ଜଗତସିଂହପୁର ଅଫିସ, ୨ା୭: ବିଶ୍ୱ ପ୍ରସିଦ୍ଧ ରଥଯାତ୍ରା ନେଇ ସାରା ଜଗତ୍ସିଂହପୁର ଜିଲାରେ ଶୁକ୍ରବାର ଭାବାବେଗ ପରିବେଶ ସୃଷ୍ଟି ହୋଇଥିଲା। ଏହି ଯାତ୍ରା ସମୟରେ ଅନେକ ସ୍ଥାନରେ ଜଗନ୍ନାଥ ପ୍ରେମୀମାନେ ଭାବ ବିହ୍ବଳିତ ହୋଇ ପଡ଼ିିଥିଲେ। ଏହି ଅବସରରେ ସିଦ୍ଧଳସ୍ଥିତ ବଳଦେବଜୀଉ ମନ୍ଦିର ପରିଚାଳନା କମିଟି ଆନୁକୂଲ୍ୟରେ ରଥଯାତ୍ରା ରୀତିନୀତି ଅନୁଯାୟୀ ଅନୁଷ୍ଠିତ ହୋଇଥିଲା। ପ୍ରାତଃ ସମୟରୁ ମଙ୍ଗଳ ଆଳତି, ସ୍ନାନାଦି ନିତ୍ୟକ୍ରିୟା, ମଙ୍ଗଳାର୍ପଣ, ଦ୍ୱାରପାଳ ପୂଜା, ସୂର୍ଯ୍ୟପୂଜା, ପାକଶାଳା ପୂଜା, ବୈଷ୍ଣବାଗ୍ନି ସଂସ୍କାର, ଷୋଡ଼ଶ ଉପଚାର ଆଦି ପୂଜା ରୀତି ନୀତି ଅନୁଯାୟୀ ସମ୍ପନ୍ନ ହୋଇଥିଲା। ମଧ୍ୟାହ୍ନରେ ଧୂପ ଓ ଏହା ପରେ ରଥ ପ୍ରତିଷ୍ଠା ପତାକା ଲାଗି କରାଯାଇଥିଲା। ଅପରାହ୍ନରେ ପ୍ରଭୁଙ୍କ ରଥାରୋହଣ ଏବଂ ପହଣ୍ଡିବିଜେ ଅନୁଷ୍ଠିତ ହୋଇଥିଲା । ଏଥର ଅତିରିକ୍ତ ଜିଲାପାଳ ସଚିଦାନନ୍ଦ ସାହୁ ଠାକୁର ରାଜା ଭାବେ ରଥ ମାର୍ଜନା ଓ ଛେରା ପହଁରା କରିଥିଲେ। ଏହାପରେ ଆରତି ଦର୍ଶନ, ସର୍ବସାଧାରଣ ଭୋଗ ଲାଗି ଓ ରଥଚାଳନା କରାଯାଇଥିଲା। ସହସ୍ରାଧିକ ଭକ୍ତଙ୍କ ସମାଗମ ଭିତରେ ରଥ ଗଡି ଶେଷରେ ମାଉସୀ ମା’ ମନ୍ଦିର ନିକଟରେ ପହଞ୍ଚତ୍ଥିଲା । ଜନସମାଗମକୁ ଦୃଷ୍ଟିରେ ରଖି ପୋଲିସ ଓ ପ୍ରଶାସନ ତରଫରୁ ସୁରକ୍ଷା ଓ ଅନ୍ୟାନ୍ୟ ବ୍ୟବସ୍ଥା କରାଯାଇଥିଲ। ସେହିପରି ଜଗତ୍ସିଂହପୁର ବ୍ଲକ ଅନ୍ତର୍ଗତ ଖଇରଙ୍ଗ ଗ୍ରାମରେ ପ୍ରଫୁଲ ପାଠାଗାର ଓ ଖଇରଙ୍ଗ ଗ୍ରାମବାସୀଙ୍କ ମିଳିତ ଆନୁକୂଲ୍ୟରେ ରଥଯାତ୍ରା ଅନୁଷ୍ଠିତ ହୋଇଥିଲା। ଖଇରଙ୍ଗ ଗ୍ରାମସ୍ଥିତ ଭାଗବତ ଟୁଙ୍ଗୀରୁ ଚତୁର୍ଦ୍ଧାମୁରତିଙ୍କୁ ପହଣ୍ଡି ପରେ ଠାକୁର ରାଜା ଡ. ମନୋରଞ୍ଜନ ନନ୍ଦ ଛେରାପହଁରା କରିଥିଲେ। ପରେ ରଥ ଟଣା ହୋଇ ପ୍ରଫୁଲ ପାଠାଗାର ନିକଟରେ ପହଞ୍ଚତ୍ଥିଲା। ଏହି ସମୟରେ ଝାଞ୍ଜ, ଗିନି ଓ ମୃଦଙ୍ଗ ଆଦି ବାଦ୍ୟରୋଳ ସମଗ୍ର ଅଞ୍ଚଳରେ ନିଆରା ପରିବେଶ ସୃଷ୍ଟି କରିଥିଲା । ପୂଜକ ଭାବେ ରବି ପତି ଓ ମନୋରଞ୍ଜନ ଦାଶ ପୂଜାର୍ଚ୍ଚନା କରିଥିଲେ। କାର୍ଯ୍ୟକ୍ରମ ପରିଚାଳନାରେ ପାଠାଗାର ସଭାପତି ରବୀନ୍ଦ୍ରନାଥ ତ୍ରିପାଠୀ, ସୋସାଇଟି ଫର ରୁରାଲ ଡେଭଲପମେଣ୍ଟର ସଭାପତି ବଂଶୀଧର ଆଚାର୍ଯ୍ୟ, ପାଠାଗାର ସମ୍ପାଦକ ସୁରେନ୍ଦ୍ର କୁମାର ରାୟ, ଉପଦେଷ୍ଟା ବିଜୟ କୁମାର ପତି, ମୁଖ୍ୟ ପୃଷ୍ଠପୋଷକ ପ୍ରସନ୍ନ କୁମାର ଦାଶ, ନିରଞ୍ଜନ ଦାଶ, ପ୍ରଶାନ୍ତ କୁମାର ଦାଶ, ହିମାଂଶୁ ଦାଶ, ପ୍ରମୋଦ ଦାଶ, ସମୀର ଦାଶ, ଶକ୍ତିଧର ମିଶ୍ର, ଶରତ କୁମାର ଦାଶ ପ୍ରମୁଖ ସହାୟତା କରିଥିଲେ । ଏହାଛଡା ଜଗତ୍ସିଂହପୁର ସହରର ପାଣିଶାଳିଆ, ବାରଙ୍ଗ ଏବଂ ପୋକପୁର ଆଦି ଏକାଧିକ ସ୍ଥାନରେ ରଥଯାତ୍ରା ହୋଇଥିଲା।
