ପାରଳାଖେମୁଣ୍ଡି,୨୭ା୫ (ଗିରିଧାରୀ ପରିଛା): ଗଜପତି ଜିଲାର ୭ଟି ବ୍ଲକ ଯଥା ମୋହନା, ଆର.ଉଦୟଗିରି, ନୂଆଗଡ, ଗୋଷାଣୀ, କାଶୀନଗର, ଗୁମ୍ମା ଏବଂ ରାୟଗଡ଼ ବ୍ଲକରେ ଉତ୍ପାଦିତ ପଣସର ଚାହିଦା ଦେଶର ବିଭିନ୍ନ ରାଜ୍ୟରେ ବେଶ ଅଧିକ ରହିଛି। ବିଶେଷକରି ପଡ଼ୋଶୀ ଆନ୍ଧ୍ର ପ୍ରଦେଶ ସହ ଛତିଶଗଡ଼, ଉତ୍ତରପ୍ରଦେଶ, ବିହାର, ପଶ୍ଚିମବଙ୍ଗ ରାଜ୍ୟକୁ ଏହା ରପ୍ତାନି ହୋଇଥାଏ। ଚଳିତବର୍ଷ ପଣସ ଉତ୍ପାଦନ ବୃଦ୍ଧି ପାଇଥିବା ଦେଖିବାକୁ ମିଳିଛି। ବିଶେଷକରି ଗୁମ୍ମା ବ୍ଲକର ଡ଼କଳାକୋଟ, ଡୁମ୍ବାଡ଼ା, ଅଜୟଗଡ଼, ଭୁବୁନି, ତରଙ୍ଗଡ଼ା, ସେରଙ୍ଗ, ଆଶ୍ରୟଗଡ଼ ଓ ନାମନାଗଡ଼ ଏବଂ ରାୟଗଡ଼ ବ୍ଲକର ଜିରାଙ୍ଗ, କଇଁପୁର ଓ ମଣ୍ଡଳସାହି ସହ ଆର. ଉଦୟଗିରି, ନୂଆଗଡ, ମୋହନା, ଗୋଷାଣୀ ଓ କାଶୀନଗର ବ୍ଲକର ବହୁ ଅଞ୍ଚଳରେ ବହୁ ପରିମାଣର ପଣସ ଉତ୍ପାଦିତ ହୁଏ। ପ୍ରାୟତଃ ନଭେମ୍ବର ମାସ ଶେଷ ସପ୍ତାହରୁ ପଣସ ଫଳ ଧରେ। ଜାନୁଆରି ମାସ ସୁଦ୍ଧା ବିକ୍ରିଯୋଗ୍ୟ ହୋଇଥାଏ। ଅଧିକ ଉତ୍ପାଦନ କାରଣରୁ ଚଳିତବର୍ଷ ବଜାରକୁ ବିପୁଳ ପରିମାଣର ପଣସ ଆସିଥିବା ଦେଖିବାକୁ ମିଳୁଛି। ତେବେ ଉତ୍ପାଦିତ ପଣସକୁ ସରକାରୀ ଭାବେ ବିକ୍ରୟ ପାଇଁ କୌଣସି ସୁବିଧା ଏବଂ ପ୍ରୋତ୍ସାହନ ନଥିବା ଯୋଗୁଁ ଚାଷୀମାନେ ବାଧ୍ୟ ହୋଇ ବିଭିନ୍ନ ରାଜ୍ୟରୁ ଆସି ଡେରା ପକାଇଥିବା ବ୍ୟବସାୟୀଙ୍କୁ ସିଧାସଳଖ ବିକ୍ରି କରୁଛନ୍ତି। ସ୍ଥାନୀୟ ଚାଷୀ ବାହାରୁ ଆସୁଥିବା ବ୍ୟବସାୟୀଙ୍କୁ କିଲୋ ପିଛା ୩୦ ରୁ ୩୫ ଟଙ୍କାରେ ବିକ୍ରୟ କରୁଥିବା କହିଛନ୍ତି ଚାଷୀ ମଣ୍ଡୁ ମଣ୍ଡଳ, ଗଣେଶ ବାରିକ, ସାଇ ଗମାଙ୍ଗ ପ୍ରମୁଖ। ରାଞ୍ଚି, ରାୟପୁର, ମଥୁରା, କାଶୀ, ବୃନ୍ଦାବନ, ପାଟଣା ଓ କୋଲକାତାରୁ ଏବଂ ଅନ୍ୟ କିଛି ରାଜ୍ୟରୁ ମଧ୍ୟ ବ୍ୟବସାୟୀ ଆସିଥାନ୍ତି। ଉତ୍ପାଦନ ସମୟରେ ପ୍ରତ୍ୟେକ ଦିନ ଏହି ଅଞ୍ଚଳରୁ ପ୍ରାୟ ଦୁଇ ଟ୍ରକ ପଣସ ବାହାର ରାଜ୍ୟକୁ ଯାଉଛି। ଚଳିତବର୍ଷ ଅଧିକାଂଶ ସ୍ଥାନରେ ପଣସ ଉତ୍ପାଦନ ଅଧିକ ମାତ୍ରାରେ ହୋଇଛି। ହେଲେ ଏଥିନିମନ୍ତେ ସରକାରୀ ଭାବେ କୌଣସି ସୁବିଧା ଓ ସୁଯୋଗ ଯୋଗାଇଦେବାକୁ ଚାଷୀ ବହୁବାର ଦାବି କରିଥିଲେ ହେଁ, କୌଣସି ସୁଫଳ ମିଳୁନାହିଁ। ଫଳରେ ପଣସ ଚାଷୀମାନେ ନିଜ ଉତ୍ପାଦିତ ସାମଗ୍ରୀକୁ ଶାଗ ମାଛ ଦରରେ ବିକ୍ରି କରିବାକୁ ବାଧ୍ୟ ହେଉଛନ୍ତି। ଏଥିପାଇଁ ସରକାର ପଦକ୍ଷେପ ଗ୍ରହଣ କରନ୍ତୁ ବୋଲି ଚାଷୀମାନେ ନିବେଦନ କରିଛନ୍ତି।
