ଚେନ୍ନାଇ, ୨୧ା୧୦ (ପି.ଟି.)-ସ୍ଲୋଭାକିଆନ ସେଣ୍ଟର ଫରଓ୍ବାର୍ଡ ଜାକବ୍ ସିଲ୍ଭେଷ୍ଟର ଦୁଇଥର ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍) ଚାମ୍ପିୟନ ଚେନ୍ନାଇନ୍ ଏଫ୍ସି ଦଳରେ ଯୋଗ ଦେଇଛନ୍ତି। ଟ୍ରାନ୍ସଫର ଫ୍ରି ଭିତ୍ତିରେ ସେ ୨୦୨୦-୨୧ ସିଜନ ପାଇଁ କ୍ଲବ ସହିତ ଚୁକ୍ତି କରିଛନ୍ତି। ୩୧ ବର୍ଷୀୟ ପୂର୍ବତନ ସ୍ଲୋଭାକିଆ ଅନ୍ତର୍ଜାତୀୟ ଖେଳାଳି ଏହା ପୂର୍ବରୁ ଇସ୍ରାଏଲର ପ୍ରଥମ ଡିଭିଜନ କ୍ଲବ ହାପୋଏଲ ହାଇଫା ଏଫ୍ସିରୁ ଖେଳୁଥିଲେ। କ୍ଲବ ସହ ତାଙ୍କର ଚୁକ୍ତି ମିଆଦ ଶେଷ ହୋଇଯାଇଛି। ସ୍ଲୋଭାକିଆର ପ୍ରଥମ ଖେଳାଳି ଭାବେ ଆଇଏସ୍ଏଲରେ ଖେଳିବାକୁ ଯାଉଥିବାରୁ ସିଲଭେଷ୍ଟରଙ୍କ ଉତ୍କଣ୍ଠା ରହିଛି। ଚେନ୍ନାଇନ୍ ଏଫ୍ସି ମୁଖ୍ୟ କୋଚ୍ ସିସାବା ଲାଜ୍ଲୋ କହିଛନ୍ତି, ୨୦୨୦-୨୧ ସିଜନ ପାଇଁ କ୍ଲବ ସହ ଚୁକ୍ତି କରିବାରେ ସିଲଭେଷ୍ଟର ହେଉଛନ୍ତି ୭ମ ତଥା ଅନ୍ତିମ ବିଦେଶୀ ଖେଳାଳି। ତାଙ୍କ ଯୋଗଦାନ ପରେ କ୍ଲବର ଆକ୍ରମଣ କ୍ଷମତା ବୃଦ୍ଧି ପାଇଛି।
