ମାନାଲି, ୩୧ା୧୨: ପ୍ରବଳ ତୁଷାରପାତ ଯୋଗୁ ହିମାଚଳପ୍ରଦେଶର ରେହତଙ୍ଗ ପାସ୍ରେ ଥିବା ଅଟଳ ଟନେଲରେ ପ୍ରାୟ ୫୦୦ ଗାଡ଼ିରେ ୨,୦୦୦ରୁ ଊର୍ଦ୍ଧ୍ୱ ପର୍ଯ୍ୟଟକ ଦୀର୍ଘ ସମୟ ଅଟକି ରହିଥିଲେ। ଦୀର୍ଘ ୮ ଘଣ୍ଟାର ଉଦ୍ୟମ ପରେ ଗୁରୁବାର ବିଳମ୍ବିତ ରାତିରେ ସେମାନଙ୍କୁ ଉଦ୍ଧାର କରାଯାଇଛି। ଗୁରୁବାର ଅପରାହ୍ନରୁ ତୁଷାରପାତ ଜାରି ରହିବାରୁ ରାସ୍ତା ଖସଡ଼ା ହୋଇଯାଇଥିଲା। ଫଳରେ ଟନେଲର ଉଭୟ ଉତ୍ତର ଓ ଦକ୍ଷିଣ ପୋର୍ଟାଲରେ ଶହ ଶହ ଗାଡ଼ି ଅଟକି ରହିଥିଲା। ଏଥିପାଇଁ ଅନେକ ଦୂର ଯାଏ ଟ୍ରାଫିକ୍ ଜାମ୍ ସୃଷ୍ଟି ଲାଗିରହିଥିଲା। ଗାଡ଼ିଗୁଡ଼ିକୁ ନିରାପଦର ସହିତ ହଟାଇବାରେ କୁଲ୍ଲୁ ଏବଂ ଲାହୁଲ୍-ସ୍ପିଟି ପୋଲିସ ପର୍ଯ୍ୟଟକ ଓ ଡ୍ରାଇଭରମାନଙ୍କୁ ସହାୟତା କରିଥିଲେ। ଅପରାହ୍ନ ୫ଟାରୁ ରାତି ୧ଟା ପର୍ଯ୍ୟନ୍ତ ଉଦ୍ଧାର କାର୍ଯ୍ୟ ଜାରି ରହିଥିଲା। ତୁଷାରପାତ ଦେଖିବା ପାଇଁ ହିମାଚଳପ୍ରଦେଶର ଉକ୍ତ ଅଞ୍ଚଳକୁ ହଜାର ହଜାର ପର୍ଯ୍ୟଟକ ଆସିଥାନ୍ତି। ଗୁରୁବାର ତୁଷାରପାତ ଆରମ୍ଭ ହେବା ସହ ଗାଡ଼ିଗୁଡ଼ିକ ଖସିବାରୁ ଚଳାଇବା କଷ୍ଟକର ହୋଇପଡ଼ିଥିଲା।
