କରୋନା ମହାମାରୀର ଦ୍ୱିତୀୟ ଲହର ଏବେ ସମଗ୍ର ବିଶ୍ୱକୁ କବଳିତ କରିଛି। ଚାରିଆଡ଼େ ଖାଲି ମୃତ୍ୟୁ ହିଁ ମୃତ୍ୟୁ। ଏହି ସମୟରେ କିଛି କମ୍ପାନୀ କରୋନା ଆକ୍ରାନ୍ତ ଏବଂ କରୋନା ଯୋଦ୍ଧାଙ୍କୁ ସାହାଯ୍ୟ କରିବା ପାଇଁ ଆଗେଇ ଆସିଛନ୍ତି। ଜର୍ମାନୀର ଏକ କମ୍ପାନୀ କରୋନା ରୋଗୀ ଏବଂ ମେଡିକାଲ ଷ୍ଟାଫ୍ଙ୍କ ପାଇଁ ଏକ ସ୍ବତନ୍ତ୍ର ଧରଣର ଚପଲ ତିଆରି କରିଛି।
ସାଧାରଣତଃ ଜୋତା ଏବଂ ଚପଲରେ ୭ ଘଣ୍ଟା ପର୍ଯ୍ୟନ୍ତ ବ୍ୟାକ୍ଟେରିଆ ଲାଗି ରହିଥାନ୍ତି। ଏହି ଚପଲକୁ ସହଜରେ ସାନିଟାଇଜ୍ କରାଯାଇପାରିବ। ସାଧାରଣତଃ ଜଣେ ବ୍ୟକ୍ତି ଦିନକୁ ୩୦୦୦ ପାଦ ଚାଲିଥାନ୍ତି। କିନ୍ତୁ ଜର୍ମାନୀର ଭନ୍ ଓ୍ବେଲେକ୍ସ (von-wellx) କମ୍ପାନୀର ଚପଲକୁ ପିନ୍ଧି ୮୦୦୦ ପାଦ ପର୍ଯ୍ୟନ୍ତ ଯାଇହେବ। କମ୍ପାନୀ କହିବା କଥା, ଏହି ସ୍ବତନ୍ତ୍ର ଧରଣର ଚପଲ କରୋନା ରୋଗୀ ଏବଂ କରୋନା ଯୋଦ୍ଧାଙ୍କୁ ବହୁତ ସାହାଯ୍ୟ କରିବ।
ଫ୍ୟାକ୍ଟ୍ରିରେ ବହୁ ପରିମାଣରେ ଚପଲ ତିଆରି କରାଯାଉଛି। ଏହି ଚପଲ ପିନ୍ଧି ଚାଲିଲେ ମାଂସପେଶୀ ସୁଦୃଢ଼ ହୋଇଥାଏ। ଯାହାକି ଶରୀରରେ ରକ୍ତ ସଞ୍ଚାଳନ ଓ ଅକ୍ସିଜେନକୁ ଖୁବ ଦ୍ରୁତ ଗତିରେ ବଢ଼ାଇଥାଏ। କରୋନା ଭାଇରସକୁ ଦୃଷ୍ଟିରେ ରଖି ଏହି ଚପଲ ପ୍ରସ୍ତୁତ କରିବାରେ ସ୍ବତନ୍ତ୍ର ଧରଣର ମ୍ୟାଟେରିଆଲ ବ୍ୟବହୃତ ହୋଇଛି। ଏହାକୁ ପିନ୍ଧିବା ପରେ ରୋଗୀ ଏବଂ କରୋନା ଯୋଦ୍ଧା ସମ୍ପୂର୍ଣ୍ଣ ଭାବରେ ଆକ୍ଟିଭ ଓ ଫିଟ୍ ରହିବେ ବୋଲି କମ୍ପାନୀ କହିଛି।
ଉକ୍ତ କମ୍ପାନୀ ଦେଶରେ କୋଭିଡ୍ ରୋଗୀ ଓ ମେଡିକାଲ ହେଲଥ ଓ୍ବାର୍କର୍ସଙ୍କୁ ପ୍ରଧାନମନ୍ତ୍ରୀ ରିଲିଫ ଫଣ୍ଡ୍ ଦ୍ବାରା ଦେବାର ଘୋଷଣା କରିଛି। ଜୋତା ବ୍ୟବସାୟର ମୁଖ୍ୟ ଆଶିଷ ଜୈନ କହିଛନ୍ତି, କମ୍ପାନୀ ୧୦ ହଜାର ହଳ ଚପଲ ଦାନ କରିବ। ଯାହାର ମୂଲ୍ୟ ୫୦ ଲକ୍ଷ ଟଙ୍କା ରହିଛି। ଦେଶର ଭିନ୍ନ ଭିନ୍ନ ହସ୍ପିଟାଲରେ ଏହି ଚପଲକୁ ମାଗଣାରେ ଯୋଗାଇ ଦିଆଯିବ।
