ଗଞ୍ଜାମ,୯।୨(ବିଦ୍ୟାଧର ସାହୁ): ଆସନ୍ତା ୧୫ରେ ମହାଶିବରାତ୍ରି। ଏଥିପାଇଁ ଗଞ୍ଜାମ ବ୍ଲକ ଅଞ୍ଚଳରେ ଥିବା ଶୈବପୀଠ ଗୁଡିକ ଚଳଚଞ୍ଚଳ ହୋଇ ଉଠିଥିବା ଦେଖିବାକୁ ମିଳିଛି l ବିଭିନ୍ନ ଶୈବ ପୀଠ ମଧ୍ୟରୁ ପ୍ରସିଦ୍ଧ ଶୈବପୀଠ ତଥା ବଟେଶ୍ୱର, ବାଲିଲୋକନାଥ, ଅଳେଶର, ସପ୍ନେଶର ଆଦି ପୀଠ ଗୁଡିକ ମହାଶିବରାତ୍ରି ନିମନ୍ତେ ପୀଠ ଗୁଡିକରେ ସାମାଜିକ ଅପେରା ଅନୁଷ୍ଠିତ ହେଉଥିବାବେଳେ ଖଣ୍ଡେଶ୍ୱର, ରାମଲିଙ୍ଗେଶ୍ୱର, ଗୁପ୍ତେଶ୍ୱର, ଭୀମେଶ୍ୱର, ରାମେଶ୍ୱର ନୀଳକଣ୍ଠେଶର, ମକରେଶ୍ୱର, ବାଲୁଙ୍କେଶ୍ୱର, ପୁଡ଼ୁଗେଶ୍ୱର, ଚନ୍ଦ୍ର ମଉଳେସ୍ବର, ରାମେଶ୍ୱର, ମୁକେଶ୍ୱର ଆଦି ଶୈବ ପୀଠ ଗୁଡିକରେ ନାମଯଂଜ୍ଞ, ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ ବୋଲି ଜଣାପଡିଛି l
ସେହିପରି ହୁମା ପଞ୍ଚାୟତ ବୋରିଗାଁ ଗ୍ରାମ ନିକଟରେ ଅବସ୍ଥିତ ପ୍ରସିଦ୍ଧ ବାବା ଝାଡେଶ୍ୱର ମନ୍ଦିରରେ ରବିବାରଠାରୁ ଆରମ୍ଭ ହୋଇଛି ବିଶ୍ୱ ଶନ୍ତି ମହାଯଂଜ୍ଞ l ଏହା ଆସନ୍ତା ୨୦ ପର୍ଯ୍ୟନ୍ତ ୧୧ ଦିନ ଧରି ଚାଲିବ ବୋଲି ଆୟୋଜକ ପକ୍ଷରୁ କୁହାଯାଇଛି l ଏହାକୁ ଆଠ ଖଣ୍ଡ ଗ୍ରାମ ବାସୀ ବୋରିଗାଁ ସମେତ ବଳଦିଆ ଢିଅ, ଲୁଂଘୁରି, ପଣିବନ୍ଧ, କୁଶପଲ୍ଲୀ, ନୁଆଁ କୁଶପଲି, କାଠଗଡା ଓ ଚୈତନ୍ୟପୁର ଆଦି ଗ୍ରାମବାସୀ ପରିଚାଳନା କରୁଛନ୍ତି l
ସେହିପରି ରାମଗଡ଼ ପଞ୍ଚାୟତ ରଘୁନାଥ ପୁର ଓ ପୋଡ଼ଗଡ଼ ଗ୍ରାମସ୍ଥିତ ପାହାଡ଼ ଉପରେ ବିରାଜ ମାନ ବାବା ସିକେରେସ୍ବର ଶୈବ ପୀଠଠାରେ ସାମାଜିକ ନାଟକ ପରିବେଷଣ ହେବ l ମହାଶିବରାତ୍ରି ପାଳନ କରୁଥିବା ଭକ୍ତ ମାନଙ୍କ ସ୍ବାର୍ଥ ଦୃଷ୍ଟିରୁ ସମସ୍ତ ଶୈବ ପୀଠ ଗୁଡିକରେ ଆଧ୍ୟାତ୍ମିକ ଓ ସଂସ୍କୃତିକ କାର୍ଯ୍ୟକ୍ରମ ତଥା ଭରତ ଲୀଳା, ରାଧା ପ୍ରେମ ଲୀଳା, ପାଲା, ଘୁଡୁକି ଆଦି ପରିବେଷଣ ନିମନ୍ତେ କମିଟି ପକ୍ଷରୁ ପଦକ୍ଷେପ ନିଆଯାଇଥିବା ବାବା ବାଲିଲୋକ ନାଥ ମନ୍ଦିର ପରିଚାଳନା କମିଟି ବି ବନମାଳୀ ଗଣମାଧ୍ୟମକୁ ସୂଚନା ଦେଇଛନ୍ତି l
Dharitri – Odisha’s No.1 Odia Daily
