ଇସଲାମାବାଦ,୨ ।୭: ପାକିସ୍ତାନରେ ହେବାକୁ ଯାଉଥିବା ଉପ ନିର୍ବାଚନ ପାଇଁ ପଞ୍ଜାବ ଅଞ୍ଚଳରେ ଲାଗିଥିବା ପୋଷ୍ଟରରେ ପଞ୍ଜାବି ଗାୟକ ସ୍ୱର୍ଗତ ସିଦ୍ଧୁ ମୁସେୱାଲାଙ୍କ ଫଟୋ ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ଏହି ଭାରତୀୟ ଗାୟକ ତାଙ୍କ ଗୀତ ‘୨୯୫’ ପାଇଁ ବେଶ ପରିଚିତ ଥିବା ବେଳେ ଗତ ମେ’ ମାସରେ ତାଙ୍କୁ ଗୁଳିକରି ହତ୍ୟା କରାଯାଇଛି ।
ନ୍ୟୁଜ ଇଣ୍ଟନ୍ୟାଶନାଲ ଖବରକାଗଜ ଅନୁଯାୟୀ, ପାକିସ୍ତାନୀ ପଞ୍ଜାବର ମୁଲତାନ ଅଞ୍ଚଳରେ ୨୧୭ ଆସନରେ ଉପନିର୍ବାଚନ ହେବାକୁ ଯାଉଛି । ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାଁଙ୍କ ଦଳ ପାକିସ୍ତାନ ତେହରିକ-ଏ-ଇନସାଫ(ପିଟିଆଇ)ର ପୋଷ୍ଟରରେ ସିଦ୍ଧୁ ମୁସେୱାଲାଙ୍କ ଫଟୋର ବ୍ୟବହାର ଜେନ କୁରେଶିଙ୍କ ସହ କରାଯାଇଛି । ସେ ହେଉଛନ୍ତି ପାକିସ୍ତାନର ପୂର୍ବତନ ବୈଦେଶିକମନ୍ତ୍ରୀ ଶାହ ମହମୁଦ କୁରୈଶିଙ୍କ ପୁତ୍ର । ଉକ୍ତ ପୋଷ୍ଟରରେ ସିଦ୍ଧୁ ମୁସେୱାଲାଙ୍କ ୨୯୫ର ଫଟୋ ବି ରହିଛି । ତାଙ୍କର ଏହି ଗୀତ ଭାରତୀୟ ଦଣ୍ଡ ସଂହିତା ସମ୍ବନ୍ଧିତ । ଉପନିର୍ବାଚନ ଜୁଲାଇ ୧୪ରେ ହେବ ।
