ନୂଆଦିଲ୍ଲୀ,୨୮।୧: ଦୁଇ ବର୍ଷ ହେଲା କ୍ୟାରିୟରର ୭୧ତମ ଶତକ ଅପେକ୍ଷାରେ ଥିବା ବିରାଟ କୋହଲିଙ୍କୁ ନିକଟରେ ପ୍ରବଳ ସମାଲୋଚିତ ହେବାକୁ ପଡ଼ିଛି। ତାଙ୍କ ସମାଲୋଚକଙ୍କୁ କଡ଼ା ଜବାବ ଦେଇଛନ୍ତି ସାଥି ଖେଳାଳି ମହମ୍ମଦ ଶାମି।
“ବିରାଟ କୋହଲି ଶତକ କରିପାରୁ ନାହାନ୍ତି, ତ କ’ଣ ହୋଇଗଲା। ସେ କେତେ ବଡ଼ ଖେଳାଳି, ତାହା ଗୋଟିଏ ଶତକ ବାଖ୍ୟା କରିପାରିବ ନାହିଁ। ଏହାର ଅର୍ଥ ନୁହେଁ, ସେ ରନ୍ କରୁ ନାହାନ୍ତି। ନିକଟ ଅତୀତରେ ସେ କ୍ରମାଗତ ଅର୍ଦ୍ଧଶତକ ହାସଲ କରିଛନ୍ତି। ୫୦ କିମ୍ବା ୬୦ ମଧ୍ୟ ଭଲ ସ୍କୋର। ଏହା ଦଳକୁ ସାହାଯ୍ୟ କଲା ପର୍ଯ୍ୟନ୍ତ କୌଣସି କମ୍ପଲେନ କରିବାର ଆବଶ୍ୟକତା ନାହିଁ” ବୋଲି ଭାରତୀୟ ପେସର କହିଛନ୍ତି।
ଦକ୍ଷିଣ ଆଫ୍ରିକାଠାରୁ ଟେଷ୍ଟ ସିରିଜ୍ରେ ୧-୨ ବ୍ୟବଧାନରେ ପରାସ୍ତ ପରେ କୋହଲି ଅଧିନାୟକ ପଦରୁ ଓହରି ଯାଇଥିଲେ। ତାଙ୍କୁ ବୋଲରଙ୍କ କ୍ୟାପଟେନ ବୋଲି ଶାମି କହିଛନ୍ତି।
“ କୋହଲିଙ୍କ ଏନର୍ଜି ପୂରା ଦଳକୁ ଆଗେଇ ନିଏ। ସେ ଜଣେ ବୋଲରଙ୍କ କ୍ୟାପଟେନ। ସେ ଆମକୁ ନିଜକୁ ପ୍ରକାଶ କରିବାର ଅଧିକାର ଦିଅନ୍ତି। ସର୍ବଦା ସେ ଆମ ମତାମତ ନିଅନ୍ତି। ଆମେ ଅନେକ ସମୟ ଏକାଠି ବିତାଇଛୁ। ଅନେକ ସ୍ମରଣୀୟ ମୁହୂର୍ତ୍ତ ଦେଖିଛି। ଏହା ମୋର ସର୍ବଦା ମନେ ରହିବ। ସେ ମଧ୍ୟରୁ ଗୋଟିଏ ବାଛିବା କଷ୍ଟକର” ବୋଲି ସେ କହିଛନ୍ତି।
