ବେଜିଂ: ବହୁ ଲୋକ ବସ୍ ଅପେକ୍ଷା ଟ୍ରେନ୍ରେ ଯାତ୍ରା କରିବାକୁ ଅଧିକ ପସନ୍ଦ କରନ୍ତି। ହେଲେ ଅନେକ ସମୟରେ ଟ୍ରେନ୍ ଯାତ୍ରାରେ ଅଧିକାଂଶ ଲୋକ ବସିବାକୁ ସିଟ୍ ନ ପାଇ ଠିଆହୋଇ ଯାଇଥା’ନ୍ତି। ଏପରି ଅସୁବିଧା ପାଇଁ ଜଣେ ଯୁବକ ଏକ ଉପାୟ ବାହାର କରିଛନ୍ତି, ଯାହାର ଏକ ଭିଡିଓ ସୋସିଆଲ ମିଡିଆରେ ବେଶ୍ ଭାଇରାଲ ହେବାରେ ଲାଗିଛି। ରିପୋର୍ଟ ମୁତାବକ, ଚାଇନାର ଜଣେ ଯୁବକ ଟ୍ରେନ୍ ଯାତ୍ରା କରିବାକୁ ଯିବାବେଳେ ନିଜ ସହ ଏକ ଜଣିକିଆ ସୋଫା ନେଇ ଯାଉଥିବାର ଭିଡିଓ ଭାଇରାଲ ହେବାରେ ଲାଗିଛି। ଯୁବକଙ୍କ ଏପରି କାର୍ଯ୍ୟ ଦେଖି ସମସ୍ତେ ଆଶ୍ଚର୍ଯ୍ୟ ହେଉଛନ୍ତି। ତେବେ ଯୁବକ ଜଣକ ପ୍ରତିଦିନ ତାଙ୍କ ସହ ଘରୁ ଏକ ସୋଫା ନେଇକି ଯାଇଥା’ନ୍ତି। ଷ୍ଟେଶନରେ ସେହି ସୋଫାକୁ ପକାଇ ଟ୍ରେନ୍ ଆସିବାକୁ ଅପେକ୍ଷା କରନ୍ତି। ପରେ ମେଟ୍ରୋ ଟ୍ରେନ୍ ଆସିଲେ ସେ ସେହି ସୋଫାକୁ ଟ୍ରେନ୍ ଭିତରେ ପକାଇ ଶାନ୍ତିରେ ବସିଥା’ନ୍ତି। ଏନେଇ ଉକ୍ତ ଯୁବକଙ୍କୁ ପଚରାଯିବାରୁ, ସେ ପ୍ରତିଦିନ ଟ୍ରେନ୍ରେ ସିଟ୍ ନ ପାଇ ଠିଆ ହୋଇ ଯାଇଥା’ନ୍ତି। ଏଥିରେ ସେ ବିରକ୍ତ ହୋଇ ଏକ ଖାସ୍ ପ୍ରକାରର ସୋଫା ତିଆରି କରାଇଲେ, ଯାହାକୁ ସେ ସହଜରେ ସାଙ୍ଗରେ ନେଇ ଟ୍ରେନ୍ରେ ଯାତ୍ରା କରିପାରିବେ। ପ୍ରଥମେ ସେ ଏକ ପୋର୍ଟେବଲ ଚୌକି ବ୍ୟବହାର କରିବାକୁ ଭାବିଥିଲେ। ହେଲେ ଅଫିସରେ ଏବଂ ଅଫିସ ସରିବା ପରେ ଏକାଭଳି ଚୌକିରେ ବସି ଆରାମ କରିପାରିବେନି। ସେଥିପାଇଁ ସେ ଏକ ଆରାମଦାୟକ ସୋଫା ତିଆରି କରାଇଥିବା କହିଛନ୍ତି।
