙ୍କର ଚାକିରି ସର୍ତ୍ତାବଳୀ ସମ୍ବନ୍ଧୀୟ କୌଣସି ପ୍ରକାର ପରିବର୍ତ୍ତନ କରାଯାଇ ପାରିବ ନାହିଁ। ଆସନ୍ତା ୧୦ ବର୍ଷ ମଧ୍ୟରେ ପରିବହନ ଓ ବାଣିଜି୍ୟକ କ୍ଷତି (ଏଟି ଆଣ୍ଡ ସି) ୩୫.୨୯ ପ୍ରତିଶତରୁ ୧୪.୮୦ ପ୍ରତିଶତକୁ ହ୍ରାସ କରିବାକୁ ଚୁକ୍ତିରେ ଉଲ୍ଲେଖ କରାଯାଇଛି। ସେହିପରି ଟିପିସିଏଲ୍ ଆସନ୍ତା ୫ ବର୍ଷ ପାଇଁ ବିଦ୍ୟୁତ୍ ସୁରକ୍ଷା, ବୈଷୟିକ କ୍ଷେତ୍ରରେ ନିବେଶ, ବିଦ୍ୟୁତ୍ ଉନ୍ନତୀକରଣ ଏବଂ ବଣ୍ଟନଜନିତ କ୍ଷତି ଭରଣା ପାଇଁ ପୁଞ୍ଜିନିବେଶ କରିବ। ଚୁକ୍ତି ଅନୁଯାୟୀ ଟିପିସିଏଲ୍ ୨୦୨୨ରେ ଏଥିପାଇଁ ୨୨୭କୋଟି, ୨୦୨୩ରେ ୩୧୬ , ୨୦୨୪ରେ ୨୪୧, ୨୦୨୫ରେ ୨୩୩ ଏବଂ ୨୦୨୬ରେ ୧୫୦ କୋଟି ଟଙ୍କା ଖର୍ଚ୍ଚ କରିବ। ଏଥିସହିତ ଆସନ୍ତା ୫ ବର୍ଷରେ କମ୍ପାନୀ ୧୦୦ କୋଟି ଟଙ୍କାର ବକେୟା ବିଲ୍ ଆଦାୟ କରିବ। କମ୍ପାନୀ ଗ୍ରୀଡ୍କୋ ଠାରୁ ବିଦ୍ୟୁତ୍ କ୍ରୟ କରିବ। ଚୁକ୍ତି ଦିନ ଠାରୁ ଟିପିସିଏଲ୍ ସାଉଥ୍କୋର ଦାୟିତ୍ୱ ନେବ। ତେବେ ଗ୍ରୀଡ୍କୋକୁ ସାଉଥ୍କୋ ଦେବାକୁ ଥିବା ପୁରୁଣା ବକେୟା ଆଦି କିପରି ଭରଣା ହେବ ସେନେଇ ଚୁକ୍ତିନାମାରେ କିଛି ଉଲ୍ଲେଖ କରାଯାଇ ନାହିଁ।
ସେହିପରି ଓ୍ବେସକୋର ବକେୟା ଥିବା ୩୦୦ କୋଟି ଟଙ୍କା ଆସନ୍ତା ୫ ବର୍ଷରେ ଟିପିସିଏଲ ଆଦାୟ କରିବ। ଟିପିସିଏଲ୍ ଆସନ୍ତା ୫ ବର୍ଷ ପାଇଁ ବିଦ୍ୟୁତ୍ ସୁରକ୍ଷା, ବୈଷୟିକ କ୍ଷେତ୍ରରେ ନିବେଶ, ବିଦ୍ୟୁତ୍ ଉନ୍ନତୀକରଣ ଏବଂ ବଣ୍ଟନଜନିତ କ୍ଷତି ଭରଣା ପାଇଁ ପୁଞ୍ଜିନିବେଶ କରିବ। ୨୦୨୨ରେ ଏଥିପାଇଁ ୩୦୬ କୋଟି, ୨୦୨୩ରେ ୫୦୦, ୨୦୨୪ରେ ୩୩୩, ୨୦୨୫ରେ ୩୨୨ଏବଂ ୨୦୨୬ରେ ୨୦୨ କୋଟି ଟଙ୍କା ଖର୍ଚ୍ଚ କରିବ।