ସିକିମ୍ ଭାରତର ଏକ ଆକର୍ଷଣୀୟ ତଥା ଛୋଟ ରାଜ୍ୟ, ଯାହାର ଅପୂର୍ବ ପ୍ରାକୃତିକ ସୌନ୍ଦର୍ଯ୍ୟ ଦେଶବିଦେଶର ପର୍ଯ୍ୟଟକଙ୍କୁ ଖୁବ୍ ଆକର୍ଷିତ କରିଥାଏ। ବିଶେଷକରି ପ୍ରକୃତିପ୍ରେମୀଙ୍କ ପାଇଁ ଏହା ଏକ ଉପଯୁକ୍ତ ସ୍ଥାନ। ସିକିମ୍ ଭାରତର ଉତ୍ତର-ପୂର୍ବ ଭାଗରେ ଅବସ୍ଥିତ ଏକ ପାର୍ବତୀୟ ରାଜ୍ୟ; ଯାହା ନିଜର ଆକର୍ଷଣୀୟ ନଦୀ, ପାହାଡ଼, ଝରଣା, ହ୍ରଦ, ପ୍ରାଚୀନ ମଠ, ଅର୍କିଡ୍ ନର୍ସରୀ ତଥା ଆଶ୍ଚର୍ଯ୍ୟଜନକ ଟ୍ରେକିଂ ମାର୍ଗ ପାଇଁ ବେଶ୍ ପ୍ରସିଦ୍ଧି ଲାଭ କରିପାରିଛି। ଖାସ୍ ସେଥିପାଇଁ ବର୍ଷର ବିଭିନ୍ନ ସମୟରେ ଏଠାରେ ପର୍ଯ୍ୟଟକଙ୍କର ପ୍ରବଳ ଭିଡ଼ ଦେଖିବାକୁ ମିଳିଥାଏ।
ଇତିହାସ
ସିକିମ୍ର ଇତିହାସ ସେହି ସମୟକୁ ବୁଝାଏ, ଯେତେବେଳେ ଲେପ୍ଚାମାନେ ଏହି ରାଜ୍ୟର ମୂଳନିବାସୀ ଥିଲେ। ତା’ଛଡ଼ା ଅଷ୍ଟମ ଶତାବ୍ଦୀ ବେଳକୁ ବୌଦ୍ଧ ସନ୍ଥ ଗୁରୁ ରିନ୍ପୋଚେ (ପଦ୍ମସମ୍ଭବ) ସିକିମ୍ରେ ବୌଦ୍ଧ ଧର୍ମର ପ୍ରଚାର ଆରମ୍ଭ କରିବା ସହ ଉକ୍ତ ରାଜ୍ୟର ଉତ୍ତରୋତ୍ତର ଉନ୍ନତି ପାଇଁ ଆଶୀର୍ବାଦ କରିଥିଲେ ବୋଲି ମଧ୍ୟ ସୂଚନା ରହିଛି। ତେବେ ସିକିମ୍ରେ ମୁଖ୍ୟତଃ ଲେପ୍ଚା, ଭୁଟିୟା ତଥା ତିବ୍ବତୀ ଏହିପରି ତିନି ସମ୍ପ୍ରଦାୟର ଲୋକ ବସବାସ କରିଥାଆନ୍ତି। ତେଣୁ ସେହି ଅନୁଯାୟୀ ସେମାନଙ୍କର ପରିପାଟୀ, ପର୍ବପର୍ବାଣି ତଥା ଖାଦ୍ୟଶୈଳୀ ଭିନ୍ନ ହୋଇଥାଏ।
କ’ଣ ଦେଖିବେ
ସିକିମ୍ରେ ପର୍ଯ୍ୟଟକଙ୍କ ଦେଖିବା ନିମନ୍ତେ ଅନେକ ଦର୍ଶନୀୟ ସ୍ଥାନ ରହିଛି। ସେଗୁଡ଼ିକ ମଧ୍ୟରେ ପ୍ରମୁଖ ହେଲା- ସୋମ୍ଗୋ ହ୍ରଦ, ନଥୁଲା ପାସ୍, ଡିୟର୍ ପାର୍କ, ରୁମ୍ଟେକ୍ ମଠ ଇତ୍ୟାଦି। ଏତଦ୍ବ୍ୟତୀତ ମହାନ୍ ସାଧୁ ଗୁରୁ ପଦ୍ମସମ୍ଭବଙ୍କ ସବୁଠାରୁ ଉଚ୍ଚମୂର୍ତ୍ତି ବି ଏହିଠାରେ ଦେଖିବାକୁ ମିଳିଥାଏ। ତେବେ ସିକିମ୍ର ରାଜଧାନୀ ଗାଙ୍ଗଟକ୍ରେ ବି ପର୍ଯ୍ୟଟକଙ୍କ ପାଇଁ ରହିଛି ଅନେକ ଆକର୍ଷଣୀୟ ପର୍ଯ୍ୟଟନସ୍ଥଳୀ। ଖାସ୍ କରି ଗାଙ୍ଗଟକ୍ରେ ଥିବା ଲାଲ୍ ବଜାର ନାମକ ଏକ ବଜାରରେ ପର୍ଯ୍ୟଟକ ବୁଲିବା ସହ ନିଜର ପ୍ରିୟଜନଙ୍କ ପାଇଁ ବହୁତ କିଛି ଉପହାର ବେଶ୍ ସୁଲଭ ଦରରେ କିଣି ଆଣିପାରିବେ। ତା’ଛଡ଼ା