ନୂଆଦିଲ୍ଲୀ,୧୦।୯: ଯଦି ଆପଣ ଆପଣଙ୍କ ପିଲାଙ୍କ ଭବିଷ୍ୟତକୁ ସୁନ୍ଦର କରିବାକୁ ଚାହୁଁଛନ୍ତି, ତେବେ ନିବେଶ ଯୋଜନା ଅତ୍ୟନ୍ତ ଜରୁରୀ। ଏଥିପାଇଁ ଆପଣଙ୍କ ପାଖରେ ଅନେକ ବିକଳ୍ପ ରହିଛି, ଯେଉଁଥିରୁ ଦୁଇଟି ପ୍ରମୁଖ ହେଉଛି ସିଷ୍ଟମେଟିକ ଇନଭେଷ୍ଟମେଣ୍ଟ ପ୍ଲାନ (SIP) ଏବଂ ସୁକନ୍ୟା ସମୃଦ୍ଧି ଯୋଜନା (SSY)। ଉଭୟ ଯୋଜନା ଦୀର୍ଘକାଳୀନ ନିବେଶ ପାଇଁ ଲାଭଦାୟକ, କିନ୍ତୁ ପ୍ରଶ୍ନ ଉଠୁଛି, ବର୍ଷକୁ ୧.୫ ଲକ୍ଷ ଟଙ୍କା ନିବେଶ କରି ୧୫ ବର୍ଷରେ କେଉଁ ଯୋଜନା ଅଧିକ ରିଟର୍ଣ୍ଣ ଦେବ?
ସୁକନ୍ୟା ସମୃଦ୍ଧି ଯୋଜନା (SSY) କ’ଣ?
SSY ହେଉଛି ଭାରତ ସରକାରଙ୍କ ଦ୍ୱାରା ପରିଚାଳିତ ଏକ ସଞ୍ଚୟ ଯୋଜନା, ଯାହା କେବଳ ଝିଅମାନଙ୍କ ପାଇଁ। ଏହି ଯୋଜନାରେ ପିତାମାତା ନିଜ ଝିଅର ନାମରେ ଏକ ଆକାଉଣ୍ଟ ଖୋଲି ବର୍ଷକୁ ସର୍ବନିମ୍ନ ୨୫୦ ଟଙ୍କାରୁ ସର୍ବାଧିକ ୧.୫ ଲକ୍ଷ ଟଙ୍କା ପର୍ଯ୍ୟନ୍ତ ଜମା କରିପାରିବେ। ସେପ୍ଟେମ୍ବର ୨୦୨୫ ସୁଦ୍ଧା ଏହାର ସୁଧ ହାର ୮.୨% ରହିଛି। ସରକାର ପ୍ରତି ତିନି ମାସରେ ଏହି ଯୋଜନାର ସମୀକ୍ଷା କରି ସୁଧ ହାର ବଢ଼ାଇପାରନ୍ତି, କମାଇପାରନ୍ତି କିମ୍ବା ସ୍ଥିର ରଖିପାରନ୍ତି।
SSYର ବୈଶିଷ୍ଟ୍ୟ:
-ନିବେଶ ଅବଧି: ୧୫ ବର୍ଷ ପାଇଁ ନିବେଶ, ଏବଂ ୨୧ ବର୍ଷରେ ଆକାଉଣ୍ଟ ମ୍ୟାଚ୍ୟୁର ହୁଏ।
– ଟ୍ୟାକ୍ସ ଲାଭ: ଆୟକର ଆଇନର ଧାରା ୮୦C ଅନୁଯାୟୀ ଟ୍ୟାକ୍ସ ଛାଡ଼ ଏବଂ ମ୍ୟାଚ୍ୟୁରିଟି ସମୟରେ ସମ୍ପୂର୍ଣ୍ଣ ରାଶି ଟ୍ୟାକ୍ସ ମୁକ୍ତ।
୧.୫ ଲକ୍ଷ ଟଙ୍କା ବାର୍ଷିକ ନିବେଶରେ ୧୫ ବର୍ଷରେ ରିଟର୍ଣ୍ଣ:
ଯଦି ଆପଣ ପ୍ରତିବର୍ଷ ୧.୫ ଲକ୍ଷ ଟଙ୍କା ୧୫ ବର୍ଷ ପାଇଁ ନିବେଶ କରନ୍ତି, ତେବେ ମୋଟ ନିବେଶ ହେବ ୨୨.୫ ଲକ୍ଷ ଟଙ୍କା। ବର୍ତ୍ତମାନର ସୁଧ ହାର ଅନୁଯାୟୀ, ମ୍ୟାଚ୍ୟୁରିଟି ସମୟରେ ୬୫ ଲକ୍ଷରୁ ୭୦ ଲକ୍ଷ ଟଙ୍କା ପର୍ଯ୍ୟନ୍ତ ମିଳିପାରେ।
SIP କ’ଣ?
