ବାଲେଶ୍ୱର ଅଫିସ, ୧୮।୧୨: ବାଲେଶ୍ୱର ଜିଲା ଖନ୍ତାପଡ଼ା ଥାନା ଅଧୀନ ତାଳପଦା ଭିଲ୍ଲା ଗ୍ରାମର ଶୁଭପ୍ରସାଦ ମଳିକ ନିଶରେ ଟ୍ରାକ୍ଟର ଟାଣି ଚର୍ଚ୍ଚାକୁ ଆସିଛନ୍ତି। ପଶ୍ଚିମବଙ୍ଗ ରାଜ୍ୟ ପଶ୍ଚିମମେଦିନୀପୁର ଜିଲା ସୁଲତାନପୁର ଅଞ୍ଚଳରେ ହେଉଥିବା ‘ନେତାଜୀ ମେଳା’ରେ ଶୁଭପ୍ରସାଦ ୪ ବର୍ଷ ଧରି ଯୋଗଦେଇ ବିଭିନ୍ନ ଖେଳ ପ୍ରଦର୍ଶନ କରୁଛନ୍ତି। ପ୍ରଥମବର୍ଷ ନିଶରେ ବାଇକ୍ ଟାଣି ଥିବାବେଳେ ଦ୍ୱିତୀୟ ବର୍ଷ ମାରୁତି, ତୃତୀୟ ବର୍ଷ ପିକଅପ୍ ଭ୍ୟାନ୍ ଟାଣିଥିଲେ। ଏବର୍ଷ ସେ ନିଶରେ ଟ୍ରାକ୍ଟର ଲଗାଇ ୬ଶହ ମିଟରରୁ ଉର୍ଦ୍ଧ୍ୱ ପର୍ଯ୍ୟନ୍ତ ରାସ୍ତା ଟାଣିଛନ୍ତି। ମେଳାର ଆୟୋଜକମାନେ ତାଙ୍କୁ ୨୨ହଜାର ଟଙ୍କା ପ୍ରଦାନ କରିବା ସହ ମାନପତ୍ର ଏବଂ ଉପଢ଼ୌକନ ଦେଇ ସମ୍ମାନିତ କରିଥିଲେ। ସେହିପରି ଆସନ୍ତା ବର୍ଷ ଏହି ମେଳାରେ ସେ ନିଶରେ ବସ୍କୁ ଟାଣିବେ ବୋଲି ଘୋଷଣା କରିଛନ୍ତି।
ଶୁଭପ୍ରସାଦ ପଶ୍ଚିମମେଦିନୀପୁର ଦାନ୍ତୁନଠାରେ ଅନୁଷ୍ଠିତ ଗ୍ରାମୀଣ ମେଳାରେ ନିଶରେ ଟାଟା ସୁମୋ ଟାଣି ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀଙ୍କ ଦୃଷ୍ଟି ଆକର୍ଷଣ କରି ପୁରସ୍କୃତ ହୋଇଥିଲେ। ସେହିପରି କାନ୍ଥିଠାରେ ଏଗ୍ରୋ ସେଣ୍ଟ୍ରାଲ ମେଳାରେ ନିଶରେ ବୋଲେରୋ ଟାଣି ଅତିଥି ଭାବେ ଯୋଗଦେଇଥିବା ଥାଇଲାଣ୍ଡର ମନ୍ତ୍ରୀଙ୍କଠାରୁ ପୁରସ୍କାର ଗ୍ରହଣ କରିଥିଲେ। ଗତ ୧୯୯୮ରୁ ଆରମ୍ଭ କରିଥିବା ଏହି ଅଭିଯାନ ମାଧ୍ୟମରେ ଗିନିଜ୍ ରେକର୍ଡ଼ କରିବାକୁ ଲକ୍ଷ୍ୟ ରଖିଥିବା ସେ କହିଛନ୍ତି।