ସିକିମ୍ରେ ପ୍ରାୟ ପାଞ୍ଚ ହଜାର ପ୍ରଜାତିର ଫୁଲଗଛ ଦେଖିବାକୁ ମିଳିଥାଏ; ତନ୍ମଧ୍ୟରୁ ପ୍ରାୟ ୫୧୫ ପ୍ରକାର ହେଉଛି ଭିନ୍ନ ଭିନ୍ନ ପ୍ରଜାତିର ଅର୍କିଡ୍। ଏସବୁ ବ୍ୟତୀତ ଅନେକ ପାହାଡ଼, ଝରଣା, ହ୍ରଦ, ନଦୀ ତଥା ଠାଏଠାଏ ଥିବା ଅର୍କିଡ ଗାର୍ଡେନ୍ ମଧ୍ୟ ପର୍ଯ୍ୟଟକ ବୁଲି ଦେଖିପାରିବେ।
ଦୁଃସାହସିକ କ୍ରୀଡ଼ାର ମଜା
ଏହା ଏମିତି ଏକ ରାଜ୍ୟ; ଯାହା ନିଜର ପ୍ରାକୃତିକ ସୌନ୍ଦର୍ଯ୍ୟ ତଥା ଆକର୍ଷଣୀୟ କଳା ସଂସ୍କୃତି ସହିତ ବିଭିନ୍ନ ପ୍ରକାର ରୋମାଞ୍ଚକାରୀ ଦୁଃସାହସିକ କ୍ରୀଡ଼ା ପାଇଁ ବି ପ୍ରସିଦ୍ଧି ଲାଭ କରିପାରିଛି। ଖାସ୍ କରି ଟ୍ରେକିଂ ପ୍ରିୟ ପର୍ଯ୍ୟଟକଙ୍କ ପାଇଁ ଏହା ଏକ ସ୍ବର୍ଗସମ ସ୍ଥାନ ହୋଇଥାଏ। ତା’ଛଡ଼ା ରିଭର୍ ରାଫ୍ଟିଂ, ବାଇକିଂ ଓ ଚମରୀ ଗାଈ ଉପରେ ବସି ବୁଲିବାର ଅପୂର୍ବ ଆନନ୍ଦ ମଧ୍ୟ ପର୍ଯ୍ୟଟକ ଏଠାରେ ନେଇପାରିବେ।
ଖାଦ୍ୟପେୟ
ସିକିମ୍ରେ ମୁଖ୍ୟତଃ ନେପାଳ, ଭୁଟାନ୍, ତିବ୍ବତ ତଥା ଭାରତୀୟ ଶୈଳୀରେ ପ୍ରସ୍ତୁତ କରାଯାଉଥିବା ବିଭିନ୍ନ ପ୍ରକାରର ସୁସ୍ବାଦୁ ବ୍ୟଞ୍ଜନ ଖାଇବାକୁ ମିଳିଥାଏ। ଏହି ରାଜ୍ୟର ଖାଦ୍ୟଶୈଳୀ ବିଶେଷତଃ ନିଜର ଚତୁଃପାର୍ଶ୍ୱର ସଂସ୍କୃତି ତଥା ଧର୍ମଦ୍ୱାରା ପ୍ରେରିତ ହୋଇଥାଏ।
କେବେ ଓ କେମିତି ଯିବେ
ସିକିମ୍ ବୁଲିଯିବା ପାଇଁ ଏପ୍ରିଲ୍ରୁ ସେପ୍ଟେମ୍ବର ହେଉଛି ସବୁଠୁ ଭଲ ସମୟ। ଏହି ସମୟରେ ଏଠାକାର ପାଣିପାଗ ବୁଲାବୁଲି କରିବାକୁ ବେଶ୍ ଅନୁକୂଳ ରହିଥାଏ। ତେବେ ଜୁଲାଇରୁ ସେପ୍ଟେମ୍ବର ଭିତରେ ଏଠାରେ ସାମାନ୍ୟ ବର୍ଷା ହେଉଥିବା ମଧ୍ୟ ପରିଲକ୍ଷିତ ହୋଇଥାଏ। ସେହିପରି ଶୀତଦିନେ ଏଠାକାର ତାପମାତ୍ରା ପ୍ରାୟ କମିଯାଏ, ଏପରିକି ସ୍ଥାନେ ସ୍ଥାନେ ପ୍ରବଳ ତୁଷାରପାତ ବି ହୋଇଥାଏ। ତେଣୁ ଶୀତଦିନେ ଏଠାକୁ ବୁଲିଯିବା ପାଇଁ ବାରଣ କରାଯାଇଥାଏ। ତେବେ ଏସବୁ ଦୃଷ୍ଟିରୁ ବିଚାର କଲେ, ସିକିମ୍କୁ ଏପ୍ରିଲ୍ରୁ ମେ’ ଭିତରେ ବୁଲିଯିବା ସବୁଠୁ ଉପଯୁକ୍ତ ହୋଇଥାଏ। ସେହିପରି ସିକିମ୍କୁ ବୁଲିଯିବା ପାଇଁ ଗମନାଗମନର ତିନୋଟି ମାଧ୍ୟମ ରେଳ, ବସ୍ ତଥା ଟ୍ରେନ୍ର ବେଶ୍ ଭଲ ସୁବିଧା ରହିଛି।