SIP (Systematic Investment Plan) ହେଉଛି ମ୍ୟୁଚୁଆଲ ଫଣ୍ଡରେ ନିୟମିତ ନିବେଶର ଏକ ପଦ୍ଧତି। ଏଥିରେ ନିବେଶକ ପ୍ରତି ମାସରେ ଏକ ର୍ନିଦ୍ଦିଷ୍ଟ ରାଶି ନିବେଶ କରନ୍ତି, ଯାହା ଶେୟାର ବଜାର ସହ ଜଡ଼ିତ। ଦୀର୍ଘକାଳୀନ ଅବଧିରେ ମ୍ୟୁଚୁଆଲ ଫଣ୍ଡର ହାରାହାରି ରିଟର୍ଣ୍ଣ ୧୦%ରୁ ୧୪% ପର୍ଯ୍ୟନ୍ତ ରହିଛି।
SIPର ବୈଶିଷ୍ଟ୍ୟ:
– ବଜାର ଆଧାରିତ ରିଟର୍ଣ୍ଣ: ନିଶ୍ଚିତ ନୁହେଁ, ବଜାର ଅନୁଯାୟୀ ପରିବର୍ତ୍ତନ ହୁଏ।
-ଲିକ୍ୱିଡିଟି: ଆବଶ୍ୟକତା ଅନୁଯାୟୀ ଟଙ୍କା ଉଠାଇ ନିଆଯାଇପାରେ।
-ଟ୍ୟାକ୍ସ ଲାଭ: କେବଳ ELSS (Equity Linked Savings Scheme) ମ୍ୟୁଚୁଆଲ ଫଣ୍ଡରେ ଧାରା ୮୦C ଅନୁଯାୟୀ ଟ୍ୟାକ୍ସ ଛାଡ଼ ମିଳେ। ଅନ୍ୟ SIP ଯୋଜନାରେ ଏହା ମିଳେ ନାହିଁ।
-ଲଙ୍ଗ ଟର୍ମ କ୍ୟାପିଟାଲ ଗେନ୍: ବର୍ଷକୁ ୧ ଲକ୍ଷ ଟଙ୍କା ପର୍ଯ୍ୟନ୍ତ ଟ୍ୟାକ୍ସ ମୁକ୍ତ, ଏହା ପରେ ୧୦% ଟ୍ୟାକ୍ସ ଲାଗେ।
୧.୫ ଲକ୍ଷ ଟଙ୍କା ବାର୍ଷିକ ନିବେଶରେ ୧୫ ବର୍ଷରେ ରିଟର୍ଣ୍ଣ:
ଯଦି ୧୪% ହାରାହାରି ବାର୍ଷିକ ରିଟର୍ଣ୍ଣ ଧରାଯାଏ, ତେବେ ୧୫ ବର୍ଷରେ ମୋଟ ନିବେଶ ୨୭ ଲକ୍ଷ ଟଙ୍କାରେ ମ୍ୟାଚ୍ୟୁରିଟି ସମୟରେ ୮୦ ଲକ୍ଷରୁ ୮୫ ଲକ୍ଷ ଟଙ୍କା ପର୍ଯ୍ୟନ୍ତ ମିଳିପାରେ।
କେଉଁ ଯୋଜନା ଆପଣଙ୍କ ପାଇଁ ଉତ୍ତମ?
– ଯଦି ଆପଣ ନିଶ୍ଚିତ ଓ ସୁରକ୍ଷିତ ରିଟର୍ଣ୍ଣ ଚାହୁଁଛନ୍ତି ଏବଂ ଆପଣଙ୍କ ଝିଅର ବୟସ ୧୦ ବର୍ଷରୁ କମ, ତେବେ ସୁକନ୍ୟା ସମୃଦ୍ଧି ଯୋଜନା ଆପଣଙ୍କ ପାଇଁ ଉତ୍ତମ। ଏଥିରେ ୧.୫ ଲକ୍ଷ ଟଙ୍କା ବାର୍ଷିକ ନିବେଶରେ ୧୫ ବର୍ଷରେ ପ୍ରାୟ ୬୩-୬୫ ଲକ୍ଷ ଟଙ୍କାର ନିଶ୍ଚିତ ରାଶି ମିଳିବ।
– ଯଦି ଆପଣ କିଛି ଜୋଖିମ ନେଇ ଅଧିକ ରିଟର୍ଣ୍ଣ ଚାହୁଁଛନ୍ତି, ତେବେ SIP ଆପଣଙ୍କ ପାଇଁ ଲାଭଦାୟକ ହେବ। ଏହା ଦ୍ୱାରା ୧.୫ ଲକ୍ଷ ଟଙ୍କା ବାର୍ଷିକ ନିବେଶରେ ୧୫ ବର୍ଷରେ ୭୫-୮୦ ଲକ୍ଷ ଟଙ୍କା ପର୍ଯ୍ୟନ୍ତ ଫଣ୍ଡ ସୃଷ୍ଟି ହୋଇପାରେ।
ତେଣୁ, ଆପଣଙ୍କ ଆର୍ଥିକ ଲକ୍ଷ୍ୟ ଓ ଜୋଖିମ ନେବାର କ୍ଷମତା ଅନୁଯାୟୀ ଆପଣ ନିଷ୍ପତ୍ତି ନେଇପାରିବେ। SSY ସୁରକ୍ଷିତ ଓ ନିଶ୍ଚିତ, କିନ୍ତୁ SIP ଅଧିକ ରିଟର୍ଣ୍ଣର ସମ୍ଭାବନା ଦେଇଥାଏ।
