ମୁମ୍ବାଇ: ଦେଶରେ ଜାରି ରହିଥିବା କରୋନା ଲକ୍ଡାଉନ ସମୟରେ ବଲିଉଡ୍ ଅଭିନେତା ସୋନୁ ସୁଦ ପ୍ରବାସୀଙ୍କ ପାଇଁ ଦେବଦୂତ ସାଜିଛନ୍ତି। ଲକ୍ଡାଉନ ସମୟରେ ବିଭିନ୍ନ ରାଜ୍ୟରେ ଫସିଥିବା ପ୍ରବାସୀ ଶ୍ରମିକଙ୍କୁ ନିଜ ଘରକୁ ପଠାଇ ସୋନୁ ବେଶ୍ ଚର୍ଚ୍ଚିତ ହେବା ସହ ପ୍ରଶଂସା ମଧ୍ୟ ସାଉଁଟିଛନ୍ତି। ତେବେ ପ୍ରବାସୀଙ୍କ ସହାୟତା ପରେ ଏବେ ସୋନୁ ୪ଜଣ ଅନାଥ ଶିଶୁଙ୍କୁ ସହାୟତା କରିବାକୁ ଅଣ୍ଟା ଭିଡିଛନ୍ତି। ଶୁଣିବାକୁ ମିଳିଛି, ପଞ୍ଜାବର ତରନତାରନ ଜିଲାର ପଣ୍ଡୋରୀ ଗୋଲା ଗାଁର ସୁଖଦେବ ସିଂହଙ୍କ ବିଷାକ୍ତ ମଦ ପିଇ ମୃତ୍ୟୁ ହୋଇଥିଲା। ସ୍ବାମୀଙ୍କ ମୃତ୍ୟୁକୁ ସହ୍ୟ କରି ନ ପାରି ସ୍ତ୍ରୀଙ୍କ ମଧ୍ୟ ମୃତ୍ୟୁ ଘଟିଥିଲା। ଦମ୍ପତ୍ତିଙ୍କ ମୃତ୍ୟୁ ପରେ ୪ଜଣ ଶିଶୁ ଅନାଥ ହୋଇଯାଇଥିବା ବେଳେ ଏବେ ସୋନୁ ସେମାନଙ୍କ ପାଇଁ ଦେବଦୂତ ସାଜିଛନ୍ତି। ସୋନୁ ଶନିବାର ଟୁଇଟ କରି ୪ଜଣ ଶିଶୁଙ୍କ ଦାୟିତ୍ୱ ନେବେ ବୋଲି ପ୍ରତିଶୃତି ଦେଇଛନ୍ତି। ଖୁବ୍ଶୀଘ୍ର କରଣବୀର, ଗୁରପ୍ରୀତ, ଅର୍ଶଦୀପ ଓ ସନ୍ଦୀପଙ୍କୁ ସେ ଭଲ ଘର, ଭଲ ସ୍କୁଲ ଓ ଭଲ ଭବିଷ୍ୟତ ଯୋଗାଇଦେବେ ବୋଲି କହିଛନ୍ତି। ବର୍ତ୍ତମାନ ଉକ୍ତ ଶିଶୁ ନିଜ କକାଙ୍କ ପାଖରେ ରହୁଥିବା ସୂଚନା ରହିଛି।
